Translations are evolving and should be taken as indicative only! For a guide to the tones and the spelling system used to write this variety of Isaan (Khon Kaen), see the "tone guide" on the overview page.

Tones: M = mid, HR = high-rising, H = high, HF = high-falling, LF = low-falling

Isaan	Pronunciation	Tones	Thai	English/Notes	#occ
แซบ	sɛ:p	HF	อร่อย	1. food: tasty {กวยเตียวมันแซบบ่ = Is the noodle soup tasty?} 2. sleep: well {เป็นตานอนแซบคัก = it looks as if she's sleeping very well}	43/17

Link to overview page
Link to dictionary

Basic vocabulary — page 06 — Series B, pictures 18-20: bed, to sleep, to dream, cat

18
นี้คืออี่หยัง นี้คือเตียงนอน
เตียงนอนมีไว้ถ้าเฮ็ดหญัง เตียงนอนมีไว้ถ้านอน
เตียงนอนสีอี่หยัง เตียงนอนสีเหลียง
เตียงนอนสูงบ่ บ่ เตียงนอนบ่สูง
เตียงนอนต่ำบ่ ต่ำอยู่ เตียงนอนมันต่ำ
เตียงนอนมันใหญ่บ่ ใหญ่อยู่ เตียงนอนมันใหญ่พอสมควน
อยู่เทิงเตียงนอนมีอี่หยังแน่ อยู่เทิงเตียงนอนสิมีหมอน สิมีผ้าห่ม
ผ้าห่มสีอี่หยัง ผ้าห่มสีฟ้า
ผ้าห่มผืนใหญ่บ่ ผ้าห่มผืนใหญ่อยู่
หมอนสีอี่หยัง หมอนสีขาว
หมอนอันใหญ่บ่ บ่ หมอนอันบ่ใหญ่หลาย
หมอนมันแข็งบ่ บ่ หมอนมันบ่แข็ง หมอนมันนุ้ม ขั้นหมอนมันแข็งเฮากะสินอนบ่ได้

19
พุหญิงคนนี้เขากำลังเฮ็ดหญัง เขากำลังนอนหลับ
เขานอนหลับอยู่ใส เขานอนหลับอยู่เทิงเตียงนอน
เขาเอาหัวของเขาไว้ใส เขาเอาหัวของเขาหมุนหมอนอยู่ แล้วเขากะใซ้ผ้าห่มห่มโตของเขา
เขาใส่เสี้ยสีอี่หยัง เขาใส่เสี้ยสีเขียว
ตอนนี้เขากำลังนอนหลับบ่ นอนหลับอยู่
คือลู้ว่าเขานอนหลับอยู่ กะลู้ เพาะว่าเขากำลังนอนกนก้อกๆ อยู่

20
พุหญิงคนนี้เขากำลังเฮ็ดหญัง เขากำลังนอนหลับ
เขานอนหลับซำบายบ่ ซำบายอยู่ เป็นตาซำบายคัก เป็นตานอนแซบคัก
เขากำลังฝันบ่ ฝันอยู่
เขาฝันว่าจั่งใด เขาฝันว่าเขากำลังเห็นแมวโตหนึ่ง
เขาฝันโดนบ่ บ่ลู้คือกันว่าเขาฝันโดนบ่ อาดจะบ่โดน เพาะว่าความฝันอาดสิสั้น อาดสิบ่ญาวหลาย

Basic vocabulary — page 08 — Series B, pictures 09-12: lime, sour, to squeeze

9
นี้คืออี่หยัง นี้คือบักนาว
บักนาวน่วยสีอี่หยัง บักนาวน่วยสีเขียว
บักนาวน่วยใหญ่บ่ บ่ บักนาวน่วยบ่ใหญ่ บักนาวน่วยน้อยๆ
บักนาวมันมีลดซาดจั่งใด บักนาวมันมีลดซาดส้มหลาย บักนาวมันส้มบักคักหนึ่ง ส้มกะด้อกะเดี้ย
น้ำบักนาวมีไว้เฮ็ดหญัง น้ำบักนาวมีไว้ถ้าปุงอาหาน น้ำบักนาวมีไว้ถ้าต้มน้ำเป็นยาสะหมุนไพกะได้

10
เขากำลังเฮ็ดหญัง เขากำลังกัดกินบักนาว
เขากัดกินบักนาวเฮ็ดหญัง บ่ลู้คือกัน เขาอาดสิอยากซิมบักนาวกะได้ ว่ามันส้มหลือบ่ส้ม
เขากัดกินเข้าไปแล้วมันส้มบ่ กะหน้าสิส้มอยู่ เพาะว่าเบิ่งสีหน้าของเขาแล้วเป็นตาส้มหลาย เป็นตาส้มบักคัก เป็นตาส้มกะด้อกะเดี้ย
บักนาวอยู่ในมือเขามีหลายบ่ บ่ บักนาวอยู่ในมือเขามีเปี่ยงเดียว หลือมีเคิ่งน่วย

11
เขากำลังเฮ็ดหญัง เขากำลังบีบบักนาว
เขาบีบบักนาวเฮ็ดหญัง เขาบีบบักนาวเพื่อที่สิเอาน้ำบักนาวออกมา
เขาสิเอาน้ำบักนาวไปเฮ็ดหญัง เขาอาดสิเอาน้ำบักนาวไปปุงอาหาน หลือไปเฮ็ดแนวกินกะได้
เขาใซ้อี่หยังบีบบักนาว เขาใซ้มือของเขาบีบบักนาว
เขาบีบบักนาวหลายบ่ บ่ เขาบีบบักนาวเคิ่งน่วย

12
เขากำลังเฮ็ดหญัง เขากำลังบีบน้ำบักนาว
เขาบีบน้ำบักนาวไปใส เขาบีบน้ำบักนาวใส่ถ้วยกวยเตียว
เป็นหญังเขาคือบีบน้ำบักนาวใส่ถ้วยกวยเตียว เขาอาดสิกินส้มหลือกินเปี้ยว เขากะเลยบีบน้ำบักนาวใส่ถ้วยกวยเตียว
มีกวยเตียวจักถ้วย มีกวยเตียวถ้วยเดียว
กวยเตียวมันแซบบ่ แซบอยู่ กวยเตียวมันอาดสิแซบหลาย

Basic vocabulary — page 16 — Series B, pictures 09-10: coffee, sugar

9
นี้คืออี่หยัง นี้คือกาแฟ
กาแฟอยู่ในถ้วย กาแฟอยู่ในถ้วยกาแฟ
กาแฟเป็นน้ำสีดำ เป็นน้ำสีดำๆ อยู่ในถ้วยกาแฟ ตั้งอยู่เทิงโต่ะ หลือตั้งอยู่ใสบุ
ถ้วยกาแฟมีสีขาว ออกสีฟ้าๆ นี้หละ แต่บ่ขาวหลาย ถ้วยกาแฟกะอันบ่ใหญ่ อันบ่ใหญ่หลาย อันพอน้อยๆ
กาแฟมีถ้วยฮองพ้อม หลือจานฮองนั้นหละ เป็นจานฮองกาแฟ
อยู่ข้างกาแฟมีซองน้ำตานพ้อม ซองน้ำตานเป็นซองสี่เหลี่ยม เป็นซองสีส้มๆ ส้มออกแดงๆ นี้หละ ซองบ่ใหญ่หลาย ซองน้อยๆ วางอยู่ข้างถ้วยกาแฟ
ถ้วยกาแฟมีหูจับบ่ ถ้วยกาแฟมีหูจับพ้อมแม่นบ่ แม่น ถ้วยกาแฟมีหูจับพ้อม
หูจับติดอยู่ข้างถ้วยกาแฟนั้นหละ หูจับบ่ใหญ่หลาย หูจับน้อยๆ พอเอาไว้ให้มือจับได้

10
เขากำลังเฮ็ดหญัง เขากำลังปุงกาแฟ
เป็นหญังเขาคือปุงกาแฟ บ่ลู้คือกัน กาแฟอันนี้อาดสิลดซาดบ่แซบ เขากะเลยปุง เพื่อที่สิให้มันแซบ หลือถืกปากของเขากะได้ เพื่อที่เขาสิได้กินแซบๆ
เขาปุงกาแฟจั่งใด เขาใส่น้ำตานเข้าไปในกาแฟอีก บ่ลู้ว่าเขาใส่อี่หยังแน่ แต่ที่เห็นๆ เขากำลังใส่น้ำตานอยู่ เขาจับซองน้ำตานเทลงไปในกาแฟ เขาอาดสิอยากกินหวาน อาดสิอยากกินลดซาดหวานๆ กะได้
น้ำตานมีลดซาดจั่งใด น้ำตานมีลดซาดหวาน มีลดซาดหวานคัก ขั้นใส่หลายกะหวานหลาย ขั้นใส่น้อยกะหวานน้อย
น้ำตานมันแข็งบ่ บ่ น้ำตานมันบ่แข็ง น้ำตานมันอ่อนๆ ขั้นมันถืกน้ำแล้วมันกะสิละลาย มันสามาดละลายได้เอง

Basic vocabulary — Page 26 — Series B, pictures 15-17: tooth, to eat, meat balls, dog, to bite, leg

15
อันนี้เป็นอี่หยัง อันนี้เป็นแข้ว เขาเอิ้นว่าแข้ว
แข้วของคนนี้หละ เบิ่งซงแล้วอันบักใหญ่หนึ่ง
แข้วคนนี้มีไว้เฮ็ดหญัง มีปะโยดอี่หยัง กะเอาไว้ถ้ากัดนั้นกัดนี้ กินนั้นกินนี้
แข้วนี้มันอยู่ในปากเด๊ มันอยู่ในปาก เป็นอะวัยยะวะอันหนึ่งของคน
แล้วสัดอื่นๆ กะมีแข้วคือกัน ซู่โตกะสิมีแข้วเนาะ กะสิซ้าง ม้า งัว ควย มีเบิดซู่โต ซู่สิ่งซู่อย่างสิมีแข้วเบิดซู่โต แต่ว่าบางสัดกะสิบ่มีแข้วเนาะ กะสิมีปากซื่อๆ บ่มีแข้ว

16
เขากำลังกัดกินอี่หยังอย่างหนึ่งนี้หละ เบิ่งไปคักๆ หนิ คือสิเป็นลูกซิ้นเนาะ หลือว่าเป็นซิ้นเนี้ยเนาะ เป็นย้างเนี้ย เป็นคำๆ อยู่ เขากำลังสิกัดกิน
เบิ่งซงแล้ว อาดสิมีสี่ต่น กินไปแล้วต่นหนึ่ง กำลังสิกินอีกต่นหนึ่ง ตอนนี้มันเหลียสามต่น กินเข้าไปในปากแล้วต่นหนึ่ง เหลียสามต่น
ตอนนี้กำลังสิกัดอีกต่นหนึ่งเนาะ เขาใซ้แข้วของเขาหละ ข้างหลังข้างเทิงกัด ม่ำเข้าไป กำลังสิกัดเข้าไป คือสิแซบคักแซบนัวเนาะ

17
เกิดอี่หยังขึ้น กะมีหมาโตหนึ่งนั้นหละ แล่นไปงับขาเขา เหลียวเบิ่งดูพุ้นหนะ แล่นไปงับขา ไปกัดขาพุซายพุหนึ่ง
คือสิเจ็บคักเจ็บแน่เนาะ เจ้าว่าเป็นตาเจ็บบ่ กะสิเจ็บอยู่แล้ว กะสิเจ็บคักอยู่แล้วเนาะ เบิ่งซงแล้ว หมา แข้วหมามันกะแหลม มันกะคมคักเนาะ กัดเข้าไปกะเจ็บคักเติบพุ้นแหล้ว
ขั้นหมากัดหนิมันอันตะลายบ่ กะอันตะลายเติบพุ้นแหล้ว กะต้องไปหาหมอ ไปให้หมอสีดยาพุ้นแหล้ว ขั้นบ่ไปกะ อาดสิเป็นหมาบ้า หลือว่าเป็นหมาว้อกะได้ เพาะว่าพิดสุนักบ้ามันมีอยู่ในหมาทุกโต ขั้นบ่ไปลักสาหลือว่าไปสีดยากับหมอ ไปเอายากับหมอ กะอาดสิเกิดอันตะลายได้

Basic vocabulary — Page 26 — Series B, pictures 11-14: to lie, sofa, to read, book, tiger, cat, to sleep

11
พุซายคนนี้เขากำลังเฮ็ดหญังอยู่ เขากำลังนอนอยู่
อาดสินอนหลับอยู่ นอนอยู่เทิงโซฟา โซฟาอันบักใหญ่พุ้นแหล้ว โซฟาสีเหลียง
เขากะนอนอยู่พุเดียวของเขานั้นหละ นอนซันขา ขึ้นขาหนึ่งพุ้นแหล้ว ขาหนึ่งกะเหยียดตงที้ลี้พุ้นแหล้ว มืออีกข้างหนึ่งเขากะวางอยู่เทิงอกของเขาเนาะ แล้วกะกำลังนอนอยู่ คือสินอนแซบ นอนนัวคักเนาะ เหลียวเบิ่งนอนหลับ บ่ฮอดมืนตาซ้ำ
แล้วพุซายคนนี้เขานอนเฮ็ดหญัง กะจักหละเด้อ จักว่าเขานอนเฮ็ดหญัง เขากะอาดสิเมี่ยย อาดสิล้า อาดสิมาจากหม้องเฮ็ดงาน อาดสิเซาเมี่ยยกะได้ เขากะเลยนอนหลับ ปะมานนั้นเนาะ

12
เขากำลังเฮ็ดหญัง กะมีพุซายพุหนึ่งนั้นหละ เขากำลังนอนอยู่ นอนอยู่เทิงโซฟา นอนอ่านหนังสือเนาะ
มือสองข้างจับหนังสือเหล้มหนึ่งขึ้นมา แล้วกะซันที้ลี้ขึ้น แล้วกะกำลังแนมเบิ่ง อาดสิอ่านเบิ่ง หลือว่าอ่านหนังสืออยู่กะได้เนาะ
ขาของเขาข้างหนึ่งกะซันขึ้น ขาข้างหนึ่งกะเหยียดที้ลี้ ตงที้ลี้ไปพุ้นหละเนาะ

13
อันนี้เป็นสัด สัดชะนิดหนึ่งเนาะ เป็นเสีย เขาเอิ้นว่าเสีย เสียกะเป็นสัดชะนิดหนึ่งนั้นหละ
เสียนี้เป็นสัดดุล้ายบ่ หลือว่าดุ หลือว่าฮ้ายคักบ่ ฮ้ายคักเด้อสัดหนิ เสียเนี้ย ฮ้ายคัก
มันกินเนี้ยเป็นอาหาน กินเนี้ยเป็นอาหานเนาะ
เบิ่งลักสะนะท่าทางหลือว่าของแท้เนี้ย มันเป็นตาย้านบ่ ปัดโท เป็นตาย้านคักเด้อ เป็นตาย้านอี่หลี เสียนี้ บ่ก้าอยู่ใก้ พุใดกะบ่ก้าอยู่ใก้มันดอก เพาะว่ามันตาย้าน ตาย้านคักอี่หลี

14
อันนี้คืออี่หยัง อันนี้เป็นแมว อันนี้คือแมว
แมวมันกำลังนอนอยู่ นอนหลับ ตุ้ยพุ้นแหล้ว บ่เบิ่งหน้า บ่เบิ่งหลัง บ่เบิ่งฟ้าเบิ่งไฟอี่หยังเลย นอนอยู่โตเดียวข้อหล้อของมันนั้นหละ คือสิมีความสุขหลาย
แล้วมันนอนเฮ็ดหญัง มีคือสิเมี่ยย มันคือสิเซาเมี่ยยนั้นหละ มันกะเลยนอนเนาะ

Basic vocabulary — Page 31 — Series B, pictures 11-13: to dream, cat, fish, dog, bone, girl, school

11
นี้คืออี่หยัง อันนี้เป็นแมว แมวโตหนึ่งนั้นหละ
มันกำลังนอนหลับซ้ำแมะ กำลังนอนหลับแซบๆ อยู่พุ้นหนะ นอนโตเดียวของมันข้อหล้อนั้นหละ
หลับตา งับปากพ้อมพุ้นแหล้ว นอนหลับ อุ้ย นอนหลับแซบคักแซบแน่เนาะ
กำลังฝันพ้อมพุ้นแหล้ว มันกำลังฝันฮอดปาโตหนึ่ง
มันกำลังฝันเห็นปาโตหนึ่ง
คือแบบว่ากำลังสิหิวเข้าพอดีนั้นหละ ว่ากำลังสิคิดพ้ออยากกินเข้า กะเลยฝันเห็นฮอดปาพอดี กำลังอยากได้กินปาพุ้นหละเนาะ
แล้วความฝันเนี้ย ขั้นเฮาฝันพ้อปา เฮาสิได้กินปาอี่หลีบ่ กะบ่ ความฝันมันเป็นสิ่งที่มันจินตะนาขึ้น จินตะนากานขึ้น หลือว่ามันเป็นแค่ความคิดที่มัน ที่เฮานอนหลับ แล้วเฮาคิดขึ้นเอง หลือว่าความคิดมัน เป็นสิ่งที่มันคิดขึ้นเอง เฮาบ่สามาดเห็นโตแท้ของจิงๆ ที่เฮา ของแท้ๆ ที่เฮาฝันฮอดหลือว่าฝันเห็นได้เนาะ

12
อันนี้คืออี่หยัง กะเป็นหมาเนาะ มีหมาโตหนึ่ง หมาโตสีเทาเนาะ กำลังนอนหลับอยู่
คือสินอนหลับแซบหลับนัวคัก เหลียวเบิ่ง ฝันเห็นฮอดกะดูกพ้อม กะดูกอันบักใหญ่พุ้นแหล้ว ฝันเห็นฮอดกะดูก
แล้วหมาโตนี้กำลังฝันเห็นกะดูก มันสิได้กินกะดูกแท้ๆ บ่ กะบ่เนาะ เพาะว่ามันเป็นแค่ความฝัน มันเป็นแค่เลี่ยงที่มันสมมุดขึ้น หลือว่าเลี่ยงที่มันจินตะนาขึ้น จินตะนากานขึ้น ในความฝันของเฮาซื่อๆ เนาะ

13
อันนี้คืออี่หยัง กะมีพุหญิงพุหนึ่งเนาะ กำลังนอนหลับอยู่
นอนหลับอยู่เทิงเตียงนอนพุ้นแหล้ว ห่มผ้าพ้อม หมุนหมอนพ้อม หมอนกะสีเหลียง ผ้าห่มกะสีฟ้า กำลังนอนอยู่เทิงเตียงนอนเนาะ
กำลังฝันพ้อมพุ้นแหล้ว คือสินอนหลับแซบคัก ฝันบ่ฮู้อีโหน้อีเหน้เนาะ ฝันฮอดโลงเลียน
อาดสิว่าเขากำลังอยากไปโลงเลียนพอดี กำลังสิได้ไปโลงเลียน แล้วกะฝันฮอดบางสิ่งบางอย่างนั้น
แต่ว่าความฝันหนิ บางสิ่งเนาะ ขั้นเฮาได้พ้อใน พ้อเลี่ยงใดเลี่ยงหนึ่ง หลือว่าพ้อเลี่ยงนั้นดุๆ หลือว่าคิดฮอดเลี่ยงนั้นดุๆ หลือว่าเว้าฮอดเลี่ยงที่เลี่ยงบางเลี่ยงดุๆ เฮาอาดสิเก็บมาฝันหลือว่าเก็บมาคิดกะได้เนาะ

Basic vocabulary — page 08 — Series B, pictures 17-20: bottle, expensive/cheap, car, crab, noodle soup

17
นี้คืออี่หยัง นี้คือขวด
ขวดอี่หยัง บ่ลู้คือกัน อาดสิเป็นขวดน้ำหลือขวดเหล้ากะได้
ขวดมีจักขวด ขวดมีสองขวด
ขวดมีสีอี่หยังแน่ ขวดมีสีเหลียงกับขวดมีสีเขียว
ขวดมีลาคาแพงบ่ มีลาคาแพงอยู่ ขวดสีเหลียงมีลาคาแพงหลาย ขวดสีเขียวมีลาคาถืกหลาย
เป็นหญังขวดสีเหลียงคือลาคาแพง บ่ลู้คือกัน อาดสิขวดใหญ่ หลือลาคาแพงกะได้
เป็นหญังขวดสีเขียวคือลาคาถืก บ่ลู้คือกัน อาดสิขวดน้อย ลาคามันเลยถืกกะได้

18
นี้คืออี่หยัง นี้คือลดเก็ง
ลดเก็งมีจักคัน ลดเก็งมีสองคัน
ลดเก็งคันใหญ่บ่ คันใหญ่อยู่ ลดเก็งคันสีแดงคันใหญ่ ลดเก็งคันสีเขียวคันน้อย
ลดเก็งมีลาคาแพงบ่ แพงอยู่ ลดเก็งคันใหญ่สีแดงมีลาคาแพงหลาย แพงบักคักหนึ่ง
ลดเก็งคันน้อยสีเขียวมีลาคาถืกหลาย ถืกบักคักหนึ่ง

19
นี้คืออี่หยัง นี้คืออี่ปู
อี่ปูมันโตสีหญัง อี่ปูมันโตสีแดง
อี่ปูมันโตใหญ่บ่ โตใหญ่อยู่ อี่ปูมันโตใหญ่หน่อยหนึ่ง
อี่ปูมันอยู่ใส อี่ปูมันอยู่ในทะเลหลืออยู่ในน้ำ
อี่ปูมันตาย้านบ่ ตาย้านอยู่ แต่บ่ตาย้านหลาย
อี่ปูมันมีก้ามสองก้าม แต่ละก้ามมันอันบักใหญ่หนึ่ง
ก้ามอี่ปูมันสามาดหนีบซิ้นเฮาได้ ซิ้นกะแปว่าหนังหลือเนี้ยของเฮานั้นหละ
ขั้นมันหนีบซิ้นเฮาแล้ว มันสิเจ็บบักคักหนึ่ง เจ็บอี่หลีอี่หลอ
อี่ปูมันมีจักขา อี่ปูมันมีแปดขา ข้างละสี่ขา ขาน้อยมีหกขา แล้วกะก้ามสองขา ลวมแล้วเป็นแปดขาพอดี

20
นี้คืออี่หยัง นี้คือกวยเตียวกับอี่ปู
กวยเตียวมันลาคาแพงบ่ บ่ กวยเตียวมันลาคาบ่แพง กวยเตียวมันลาคาถืก ถืกบักคักหนึ่ง
แล้วอี่ปูมันลาคาแพงบ่ แพงอยู่ อี่ปูมันลาคาแพงหลาย แพงบักคักหนึ่ง แพงกะด้อกะเดี้ย
เป็นหญังอี่ปูมันคือแพง เพาะว่าอี่ปูมันหาญากหลาย มันต้องลงไปในทะเล แล้วกะจับมันขึ้นมา ซัวสิหาได้แต่ละโต มันหาญากหลาย มันกะเลยลาคาแพง
แล้วอี่ปูมันแซบบ่ แซบอยู่ อี่ปูมันแซบหลาย อี่ปูมันแซบบักคักหนึ่ง แต่ว่ามันลาคาแพง คนกะเลยบ่ค่อยกิน

Basic vocabulary — page 21 — Series B, pictures 06-09: beer, glass, ice, to drink, drunk

6
นี้คืออี่หยัง อันนี้คือแก้วเบีย
มีเบียอยู่ในแก้วนี้ มีเต็มแก้วเอาโลด
ขั้นกินเบียนี้ สิเฮ็ดให้เป็นหญัง สิเกิดอี่หยังขึ้น ขั้นคนกินหลายๆ หลือกินเบียเข้าไปหลายๆ มันกะสิเมา
ขั้นกินน้อยๆ มันกะบ่เมา ขั้นกินหลายคัก มันกะสิเมาคัก แล้วแต่คนที่คิดสิกิน
แล้วสีขาวๆ อยู่ในแก้ว หลืออยู่เทิงแก้วนั้น เขาเอิ้นว่าอี่หยัง เป็นฟอง มันเป็นฟองของเบีย
ขั้นเทเบียแฮง หลือเทแฮงๆ มันสิเป็นฟอง เกิดฟองจากเบียนี้หละ สิเฮ็ดให้เป็นฟอง แต่สามาดกะกินได้คือเก่า
แล้วเบียนี้ เด็กน้อยกินได้บ่ กินบ่ได้ เด็กน้อยๆ หนิกินบ่ได้ แต่ว่าขั้นเด็กน้อยที่ใหญ่พอสมควนกะกินได้ แต่ว่ากะบ่นิยมให้กิน พุใหญ่บ่อยากให้กิน แต่ว่าบางคนกะไปลักกิน หลือไปลักพ่อแม่กิน

7
เขากำลังเฮ็ดอี่หยัง เขากำลังเอาน้ำแข็ง กำลังสิเอาน้ำแข็งใส่ในแก้วเบียนั้น
เขาเอาใส่เฮ็ดหญัง ใส่ให้มันเกิดอี่หยังขึ้น เบียอันนี้อาดสิบ่เย็น อาดสิบ่มีความเย็นเลย เขากะเลยสิเอาน้ำแข็งใส่ เพื่อที่สิให้เบียแก้วนี้มันเย็น มันมีความเย็น
บางคนคิดว่า ขั้นกินเบียเย็นๆ มันกะสิแซบ ขั้นเบียมันบ่เย็น มันกะสิขม

8
เขากำลังเฮ็ดอี่หยัง เขากำลังกินอี่หยัง เขากำลังกินเบีย เขากำลังญกแก้วเบียขึ้นกิน
อยู่ข้างหน้าเขาตอนนี้มีอี่หยังแน่ กะสิมีโต่ะ แล้วกะมีขวดเบียพ้อม
เขานั่งอยู่เทิงโต่ะ เอามือวางไว้เทิงโต่ะ แล้วกะมีเบียวางอยู่เทิงโต่ะพ้อมขวดหนึ่ง
แล้วอยู่มือของเขา เขากะถือแก้วเบีย กำลังญกเบียกินพ้อม

9
เขาเป็นอี่หยัง เบิ่งซงแล้วเขาอาดสิเมา
เขากินเบียหลายๆ เขากะสิเมา เพาะว่าเบียมันเป็นแอ็นกอฮอ มันบ่ดี ขั้นกินหลายๆ มันกะสิเมา
เป็นหญังเขาคือเมา เบิ่งซงแล้วเป็นหญังเขาคือเมา เบิ่งแล้วเขากินเบียตั้งบักหลายขวด เขากินตั้งสามขวด เขาอาดสิเมา เพาะว่า เขากินเบียเข้าไปหลายๆ เขากะเลยสิเมา เบียนี้มันสิเฮ็ดให้คนเมา

Vocabulary recordings — ตำบักหุ่ง = papaya salad

บักหุ่ง

บักหุ่งหนิสิเป็นซื่อผนละไม้หลือว่าพืดชะนิดหนึ่งเนาะ ที่สามาดกินได้ หลือว่าสามาดเอามาเฮ็ดเป็นแนวกิน หลือว่ากับเข้าได้เนาะ บักหุ่งหนิ ขั้นญามมันดิบอยู่ หลือว่ามันทันได้สุกหนะสิเป็นพืดชะนิดหนึ่งเนาะ ที่เอามาเฮ็ดเป็นแนวกิน หลือว่ามาปุงอาหานได้ แต่ว่าขั้นบักหุ่งนั้นหลือว่าบักมะละกอนี้หละ ขั้นมันสุกแล้วกะสิเป็นผนละไม้ กะสามาดเอามากินแทนผนละไม้ชะนิดอย่างอื่นได้คือกันเนาะ

แต่ว่าในคิบนี้เฮาสิเว้าถึงตำบักหุ่งเนาะ ตำบักหุ่งนั้นกะสิเป็นแนวกิน ซื่อของแนวกินอย่างหนึ่งหลือว่าชะนิดหนึ่งของพากอี่สาน หลือว่าคนลาวเฮานี้สิมักกินแนวกินชะนิดนี้ กะคือตำบักหุ่งนั้นเอง หลือส้มตำเนาะ ตำบักหุ่งหนิกะเฮ็ดมาจากบักหุ่ง น่วยบักหุ่งที่เฮาเว้าก่อนหน้านั้นหละ เขาเอาบักหุ่งนั้นมาฝานๆ หลือว่าเอามาเฮ็ดเป็นตำบักหุ่งนั้นเอง

ตำบักหุ่งหนิกะสิเป็นแนวกินขึ้นซื่อของคนอี่สาน หลือว่าคนอี่สานซู่พุซู่คนนี้สิมักกินตำบักหุ่งหลือว่าเอาตำบักหุ่งนี้มากินเป็นแนวกินหลือว่ามากินกับเข้านั้นเอง แล้วตำบักหุ่งหนิกะเป็นแนวกินชะนิดหนึ่งที่โด่งดังหลือว่าคนซู่พุซู่คนสิฮู้จัก บ่ว่าคนในปะเทดไทยซู่พากซู่มุมซู่แกของปะเทดนี้หลือว่าต่างปะเทดนั้นเอง คนต่างปะเทดกะสิฮู้จักตำบักหุ่งนี้คือกันเนาะ

ขั้นตอนในกานเฮ็ดตำบักหุ่งหนิกะสิหญุ้งญากหลายเติบ หลือว่าเฮ็ดญากพอสมควนเนาะ เพาะว่ามันต้องใส่หลายสิ่งหลายอย่าง กะสิมีบักพิกบักพายเนาะ เทิงปาแดก หลือว่าผงชูลด บักเขียเคีย บักนาว น้ำปา ใส่หลายสิ่งหลายอย่างที่คนสิเฮ็ดสิตำบักหุ่งนั้น ว่าแต่สิใส่อี่หยัง ว่าแต่ใส่แล้วมันแซบกะใส่ลงไป

แล้วอี่หยังที่สามาดกินกับตำบักหุ่งนี้ได้กะมีหลายสิ่งหลายอย่างแล้วที่สามาดกินกับตำบักหุ่งนี้ได้ บางคนกะเอาผัก ผักกาดขาว ผักบุ้ง ถั่วงอก อี่หยังกะกินได้เบิด ว่าแต่มันกินกับตำบักหุ่งนี้ได้ บางคนลุ้นใหม่ หลือว่าเด็กน้อยลุ้นใหม่อยากให้มันแซบขึ้นหลือว่าเปี่ยนลูบแบบขึ้น กะเอาขะหนมมากินกับตำบักหุ่ง หลือว่าลูกซิ้น เอาอี่หยังกะได้ ที่มากินกับตำบักหุ่งแล้วมันแซบขึ้น หลือว่าเปี่ยนลดซาดขึ้นไป คนเฮากะสิเปี่ยนไปเลี้ยยๆ เนาะ

Basic vocabulary — Page 32 — Series B, pictures 11-13: garlic, to peel, to cut/slice

11
อันนี้คืออี่หยัง อันนี้เป็นกะเทียม
กะเทียมหัวหนึ่ง
กะเทียมนี้มันเป็นอี่หยัง มันกะเป็นพืดอย่างหนึ่งเนาะ เป็นแนวปุง ปุงอาหาน ให้มันมีลดซาด หลือว่าให้มันมีกิ่นอีกแบบหนึ่ง แล้วแต่คนมัก บางคนกะบ่มัก บางคนกะมักเนาะ มันสิมีลดแซบๆ เผ็ดๆ จักหน่อยหนึ่งเนาะ กะเทียมเนี้ย เอาไปไว้ไปปุงแนวกินเนาะ
ในกะเทียมหัวหนึ่งเนี้ย มันกะสิมีแย้กออกไป เป็นกีบๆ เนาะ
ในหัวหนึ่งกะสิมีหลายกีบ ลังอันกะมีเจ็ด แปดกีบ ลังอันกะเป็นสิบกีบ
แล้วเฮากะเอาไปปุงอาหาน บางเที่ยกะใส่เป็น ใส่เที่ยละกีบ สองกีบ สามกีบกะได้ บางเที่ยกะใส่แต่ละหัวกะได้ ขั้นปะลิมานแนวกินมันหลายเนาะ
แล้วอันขาวๆ อยู่ขอบๆ มันเนี้ยเป็นอี่หยัง อันนี้อาดสิเป็นแบบว่า เป็นเปียกมันกะได้ หลือว่าเป็น บ่แน่ใจ กะอาดสิเป็นเปียกมัน
แต่ว่าอันขาวๆ เนี้ยกินบ่ได้เนาะ ก่อนเฮาสิเฮ็ดแนวกิน เฮากะต้องแกะออกก่อน แกะเปียกมันให้แกะอันสีขาวๆ คาบมันเนี้ย แกะออกก่อน แล้วเฮากะใส่อันข้างในมันที่มันเป็นเนี้ยเหลียงๆ หลือว่าเป็นในมันหละเนาะ แล้วกะไปปุงแนวกิน

12
เขากำลังเฮ็ดหญัง กะมีคนคนหนึ่ง เขากำลังแกะ แกะเปียก หลือว่าแกะคาบกะเทียมเนาะ
เป็นหญังเขาต้องแกะเปียกมันออก หลือว่าแกะอันขาวๆ นั้นออก เพื่อว่าอันนั้นมันกินบ่ได้ กะต้องแกะออก หลือว่ามัน เขาบ่พากันกินเนาะ เขากะเลยแกะออกไป แล้วกะสิใส่แต่ในมัน หลือว่าน่วยอันที่มันเป็นกีบเหลียงๆ นั้น เอาไปกินส่ำนั้นเนาะ

13
เขากำลังเฮ็ดหญัง กะเขากำลังหั่นกะเทียมเนาะ หั่นกะเทียมเป็นซิ้นน้อยๆ เป็นซิ้นน้อยๆ
เขากะเอามากีบเดียว เอามากีบเดียว แล้วกะหั่นๆๆๆๆ ให้มันเป็นซิ้นน้อยๆ
เขาอาดสิบ่อยากตำ บางคนกะเอาไปตำกะได้ บางคนกะเอามาหั่น มาสับๆๆๆ กะได้ แล้วแต่สิ่งที่เขาถะหนัด หลือว่าสิ่งที่เขาต้องกาน ที่สิเอาไปเฮ็ดเนาะ

Basic vocabulary — page 18 — Series B, pictures 04-07: coconut, to cut, drinking straw, to drink

4
นี้คืออี่หยัง นี้คือบักพ้าว อันนี้เป็นบักพ้าว
บักพ้าวสองน่วย วางเฮียงกันอยู่ข้างๆ กันนั้นหละ มีสองน่วยข้อหล้อ
บักพ้าวสองน่วยนี้เป็นบักพ้าวอี่หยัง เป็นบักพ้าวคือกันบ่ บ่ เป็นบักพ้าวคนละอย่าง
อันหนึ่งเป็นบักพ้าวอ่อน วางอยู่ฝั่งซ้ายมือหนะเป็นบักพ้าวอ่อน
วางอยู่ฝั่งขวามือหนะเป็นบักพ้าวแก่ เป็นน่วยสีน้ำตาน อาดสิแก่กะได้ มันเถ้าแล้วนั้นหละความหมาย
บักพ้าวแต่ละอย่างกะแตกต่างกันไป บักพ้าวอ่อน เนี้ยมันกะอ่อน บักพ้าวแก่ เนี้ยมันกะแข็ง นวนมันนั้นหละ นวนมันกะแข็ง บักพ้าวอ่อนนวนมันกะอ่อน
บักพ้าวอ่อนกะเอาไว้ถ้าเฮ็ดขะหนม หลือเอาไว้ถ้ากินเหล้น บักพ้าวแก่หลือบักพ้าวเถ้านั้นหละ กะเอาไว้ถ้าแนวกิน เอาไว้ถ้าเฮ็ดของหวาน หลือเอาไว้เฮ็ดอี่หยังอย่างอื่นกะได้
แต่ละอย่างกะมีปะโยดหลายอย่าง แต่ละปะโยดกะแตกต่างกันออกไป

5
เขากำลังเฮ็ดหญัง เขากำลังผ่าบักพ้าว
มีคนกำลังผ่าบักพ้าวอยู่
เขาผ่าบักพ้าวจั่งใด เขาเอาอี่หยังผ่าบักพ้าว เขาใซ้อี่หยังผ่าบักพ้าว เขาใซ้มีดผ่าบักพ้าว เขากำลังปอก กำลังผ่าบักพ้าวอยู่
เขาใซ้มือของเขาจับบักพ้าวข้างหนึ่ง อีกข้างหนึ่งเขาจับมีด แล้วกะผ่าบักพ้าว หลือปอกเปียกบักพ้าวนั้นหละ
เบิ่งซงแล้วเป็นตาญากบ่ เบิ่งซงแล้วเป็นตาผ่าญากและปอกญากบ่ กะญากอยู่ ขั้นคนบ่เคยเฮ็ดกะเฮ็ดบ่เป็น ขั้นคนเคยเฮ็ดกะเฮ็ดเป็น มันกะญากพอสมควนอยู่ แต่กะบ่ญากหลาย ขั้นคนอยากเฮ็ดกะเฮ็ดได้ ขั้นคนบ่อยากเฮ็ดกะเฮ็ดบ่ได้

6
นี้คืออี่หยัง นี้คือหลอด หลอดไว้ถ้าดูดน้ำ หลือดูดอี่หยังกะได้ที่มันเป็นน้ำ
หลอดอันนี้เฮ็ดจากอี่หยัง หลอดนี้เฮ็ดจากพะสะติก
เฮ็ดจากพะสะติก มันเฮ็ดจากเหล็กเฮ็ดจากไม้บ่ได้
หลอดอันนี้กะมีปะโยดอย่างเดียวนั้นหละ เอาไว้ถ้าดูดน้ำ ดูดน้ำโค่ก ดูดน้ำส้ม ดูดกาแฟ หลือดูดน้ำเป่านี้หละ
ส่วนมากพุใดสิใซ้หลอดนี้ กะมีหลายคน เพาะว่ามันสิสะอาดกว่ากัน ขั้นไปกินล้านอาหาน เขากะสิใซ้หลอดดูด เพาะว่าปากเฮาจั่งบ่ได้ติดกับแก้ว เฮากะใซ้แค่หลอดนี้ ดูดกินน้ำในแก้วนั้นกะพอ แล้วมันกะสิสะอาดกว่ากัน

7
เขากำลังเฮ็ดหญัง เขากำลังกินบักพ้าว
เขากำลังดูดน้ำบักพ้าวอยู่
มีพุหญิงพุหนึ่งนั้นหละ เขากำลังยืนจับบักพ้าว กำลังดูดกินน้ำบักพ้าวอยู่
เขาใซ้อี่หยังดูดน้ำบักพ้าว เขาใซ้หลอดดูดน้ำบักพ้าว เอาหลอดเสียบเข้าไปในบักพ้าว แล้วกะดูดกินน้ำมัน
น้ำบักพ้าวมันแซบบ่ กะแซบอยู่ แซบหลาย แซบบักคักหนึ่ง เพาะว่าคนมักกินน้ำบักพ้าว แต่ว่าขั้นน้ำบักพ้าวอ่อน มันกะสิแซบ แต่ว่าขั้นน้ำบักพ้าวแก่ หลือบักพ้าวเถ้า มันกะสิบ่แซบ

Basic vocabulary — Page 01 — Series B, pictures 04-10: cat, to sit, to jump, chair, to sleep, to eat, fish, to walk, to look at, bird

4
นี้คืออี่หยัง อันนี้เป็นแมว แมวโตหนึ่ง ตาฮักๆ
แล้วแมวมันเฮ็ดอี่หยังอยู่ มันกำลังนั่งอยู่ มันนั่งอยู่สะหนามหญ้า มันนั่งอยู่โตเดียวข้อหล้อ
มันมีหางของมันพ้อม หางของมันญาวๆ ญาวบักคักหนึ่ง

5
แมวโตนี้มันกำลังสิเฮ็ดหญัง แมวโตนี้มันกำลังสิกะโดด มันสิกะโดดขึ้นโต่ะ จักว่ามันสิกะโดดไปเฮ็ดหญัง
มันกะโดดจักโต มันกะโดดโตเดียว โตเดียวข้อหล้อของมันนั้นหละ กำลังญกขาหน้า กำลังญกขาหน้าสิกะโดดขึ้นไปเทิงโต่ะ มันอาดสิกะโดดขึ้นไปนอน หลืออาดสิกะโดดขึ้นไปเหล้นกะได้
แล้วโต่ะที่มันสิกะโดดขึ้นนั้นสูงบ่ บ่ บ่สูงปานใดดอก ขั้นมันสูงมันกะสิกะโดดขึ้นบ่ได้ ขั้นมันสูงหลายมันกะบ่สามาดกะโดดขึ้นไปได้

6
แมวมันกำลังเฮ็ดหญังอยู่ แมวมันกำลังนอนหลับอยู่ นอนเป็นตามีแฮงๆ มันนอนอยู่เทิงโต่ะนั้นหละ โต่ะที่มันหัวแต่กะโดดขึ้นไปนั้นหละ
โต่ะอันนี้กะพอดีๆ พอดีกับโตมันเอาโลด มันกะได้นอนพอดี โตมันกะส่ำโตพอดี นอนเป็นตามีแฮงหลาย กำลังกนก้อกๆ อยู่พุ้นหนะ

7
แมวมันกำลังเฮ็ดหญัง มันกำลังกะโดด มันกะโดดลงพื้น
วั่งหั้นมันอยู่เทิงโต่ะ มันกะเลยสิกะโดดลงพื้น หลือว่ากะโดดลงจากโต่ะ
แล้วมันกะโดดเล็วบ่ หลือว่ากะโดดไวบ่ จักคือกัน กะสิไวอยู่นั้นหละ มันอาดสิฟ้าวกะโดดลงกะได้ จักว่ามันสิไปใส มันอาดสิบ่อยากอยู่เทิงโต่ะนี้แล้วกะได้ มันกะเลยสิกะโดดลงไป

8
แมวมันเฮ็ดหญังอยู่ มันกำลังกินปา มันกำลังกัดกินปาอยู่
มือของมันเทิงสองข้างกำลังจับปาอยู่ แล้วปากของมันกะกัดปาขึ้นมากิน เป็นตาแซบหลาย คือสิแซบคัก
ปากะโตบักใหญ่หนึ่ง มันคือสิมีความสุขหลายที่มันได้กินปาโตนี้

9
แมวโตนี้มันสิญ่างไปใส จักคือกัน จักว่ามันสิญ่างไปใส
เห็นแต่มันญ่างไปข้างหน้าอยู่ จักว่ามันสิญ่างไปใส จักสิญ่างไปทางพุ้น หลือญ่างไปทางพี้ เฮากะบ่ฮู้คือกันเนาะ
แมวโตนี้เบิ่งซงแล้วเป็นตามีความสุขบ่ หางมันกะซี้โก่งโด่งอยู่พุ้นหนะ เป็นตามีความสุขหลาย

10
แมวมันกำลังเฮ็ดอี่หยัง มันกำลังแนมขึ้นฟ้าพุ้นหนะ
แล้วมันแนมไปเฮ็ดหญัง มันแนมเบิ่งนก มันอาดสิเห็นนกโตหนึ่งอยู่เทิงฟ้า มันกะเลยแนมขึ้นไปกะได้ มันอาดสิอยากกินนกโตนั้นกะได้ มันกะเลยแนมขึ้นไป
นกโตนั้นกะกำลังบินอยู่เทิงฟ้าพุ้นหนะ แมวโตนี้กะได้แต่แนม แล้วกะแนมเบิ่งซื่อๆ เฮ็ดหญังกะบ่ได้ กะได้แต่แนม

Basic vocabulary — page 19 — Series B, pictures 18-20: no, watermelon, soft drink, to play ball

18
พุหญิงเขากำลังเฮ็ดหญัง เขากำลังซวนพุซายกินบักแตงโมอยู่
แล้วเขาซวนพุซายว่าจั่งใด อันนี้กะบ่ฮู้คือกัน จักว่าเขาซวนพุซายจั่งใด เขาอาดสิซวนว่า กินบักแตงโมบ่ กินบักแตงโมนำเฮาบ่
แล้วพุซายตอบว่าจั่งใด พอพุซายได้ญินนั้น อันนี้กะบ่ฮู้คือกัน เห็นแต่เคี้ยงหมายกากะบาด เขาอาดสิบ่กิน หลืออาดสิส่ายหน้า เขาอาดสิตอบว่า บ่ บ่กินดอก บ่เป็นหญัง เขากะอาดสิเว้าปะมานนี้
อันนี้เป็นผนละไม้อี่หยังเกาะ ที่เขาซวนพุซายกิน เป็นบักแตงโม เป็นแตงโม
แตงโมมีลดซาดจั่งใด แตงโมกะมีลดซาดหวาน หวานคัก แต่ว่าบ่หวานหลายดอก แต่ว่ากะแซบ คนส่วนมากสิมักกินแตงโม
แตงโมมีในบ่ กะมีอยู่ แตงโมมีในพ้อม มันมีในหลาย แตงโมมันมีในอยู่ในน่วยของมันนั้นหละ
เป็นหญังพุซายคนนี้เขาคือบ่กินแตงโมนำพุหญิง เขาอาดสิบ่หิว หลืออาดสิบ่อยาก เขากะเลยบ่กิน เขาอาดสิบ่มักกะได้ เขากะเลยปะติเสด เขากะเลยบ่เอา เขากะเลยบ่กินนำพุหญิงคนนี้

19
นี้คืออี่หยัง อันนี้กะเป็นพุหญิงคนเก่านั้นหละ เขากำลังซวนพุซายกินน้ำอัดลมอยู่
เป็นหญังเขาคือซวนพุซายกินน้ำอัดลมขวดนี้ อันนี้กะบ่ฮู้คือกัน เขาอาดสิมัก หลืออยากให้คนนี้กินนำกะได้ เขากะเลยซวนกิน
เขากะอาดสิซวนว่า กินน้ำอัดลมนำเฮาบ่ กินน้ำอันนี้นำเฮาบ่ เขากะอาดสิซวนปะมานนี้
น้ำที่เขาซวน หลือสิให้พุซายกินนี้ เป็นน้ำอี่หยังเกาะ กะเป็นน้ำอัดลม เป็นน้ำกะปอง เป็นน้ำกะปองอัดลมนี้หละ
น้ำกะปองอัดลมนี้มีลดซาดจั่งใด น้ำกะปองอัดลมนี้กะมีลดซาดหวาน หลือลดซาดซ้า เป็นน้ำที่ซ้า แล้วกะเฮ็ดให้สดซื้นขั้นเฮากินแล้ว
เป็นหญังพุซายคนนี้เขาคือบ่กินน้ำนำพุหญิงคนนี้ เขากะอาดสิบ่มัก หลืออาดสิบ่มักกินน้ำอัดลมอันนี้ เขากะเลยบ่กิน เขากะเลยปะติเสดกะได้

20
เขากำลังเฮ็ดหญังอยู่ กะมีพุหญิงคนหนึ่ง เขากำลังซวนพุซายเหล้นลูกบอนอยู่
เขาอาดสิซวนไปว่า เหล้นลูกบอนบ่ เหล้นลูกบอนนำเฮาบ่ มาเหล้นลูกบอนนำเฮาบ่
ของที่เขาถืออยู่หั้นเป็นลูกบอนหลือเป็นอี่หยังเกาะ กะเป็นลูกบอนนั้นหละ เป็นลูกบอนลูกวงกม น่วยบ่ใหญ่หลาย น่วยพอดี เขากำลังจับอยู่
ลูกบอนอันนี้ใซ้เหล้นจั่งใด ลูกบอนอันนี้กะใซ้เหล้น เอาไว้ถ้าเตะ เอาไว้ถ้าตี เอาไว้ถ้าโญน เอาไว้ถ้าเหล้นจั่งใดกะได้ แล้วแต่เฮาสามาดสิเหล้น
เป็นหญังพุซายคนนี้คือบ่เหล้นลูกบอนกับพุหญิงคนนี้ เขากะอาดสิบ่มัก หลือเหล้นบ่เป็น หลือบ่อยากเหล้นกะได้ หลือบ่มีอาลมเหล้นกะได้ เขากะเลยบ่เหล้น เขากะเลยปะติเสดพุหญิงคนนี้ไป

Basic vocabulary — page 10 — Series B, pictures 01-05: noodle soup, to order, to eat, money, to pay

1
นี้คืออี่หยัง นี้คือกวยเตียว
บางคนสิมักกินกวยเตียวแทนเข้า
กวยเตียวเส้นอี่หยัง กวยเตียวเส้นน้อยๆ เส้นสีเหลียง
กวยเตียวอยู่ในอี่หยัง กวยเตียวอยู่ในถ้วย อยู่ในถ้วยมีกวยเตียวบักหลายหนึ่ง หลายบักคักหนึ่ง
มีน้ำกวยเตียวหลายบ่ หลายอยู่ มีหลายบักคักหนึ่ง เกียบเต็มถ้วยเอาโลด
ถ้วยกวยเตียวใบใหญ่บ่ บ่ ถ้วยกวยเตียวใบบ่ใหญ่ ถ้วยกวยเตียวใบพอดี
ถ้วยสีอี่หยัง ถ้วยใบสีฟ้า
กวยเตียวแซบบ่ บ่ลู้คือกันจักแซบหลือบ่แซบ บ่ได้กินเบิ่ง เบิ่งซงแล้ว เป็นตาแซบอยู่

2
เขากำลังเฮ็ดหญัง เขากำลังสั่งกวยเตียว
พุซายคนนี้ เขาอาดสิหิวเข้า เขากะเลยสั่งกวยเตียวเพื่อที่สิเอามากิน เพาะว่าเขาหิวเข้า
พุซายคนนี้ เขามาพุเดียว เขานั่งอยู่พุเดียว เขาบ่มีหมู่เลย เขาอยู่พุเดียว
เขานั่งอยู่ใส เขานั่งอยู่เทิงโต่ะ นั่งอยู่เทิงโต่ะในล้านอาหาน ในล้านแนวกิน
เขาญกมือขึ้นพ้อม เขาญกมือขึ้นเพื่อที่สิสั่งแนวกิน มือข้างหนึ่งเขาวางอยู่เทิงโต่ะ
ผ้าปูโต่ะสีเหลียงแม่นบ่ แม่น ผ้าปูโต่ะสีเหลียง ผ้าปูโต่ะวางอยู่เทิงโต่ะ

3
เขากำลังเฮ็ดหญัง เขากำลังกินเข้า
เขากินกับกวยเตียวแม่นบ่ แม่น เขากินกับกวยเตียว
เขากินแซบบ่ บ่ลู้คือกันจักแซบหลือบ่แซบ
ในมือของเขาใส่อี่หยังอยู่ ใส่ตะเกียบแม่นบ่ แม่น ในมือของเขาข้างหนึ่งใส่ตะเกียบอยู่ ในมือของเขาอีกข้างหนึ่งใส่ซ้อน
เขาใส่เกิบมาบ่ ใส่มาอยู่ เขาใส่เกิบคู่สีขาว เป็นเกิบโบกคู่สีขาว เขาใส่มาสองกิ่ง
ผมของเขาสีอี่หยัง ผมของเขาสีดำ ผมบ่ญาวหลาย ผมสั้นๆ

4
นี้คืออี่หยัง นี้คือเงิน
เงินคืออี่หยัง เงินสามาดซื้อได้ทุกอย่าง สามาดใซ้จ่ายได้ทุกอย่าง
ขั้นบ่มีเงิน กะซื้อของบ่ได้
เงินอันนี้เป็นแบ้งหลือเป็นเหลียน เงินอันนี้เป็นแบ้ง บ่แม่นเหลียน
เงินเหลียนกะสิเป็นเหล็ก หลือเป็นเหลียน ขั้นเงินแบ้งกะเป็นกะดาด
เงินแบ้งมันขาดได้บ่ ขาดได้อยู่ เพาะว่าเงินแบ้งมันเป็นกะดาด มันสามาดขาดได้
ขั้นคนสีกเงินแบ้ง เงินแบ้งกะสิขาด บ่สามาดใซ้งานได้เลย
แล้วคนลวยมีเงินหลายบ่ มีหลายอยู่ คนลวยหลายกะมีเงินหลาย คนลวยหน้อยกะมีเงินหน้อย ขั้นคนจนกะบ่มีเงินเลย หลือมีเงินหน่อยเดียว

5
เขากินเข้าแล้วไป่ แล้วๆ เขากินเข้าแล้วๆ
เขากินเบิดบ่ เบิดอยู่ ในถ้วยบ่ญังอี่หยังเลย เขากินเบิดคักเบิดแน่ เกี้ยงมิ่นลิ่นอยู่
เขากินอิ่มบ่ อิ่มอยู่ เบิ่งซงแล้วคือสิอิ่มหลาย แนวกินอยู่ในถ้วยบ่ญังเลย บ่เหลียอี่หยังจักอย่าง
เขากินแล้วๆ เขาสิจ่ายเงินบ่ จ่ายอยู่ เขากินแล้วๆ เขากะสิเอิ้นคนมาเก็บเงิน แล้วเขากะจ่ายเงินกับคนเก็บเงิน
แนวกินที่เขากินถืกหลือแพง บ่ลู้คือกันจักถืกหลือแพง บ่ฮู้ลาคา
ขั้นเขากินถืก เขากะจ่ายถืก ขั้นเขากินแพง เขากะจ่ายแพง

Basic vocabulary — page 12 — Series B, pictures 16-20: watermelon, soft drink, yes

16
นี้คืออี่หยัง นี้คือแตงโม
แตงโมน่วยสีเขียว เนี้ยแตงโมกะเป็นสีแดง
แตงโมมีจักน่วย แตงโมมีน่วยเดียวแม่นบ่ แม่น แตงโมมีน่วยเดียว มีน่วยเดียวข้อหล้อ
เขาผ่าแตงโมน่วยนี้ไป่ ผ่าแล้ว เขาผ่าแตงโมน่วยนี้แล้ว
เขาผ่าออกเป็นซิ้นเดียวแม่นบ่ แม่น เขาผ่าออกไปแล้วซิ้นเดียว ซิ้นน้อยๆ หนึ่ง
เปียกแตงโมสีอี่หยัง เปียกแตงโมสีเขียว
แล้วเนี้ยแตงโมเป็นสีอี่หยัง เนี้ยแตงโมเป็นสีเหลียง
แตงโมมีเม็ดพ้อม เม็ดมันสีดำ เม็ดมันน้อยๆ หนึ่ง เม็ดมันเม็ดบ่ใหญ่
แตงโมลดซาดจั่งใด ลดซาดสิหวานๆ แต่หวานบ่สู้น้ำตาน กะสิหวานแบบพอดี
แล้วคนมักกินแตงโมบ่ กะมักอยู่ คนส่วนหลายสิกินแตงโมอยู่ เพาะว่าแตงโมมันแซบ ซื้อได้หลายที่ เพาะว่าล้านขายแตงโม หลือล้านขายผนละไม้ สิมีขายอยู่หลายที่หลายหม้อง

17
พุหญิงคนนี้เขากำลังเฮ็ดหญัง พุหญิงคนนี้เขากำลังสิซวนพุซายกินแตงโมบ่ เขาถามพุซายว่า กินแตงโมบ่ แล้วเขากะสิยื่นแตงโมให้พุซายกิน
มีแตงโมอยู่ในมือเขาซิ้นหนึ่ง ซิ้นบ่ใหญ่หลาย ซิ้นพอดี
แล้วพุซายได้ญินจากพุหญิงว่า กินแตงโมบ่ แล้วเขาได้ญิน เขาอาดสิตอบว่า กินอยู่คับ กินกะได้คับ เขากะเลยสิเอามือของเขาไปยื่นแตงโมจากพุหญิงคนนี้

18
นี้คืออี่หยัง นี้คือกะปอง กะปองน้ำอัดลมแม่นบ่ แม่น อันนี้เป็นกะปองน้ำอัดลม
น้ำอัดลมมันหวานบ่ หวานอยู่ น้ำอัดลมมันหวานหลาย มันเฮ็ดมาจากน้ำตาน เพาะสะนั้นแล้วมันกะต้องหวาน
กะปองน้ำอัดลมเปิดจั่งใด มันสิมีฝาเปิด หลือหม้องเปิดของมัน เปิดง่ายๆ เปิดได้บ่ญาก
น้ำอัดลมซื้อได้อยู่ใสแน่ ซื้อได้หลายหม้อง ซื้อได้หลายที่ ซื้ออยู่ในห้างกะได้ ซื้ออยู่ในตะหลาดกะได้ ซื้ออยู่ในเซเว้นกะได้
น้ำอัดลมมันแซบบ่ กะแซบอยู่ คนส่วนมากเขาสิกินน้ำอัดลม ขั้นกินไปแล้ว มันสิสดซื้น มันสิคายความฮ้อนได้ดี

19
พุหญิงคนนี้ เขากำลังซวนพุซายกินน้ำอัดลมบ่ เขาถามพุซายว่า กินน้ำอัดลมบ่
เขาถือน้ำอัดลมกะปองหนึ่ง กะปองสีแดง กะปองบ่ใหญ่หลาย แล้วเขากะซวนพุซายกิน
พุซายได้ญินจากพุหญิงว่า กินน้ำอัดลมบ่ พอเขาได้ญิน เขากะเลยตอบไปว่า กินอยู่คับ กินกะได้คับ เขากะเลยสิเอามือของเขาไปยื่นน้ำอัดลมจากพุหญิงนี้

20
เขากำลังเฮ็ดหญัง พุหญิงคนนี้เขากำลังถือบ่าดอยู่ หลือถือลูกบอนอยู่
เขากำลังสิซวนพุซายคนนี้ อาดสิถามว่า เหล้นบ่าดบ่ เหล้นบ่าดนำกันบ่
แล้วพุซายได้ญิน พุซายอาดสิตอบไปว่า เหล้นอยู่คับ เหล้นกะได้คับ
ขั้นเขาเหล้นนำกันแล้ว มันสิม่วนบ่ กะอาดสิม่วนอยู่ กะอาดสิม่วนบักคักหนึ่ง เพาะว่าได้เหล้นนำกัน มันได้มีหมู่
พุซายได้ถือบ่าดบ่ บ่ พุซายบ่ได้ถือบ่าด พุหญิงเป็นคนถือบ่าด ถือบ่าดลูกสีส้ม มีสีขาวปนพ้อม ลูกบ่ใหญ่หลาย
พุหญิงใส่กะโปงสีอี่หยัง พุหญิงใส่กะโปงสีขาวแม่นบ่ แม่น พุหญิงใส่กะโปงสีขาว กะโปงบ่ญาว กะโปงสั้นๆ หนึ่ง
แล้วพุซายใส่กางเกงสีหญัง พุซายใส่กางเกงสีเขียว เป็นกางเกงขาญาว

Basic vocabulary — Page 01 — Series B, pictures 11-17: bowl, rice, to pour, water, to wash/clean, to stack up, to fall, to break

11
นี้คืออี่หยัง อันนี้เป็นถ้วย
ถ้วยเป่า บ่มีอี่หยังอยู่ในถ้วยเลย
ถ้วย[อัน]ใบใหญ่บ่ ใหญ่อยู่ ถ้วยใบนี้มันกะใบใหญ่อยู่ แต่บ่ใหญ่หลาย
ถ้วยอันนี้เอาไว้เฮ็ดหญัง ถ้วยอันนี้ใซ้ปะโยดได้หลายอย่าง เอาใส่แนวกินกะได้ ใส่อี่หยังกะได้ที่เฮาสิเอามากิน ใส่เข้ากะได้ ใส่อันนั้นอันนี้ ใส่ได้เบิดซู่สิ่งซู่อย่าง ว่าแต่เฮาอยากเอาอี่หยังลงไปในถ้วยนี้ หลือว่าใส่ลงไปในถ้วยนี้

12
อันนี้คือหญัง อันนี้กะเป็นถ้วยคือเก่านั้นหละ อันนี้กะเป็นถ้วย
แต่ว่าถ้วยใบนี้มีเข้าพ้อม มีเข้าบักหลายเติบหนึ่งอยู่ในถ้วยนี้ กำลังฮ้อนอยู่
มีควนลอยอ่มๆ ขึ้นไปพ้อม เข้าอันนี้คือสิฮ้อนคัก
เข้าอันนี้กะสิเข้าจุ่นพู่นอยู่ เป็นตาแซบๆ เป็นตากินกับแนวกินแซบคัก

13
เขากำลังเฮ็ดหญัง เขากำลังเทน้ำลงไปในถ้วย
แล้วเขาเทน้ำลงไปในถ้วยเฮ็ดหญัง จักคือกัน เขาอาดสิเอาไปกิน หลืออาดสิเอาไปเฮ็ดสิ่งต่างๆ กะได้ เขากะเลยเทน้ำลงไปในถ้วย
เขาเทน้ำใส่ถ้วยหลายบ่ กะหลายอยู่ หลายเติบ เกียบเต็มถ้วยเอาโลด เทโจ้กๆ ลงเอาโลด บ่เบิ่งว่ามันสิเต็มหลือบ่เต็ม

14
เขากำลังเฮ็ดหญัง เขากำลังล้างถ้วย เขากำลังล้างถ้วยอยู่
เขาล้างถ้วยเฮ็ดหญัง มันอาดสิสกกะปก หลือว่าบ่สะอาด เขากะเลยล้างถ้วย เขาอาดสิเอาถ้วยนี้ไปเฮ็ดแนวกิน หลือว่าเอาไปใส่แนวกินกะได้
เขาใซ้มือของเขาสองข้างล้างถ้วย มือหนึ่งกะจับฟองน้ำ แล้วกะถูๆๆ ฮุๆ อยู่ในถ้วยนั้น อีกมือหนึ่งกะจับถ้วย ไว้บ่ให้มันดิ้น หลือว่าบ่ให้มันหลุดมือไปใส แล้วเขากะล้างๆๆ เพื่อที่สิให้ถ้วยนี้มันสะอาด หลือว่าเกี้ยงนั้นหละ

15
เขากำลังเฮ็ดหญัง เขากำลังวางถ้วยซ้อนกัน
จักว่าเขาเอาถ้วยอันนี้มาแต่ใส หลายกะด้อกะเดี้ย บักหลายใบเอาโลด เทิงมีสีแดง สีฟ้า สีเหลียง สีเขียว มีเบิดซู่สีเอาโลด บักหลายใบหนึ่ง ถ้วยนี้กะเดย
เขาเอาถ้วยมาวางซ้อนกันเฮ็ดหญัง จักคือกัน เขาอาดสิเอามาเก็บให้มันเป็นละเบียบ ให้มันสะอาดหูสะอาดตา หลือว่าให้มันเป็นที่เป็นทางกะได้ หลือว่าเขาอาดสิล้างแล้ว เขากะมาวางซ้อนกันไว้ซื่อๆ

16
นี้คืออี่หยัง อันนี้กะคือถ้วย มันกำลังตก
จักว่ามันตกมาแต่ใส มันกำลังลอยตกลงมา กำลังหล่นตกลงมาพุ้นหนะ
มันตกลงมาจักใบ มันตกลงมาใบเดียว ใบเดียวข้อหล้อ กำลังหล่นตกลงมา
ขั้นมันตกแล้วมันสิแตกบ่ จักคือกัน กะอาดสิแตก
ขั้นมันเป็นแก้ว มันตกลงมาแล้ว มันกะสิแตก แต่ว่าขั้นมันเป็นพะสะติก หลือว่าเป็นที่แนวมันแตกบ่ได้ มันกะสิบ่แตก

17
อันนี้มันคืออี่หยัง อันนี้กะคือเสดแก้ว มันอาดสิเป็นถ้วย หลือว่าเป็นแก้วที่มันตกลงมา ตกลงมาจากหม้องสูงๆ หลือว่าตกลงมาจากโต่ะ ตกลงมาพื้นแล้วมันกะสิแตก เพาะว่ามันเป็นแก้ว หลือว่าเป็นกะจก
เหลียวเบิ่งมันแตกแล้ว มันกองเอ่าะเญาะอยู่นำพื้นพุ้นหนะ ขั้นพุใดไปเหยียบ กะสิเฮ็ดให้เป็นบาดหลือเป็นแผ เพาะว่าเสดแก้วนี้มันคมหลาย เสดอันนี้มันคมคักอี่หลี

Basic vocabulary — page 09 — Series B, pictures 01-05: dog, bone, cat, to chase, to run

1
นี้คืออี่หยัง นี้คือหมา
หมามันนั่งอยู่ใส บ่ลู้คือกันจักว่ามันนั่งอยู่ใส จักว่ามันเป็นหมาพุใด จักว่ามันมาแต่ใส
หมามันได้เป็นสัดบ่ เป็นอยู่ หมามันเป็นสัด หมามันเป็นสัดเลี้ยง คนมักเอามันมาเลี้ยงไว้บ้าน เอามาเฝ้าบ้าน
ขนของหมามันสีอี่หยัง ขนของหมามันสีเทา สีเทางามๆ งามหลาย งามบักคักหนึ่ง
หมามันตาฮักบ่ ตาฮักอยู่ หมามันตาฮักหลาย หมามันตาฮักบักคักหนึ่ง
หมามันสั่นหางของมันบ่ สั่นอยู่ หมามันสั่นหางของมันพ้อม
หางของมันญาวๆ ปายหางของมันแหลมๆ
เป็นหญังมันคือสั่นหางของมัน บ่ลู้คือกันจักว่ามันเป็นหญัง มันอาดสิดีใจกะได้ มันกะเลยสั่นหางของมัน
หมามันแลบลิ้นออกมาบ่ แลบลิ้นอยู่ หมามันแลบลิ้นออกมาพ้อม จักมันแลบลิ้นออกมาเฮ็ดหญัง
หมามันแลบลิ้นออกมาหลายบ่ หลายบ่

2
นี้คืออี่หยัง นี้คือกะดูก กะดูกอันบักใหญ่หนึ่ง กะดูกสีขาวจุ่นพู่นอยู่
กะดูกมันแข็งบ่ แข็งอยู่ กะดูกมันแข็งหลาย กะดูกมันแข็งบักคักหนึ่ง
ในล้างกายของคนมีกะดูกบ่ มีอยู่ ในล้างกายของคนมีกะดูก หลายหม้องหลายส่วนในล้างกายของเฮา
แล้วสัดมีกะดูกบ่ มีอยู่ สัดกะมีกะดูกคือกัน สัดกะมีกะดูกหลายหม้องหลายส่วนคือกันกับคน
กะดูกมันหักได้บ่ หักได้อยู่ กะดูกมันหักได้อยู่
ขั้นกะดูกเฮาหัก เฮากะสิเจ็บ ขั้นกะดูกแขนเฮาหัก เฮากะสิเจ็บแขน ขั้นกะดูกขาเฮาหัก เฮากะสิเจ็บขา เพาะสะนั้นแล้วอย่าให้กะดูกหัก
ขั้นกะดูกเฮาหัก เฮากะสิเจ็บ เจ็บหลาย เจ็บบักคักหนึ่ง

3
หมามันกำลังเฮ็ดหญัง หมามันกำลังกินกะดูก หมามันกำลังแห้นกะดูกอยู่
หมามันหิวบ่ บ่ลู้คือกัน ซงคือมันคือสิหิวหลาย มันฟ้าวแห้นกะดูก มันฟ้าวแห้นกินกะดูก
เบิ่งซงแล้วมันคือสิหิวหลาย มันคือสิแซบบักคักหนึ่ง
หมามันมีแข้วบ่ มีอยู่ หมามันมีแข้ว
มันเอาแข้วไว้ถ้าแห้นกะดูก หลือเอาไว้ถ้ากัด หลือเอาไว้ถ้ากินเข้า หลือเอาไว้ถ้ากัดกินแนวกิน
แข้วหมามันแหลมบ่ แหลมอยู่ แข้วหมามันแหลมหลาย แหลมบักคักหนึ่ง แข้วหมามันคมพ้อม คมหลาย คมบักคักคือกัน
แข้วหมามันคม คมหลาย คมหลายกะด้อกะเดี้ย

4
หมามันกำลังเฮ็ดหญัง หมามันกำลังเห่า หมามันเห่าให้แมว หมามันเห่าใส่แมว
แมวมันย้านบ่ ย้านอยู่ แมวมันย้านหลาย แมวมันย้านบักคักหนึ่ง
คือลู้ว่าแมวมันย้าน กะลู้ เพาะว่าเห็นแมวมันขนขิ้นลุก กะเลยลู้ว่าแมวมันย้านหมา คือสิย้านหลาย
เป็นหญังหมาคือเห่าให้แมว บ่ลู้คือกัน ซงคือมันสิบ่มักกัน มันสิบ่ถืกกันกะได้ อาดสิญาดแนวกินกันกะได้
ขนแมวมันสีอี่หยัง ขนแมวมันสีเหลียงแม่นบ่ แม่นอยู่ ขนแมวมันสีเหลียง สีเหลียงอ่ามล่ามอยู่

5
หมามันกำลังเฮ็ดอี่หยัง หมามันกำลังแล่นไล่แมว มันฟ้าวแล่นไล่กันวะสั้น
หมามันแล่นเล็วบ่ เล็วอยู่ หมามันฟ้าวแล่นไล่แมว
แล้วแมวแล่นเล็วบ่ เล็วอยู่ แมวมันแล่นเล็วหลาย เล็วบักคักหนึ่ง ฟ้าวแล่นวะสั้น
แมวกับหมามันแล่นซ้าบ่ บ่ แมวกับหมามันแล่นบ่ซ้า มันฟ้าวแล่นวะสั้น แมวกะฟ้าวแล่นหนีหมา หมากะฟ้าวแล่นไล่แมว
หมามันจับแมวได้บ่ บ่ หมามันจับแมวทันได้ได้ แมวฟ้าวแล่นหนีก่อน
หมามันกัดแมวได้บ่ บ่ หมามันกัดแมวทันได้ได้ เพาะว่าหมามันแล่นบ่ฮอดแมว หมาแล่นบ่ทันแมว
แมวมันย้านหมาบ่ แมวมันย้านหมาอยู่ แมวมันย้านหมาหลาย คือสิย้านหลาย