Translations are evolving and should be taken as indicative only! For a guide to the tones and the spelling system used to write this variety of Isaan (Khon Kaen), see the "tone guide" on the overview page.

Tones: M = mid, HR = high-rising, H = high, HF = high-falling, LF = low-falling

Isaan	Pronunciation	Tones	Thai	English/Notes	#occ
ฝั่ง	faŋ	H	ฝั่ง	1. side 2. river/canal bank, shore	42/21

Link to overview page
Link to dictionary

Basic vocabulary — Page 31 — Series B, pictures 03: skin color

3
อันนี้คือพุใด อันนี้กะเป็นคนคือกัน มีพุหญิงกับพุซายสองคน กำลังยืนเฮียงกันอยู่
มีคนดำพ้อม คนขาวพ้อม แล้วกะคนสีพอก่ำๆ พ้อม
แล้วพุใดเป็นคนขาว กะมีคนขาวพุหนึ่ง เป็นพุซายเนาะ กะเป็นพุซาย อยู่ฝั่งซ้ายมือ
แล้วกะมีคนดำพ้อม กะเป็นพุซายคือกัน คนดำๆ นั้นกะยืนอยู่ฝั่งขวา
แล้วกะมี เป็นพุหญิง อยู่ตงกางเนาะ เป็นพุหญิงผิวพอก่ำๆ หนิหละ ผิวออกน้ำตานหนิหละ บ่ดำหลาย บ่ขาวหลาย

Basic vocabulary — page 11 — Series B, pictures 14-15: boy, girl, to stand, thin, fat

14
เขากำลังเฮ็ดหญัง เขากำลังยืนอยู่
มีเด็กน้อยพุซายสองคน เขากำลังยืนอยู่ เขายืนเฮียงกันอยู่สองคน เขาใส่กางเกงขาสั้นเทิงสองคน ใส่เสี้ยแขนสั้นเทิงสองคน
คนยืนฝั่งซ้ายโตจ่อยๆ คนยืนฝั่งขวา อ้วนบักคักหนึ่ง
คนอ้วนๆ เขาใส่เสี้ยสีแดง คนจ่อยๆ เขาใส่เสี้ยสีซมพู

15
เขากำลังเฮ็ดหญังอยู่ มีเด็กน้อยพุหญิงสองคน เขากำลังยืนอยู่ เขากะยืนเฮียงกัน เขายืนเฮียงกันอยู่สองคน
พุหนึ่งโตจ่อยๆ พุหนึ่งโตบักอ้วนหนึ่ง
คนใส่เสี้ยสีขาว เขาสิจ่อย จ่อยบักคักหนึ่ง คนใส่เสี้ยสีเหลียง เขาสิอ้วน อ้วนบักคักหนึ่ง
คนอ้วนเขาน้ำหนักหลายบ่ กะหลายอยู่ คนอ้วนสิน้ำหนักหลาย หลายบักคักหนึ่ง

Basic vocabulary — Page 23 — Series B, pictures 03-05: to grow, tree, person, fish

3
นี้คืออี่หยัง อันนี้กะคือต้นไม้ หลือว่ากกไม้
มีกกไม้น้อย กับกกไม้ใหญ่
ลูบฝั่งทางซ้ายสิเป็นกกไม้น้อย แล้วมันกะสิค่อยๆ ใหญ่ขึ้น เป็นกกไม้ใหญ่
หลือว่าใซ้เวลาโดนเติบ จากกกน้อยๆ กะสิกายเป็นกกใหญ่ๆ

4
นี้คืออี่หยัง อันนี้คือคน อันนี้เป็นคน
ฝั่งซ้ายกะคือเด็กน้อย ฝั่งขวากะคือพุใหญ่
ซู่พุซู่คนสิสามาดใหญ่ขึ้นไปเลี้ยยๆ จากเด็กน้อย เวลาผ่านไปโดนๆ โดนๆ ไป กะสิกายเป็นพุใหญ่ หลือว่าใหญ่ขึ้นไปเลี้ยยๆ นั้นหละ

5
นี้คืออี่หยัง อันนี้คือปา อันนี้เป็นปา
มีปาโตน้อย กับปาโตใหญ่
กะหมายความว่า ปามันเกิดมา หลือว่าปามันออกมาจากท้องแม่ มันกะสิโตน้อยๆ หนึ่ง โตบ่ใหญ่หลาย มันกะสิค่อยใหญ่ขึ้นๆ ไปเลี้ยยๆ จนกายเป็นปาโตใหญ่

Basic vocabulary — Page 23 — Series B, pictures 06-08: to work out/exercise, to swim, to lift weights

6
เขากำลังเฮ็ดหญัง เขากำลังออกกำลังกาย เขากำลังแล่นออกกำลังกาย
เขาแล่นอยู่จักคน เขาแล่นอยู่พุเดียว
แล้วเขาแล่นออกกำลังกายเฮ็ดหญัง เขากะอาดว่า อยากสิมีล้างกายแข็งแลง เขากะเลยสิแล่นออกกำลังกาย
แล้วเขาแล่นออกกำลังกายจั่งใด เขากะแล่นไปเลี้ยยๆ ปะสาแล่นออกกำลังซื่อๆ มันกะได้กำลังมาแล้ว กะสิเฮ็ดให้เฮาสุกขะพาบล้างกายแข็งแลง

7
เขากำลังเฮ็ดหญัง เขากำลังหว้ายน้ำ
เขาหว้ายน้ำเฮ็ดหญัง เขากะอาดสิฮ้อน หลืออาดสิอยากเหล้นน้ำ เขากะเลยมาหว้ายน้ำอยู่หนี้
แล้วเขาหว้ายน้ำอยู่ใส อาดสิหว้ายอยู่ในสะน้ำกะได้ อาดสิหว้ายอยู่ในทะเลกะได้ แล้วแต่เขาสิหว้ายอยู่ใส

8
เขากำลังเฮ็ดหญัง เขากำลังออกกำลังกายคือกัน เขากำลังออกกำลังกาย
เขาออกกำลังกายจั่งใด เขากะญกแนวญก
อันนี้มันเป็นแนวญก มีแนวญกฝั่งซ้าย กับ[แนวญก]ฝั่งขวา เขาใซ้มือสองข้างของเขาญกแนวญกขึ้นมา แล้วกะญกขึ้นญกลง
เพาะว่าเขาสิออกกำลังกาย เคี่ยงญกอันนี้ หลือว่าแนวญกอันนี้ มันเฮ็ดให้เฮามีกำลังมือกำลังแขนได้

Basic vocabulary — Page 03 — Series B, pictures 09-11: shoe, to put on, to take off

9
นี้คืออี่หยัง อันนี้คือเกิบ อันนี้เป็นเกิบ เป็นเกิบโบก
เกิบโบกมีจักกิ่ง เกิบโบกมีสองกิ่ง คู่หนึ่ง เกิบคู่หนึ่งสิมีสองข้างหลือว่าสองกิ่ง
อันนี้กะเป็นเกิบโบก เกิบโบกคู่สีแดง งามคัก งามอี่หลี
แล้วเกิบคู่นี้เป็นเกิบของใผ จักคือกัน จักว่าเกิบคู่นี้เป็นของพุใด จักพุใดมาถอดถิ้มไว้นี้ จักพุใดมาถอดถิ้มวางไว้นี้

10
เขากำลังเฮ็ดหญัง เขากำลังสิใส่เกิบ
มีคนคนหนึ่ง เขากำลังสิใส่เกิบ ฝั่งขวาเขาใส่ได้แล้ว อีกฝั่งซ้ายเขาทันได้ใส่เกิบ เขากำลังสิสุบใส่ลงไป
เขาใส่เกิบจักคู่ ใส่คู่เดียว คนหนึ่งใส่เกิบได้คู่หนึ่ง เพาะว่าคนหนึ่งกะมีสองตีน เกิบคู่หนึ่งกะมีสองข้าง กะใส่ได้สองตีนหลือว่าคนหนึ่งพอดี
ก่อนสิใส่เกิบ เขาคนนี้กะใส่ถุงเท้าพ้อม ถุงเท้าหลือว่าถุงตีนนั้นหละ เขาใส่ถุงเท้าพ้อม ถุงเท้าคู่สีเขียวพุ้นเด่ะ แล้วเขากะสิใส่เกิบ เขาใส่ถุงเท้าแล้วเขากะสิใส่เกิบ

11
เขากำลังสิเฮ็ดหญัง เขากำลังถอดเกิบ คนคนนี้เขากำลังสิถอดเกิบ
เป็นหญังเขาคือถอดเกิบ เขาอาดสิเซาใส่เกิบแล้ว เขากะเลยสิถอดเกิบ
เขาถอดเกิบจักข้าง กะถอดเทิงสองข้าง เพาะว่าเขาบ่ใส่เกิบแล้ว เขากะต้องถอดเกิบ ขั้นสิถอดกะถอดเทิงข้าง เขาบ่ถอดข้างเดียว เพาะว่าเขาต้องถอดออกให้มันเบิด

Basic vocabulary — Page 30 — Series B, pictures 06-08: to get off, car, bus, boat

6
พุซายคนนี้กำลังเฮ็ดหญัง พุซายคนนี้กำลังก้าวขา ถกขาออกมาจากในลด เขากำลังลงลดเนาะ เป็นลดกะบะเนาะ ลดกะบะคันบักใหญ่หนึ่ง เขากำลังลงจากลดมาเนาะ
เขากะเอาก้าวขาขวาลงก่อน แล้วกะขาซ้ายกำลังสิก้าวลงมา
แล้วเขาสิญ่างไปใส จักคือกัน เขาอาดสิไปตะหลาด ลงไปซื้อของ ไปซื้อนั้นซื้อนี้ หลือว่าฮอดบ้านเขาแล้ว เขากะสิลงลดกะได้

7
พุซายคนนี้กำลังเฮ็ดหญัง พุซายคนนี้กำลังลงลด เป็นลดบั่ดเนาะ เขากำลังลงจากลดบั่ด
เป็นหญังเขาคือลงจากลดบั่ด เขาอาดสิฮอดบ้านของเขาแล้ว อาดสิฮอดหม้องฮอดบ่อนที่เขาสิไป หลือว่าจุดมุ่งหมายของเขาแล้ว เขากะต้องลงจากลดคันนี้

8
เขากำลังเฮ็ดหญัง เขากำลังขึ้นมาจากเลียเนาะ
เป็นหญังเขาต้องขึ้นมาจากเลีย อันนี้กะอาดสิแบบว่า เขาฮอดหม้องที่เขาสิไปแล้ว หลือว่าฮอดหม้องที่เขาสิมาแล้ว เขากะต้องขึ้นมาจากเลียเนาะ
แล้วเขานั่งเลียมาจากใส อันนี้กะบ่ฮู้คือกัน เขาอาดสินั่งเลียมาจากอีกหม้องหนึ่ง อีกฝั่งน้ำพุ้น หลือว่าไกๆ พุ้น เขาอาดสินั่งเลียโดยสานมาฮอดจุดมุ่งหมายของเขาแล้ว เขากะต้องขึ้นจากเลีย หลือว่าขึ้นมาเทิงฝั่งเนาะ
กะมีขาขาหนึ่ง เขากำลังถกขึ้นมา หลือว่าก้าวขึ้นมาจากในเลียเนาะ กะอีกขาหนึ่งบ่ทันได้ถกออกมา กะอาดสิถกมาอีกในบ่โดนนี้เนาะ

Basic vocabulary — page 14 — Series B, pictures 09-10: young/old

9
นี้คืออี่หยัง นี้คือพุหญิง มีพุหญิงสองคน
มีพุหญิงพุหนึ่ง อายุบ่ทันได้หลาย แต่ว่ากะอาดสิเป็นวัยทองอยู่ ใส่เสี้ยแขนสั้นสีขาว ใส่ส้งขาญาวสีเทา เขากำลังยืนอยู่ ยืนอยู่ข้างๆ อีกพุหนึ่ง
พุหนึ่งเบิ่งซงแล้วคือสิเถ้าหลาย อาดสิเป็นพุเถ้า เพาะว่าเบิ่งซงแล้วคือสิเถ้าบักคักหนึ่ง กำลังก้มหน้าก้มตาอยู่ ใส่เสี้ยแขนญาวสีฟ้า
พุหญิงสองคนนี้ พุใดเถ้ากว่ากัน กะสิมีคนหนึ่งเถ้ากว่า คนที่ยืนอยู่ฝั่งขวา แล้วคนยืนอยู่ฝั่งซ้าย กะสิอายุหน้อยกว่า

10
นี้คืออี่หยัง นี้คือคน คนสองคนยืนอยู่ เป็นพุซายสองคนยืนเฮียงกันอยู่
พุซายคนแลกอายุหน้อยๆ หนึ่ง บ่ทันได้เถ้า อายุทันได้หลาย ใส่เสี้ยแขนสั้นสีเขียว ใส่ส้งขาญาวสีขาว กำลังยืนเฮียงกันอยู่
เบิ่งซงเบิ่งหุ่นแล้ว กะสูงเติบ กะเป็นคนสูงเติบ เบิ่งซงเบิ่งหุ่นแล้ว กะสูงเติบ กะพอสูงใคแน่ มีผมสีดำ ผมกะบ่ญาวหลาย
พุซายอีกพุหนึ่ง คือสิเถ้าแล้ว เบิ่งซงคือสิเถ้าคัก
เขามีผมหงอกพ้อม ผมหงอกสีขาว หัวเขากะล้านพ้อม ล้านบักคักหนึ่ง หัวล้านเหมิกเถิกอยู่
เขากะใส่เสี้ยสีซมพูแขนสั้น แล้วกะใส่ส้งขาญาวสีเทาคือกัน
สองคนนี้พุใดสูงกว่ากัน คนใส่เสี้ยสีเขียวสูงกว่า เขาเป็นวัยลุ้นอยู่ เขากะทันได้เถ้า เขาสูงกว่า
แล้วพุใดเถ้ากว่ากัน กะมีพุเถ้าพุหนึ่ง ยืนอยู่ฝั่งขวา เบิ่งซงแล้วกะเถ้าคัก คือสิเถ้ากว่าเด็กน้อยคนนี้อยู่

Basic vocabulary — page 20 — Series B, pictures 04-05: to sing, singer, microphone

4
เขากำลังเฮ็ดหญัง เขากำลังล้องเพง เขากำลังล้องเพงอยู่
แล้วเขาเฮ็ดท่าทางจั่งใด เขากะเฮ็ดท่าทางคือจั่งล้องเพงนั้นหละ เฮ็ดมือ เฮ็ดมือเฮ็ดท่าทางพ้อม อ้าปากล้องเพงพ้อม เฮ็ดตาเฮ็ดเอ่ย เฮ็ดหลายสิ่งหลายอย่าง ลักสะนะแล้วกะคือคนล้องเพงนั้นหละ
เขาล้องเพงอยู่หนี้ เขามีความสุขบ่ กะคือสิมีความสุขหลาย เบิ่งสีหน้าสีตาของเขาแล้ว เป็นตามีความสุขคัก
แล้วเขาเป็นตาม่วนบ่ กะซงคือสิเป็นตาม่วนอยู่ เบิ่งซงแล้วกะสิเป็นตาม่วนคัก
เบิ่งอยู่ตาของเขาแล้ว เขาหลับตาบ่ เขามืนตาบ่ บ่ เขาบ่มืนตา เขาหลับตาอยู่ แล้วกะล้องเพงเสย

5
อันนี้คืออี่หยัง อันนี้เป็นคนล้องเพง เป็นพุหญิงล้องเพง อาดสิเป็นนักล้องกะได้ ที่เขามายืนล้องเพงอยู่หนี้
แล้วเขาใซ้อุปะกอนอี่หยังแน่ กะสิมีขาตั้งไม กับไมพ้อม แล้วกะล้องเพง
ไมหนี้กะเป็นหม้องเป่งเสียงออกไป หลือเป็นหม้องที่มีเสียง ขั้นเฮาเป่งเสียงออกไปใส่ไม กะสิมีสายไฟที่ต่อจากไม แล้วสิมีสายไฟที่ต่อจากไมไปหาลำโพง ขั้นเฮาเว้าใส่ไม หลือล้องเพงใส่ไม เสียงกะสิออกลำโพง กะสิเฮ็ดให้มันเสียงดัง
สีแดงๆ อยู่หลังพุหญิงหนี้ เป็นอี่หยัง เป็นผ้าม้าน สีแดงๆ อยู่หลังพุหญิงนั้น เป็นผ้าม้าน
เป็นผ้าม้านสีแดง มีฝั่งซ้ายกับฝั่งขวา มีสองฝั่ง
แล้วพุหญิงคนนี้เขาล้องม่วนบ่ จัก บ่ฮู้คือกัน จักว่าเขาล้องม่วนหลือล้องบ่ม่วน อันนี้เฮากะบ่ฮู้ เพาะว่าบ่ได้ฟังนำเขา

Basic vocabulary — Page 01 — Series B, pictures 01-03: chopsticks, noodle soup, to break

1
อันนี้คือหญัง อันนี้คือตะเกียบ อันนี้เป็นตะเกียบ
ตะเกียบมันเอาไว้เฮ็ดหญัง ตะเกียบมันเอาไว้ถ้าคีบแนวกิน เอาไว้ถ้าคีบกินแนวกินกะได้ เอาไว้คีบกวยเตียวกะได้ หลือว่าคีบอันที่แนวมันเป็นเส้น
ตะเกียบมันเฮ็ดมาจากอี่หยัง ตะเกียบเฮ็ดมาจากไม้ เฮ็ดมาจากไม้ไผ่ หลือเฮ็ดมาจากไม้อันอื่นกะได้ หลือว่าเฮ็ดมาจากพะสะติกกะได้
ตะเกียบคู่หนึ่งมันมีสองอัน หลือว่าใซ้นำกันสองอัน ใซ้สองอันนั้นหละไว้ถ้าคีบแนวกิน ขั้นมันมีอันเดียว มันคีบบ่ได้ มันใซ้คีบกินบ่ได้

2
เขากำลังเฮ็ดอี่หยัง เขากำลังใซ้ตะเกียบคีบกินกวยเตียวอยู่
แล้วกวยเตียวมันอยู่ในใด กวยเตียวมันอยู่ในถ้วย อยู่ในถ้วยใบบักใหญ่หนึ่ง กวยเตียวกะหลายๆ หลายบักคักหนึ่ง หลายจนสิล้นเอาโลด
เขาใซ้อี่หยังจับตะเกียบ เขาใซ้มือของเขานั้นหละ เขาใซ้มือของเขาจับตะเกียบ แล้วกะคีบกินกวยเตียว

3
เขากำลังเฮ็ดอี่หยัง เขากำลังหักตะเกียบ มีคนคนหนึ่งเขาหักตะเกียบ
เขาใซ้มือของเขาสองข้างหักตะเกียบ ข้างหนึ่งจับฝั่งหนึ่ง ข้างหนึ่งจับอีกฝั่งหนึ่ง แล้วเขากะหักตะเกียบ
แล้วเขาหักตะเกียบเฮ็ดหญัง จัก บ่ฮู้คือกัน จักว่าเขาหักตะเกียบเฮ็ดหญัง เขาอาดสิหักเหล้นๆ กะได้
แล้วตะเกียบมันแข็งบ่เขาคือหักได้ บ่ ตะเกียบมันบ่แข็งดอก มันบ่แข็งปานใด เพาะว่าตะเกียบมันเฮ็ดมาจากไม้ จากไม้น้อยๆ หนึ่ง มันสามาดหักได้ แต่ว่าขั้นตะเกียบเฮ็ดมาจากเหล็ก มันกะหักบ่ได้ เพาะว่าเหล็กมันแข็ง มันบ่สามาดหักได้

Basic vocabulary — Page 28 — Series B, pictures 06-08: old, new, car, shirt, house

6
อันนี้คืออี่หยัง อันนี้เป็นลด เขาเอิ้นว่าลดเก็ง
ลดเก็งมีจักคัน ลดเก็งกะมีสองคัน มีคันที่หนึ่งกับคันที่สอง
คันที่หนึ่งเป็นแบบใด คันที่หนึ่งกะอยู่ฝั่งซ้าย ซ้ายมือที่เฮาเห็นเนาะ มีลักสะนะใหม่ๆ เป็นลดใหม่ๆ บ่มีฮอยอี่หยังเลย อาดสิเป็นลดส้างมาใหม่ หลือว่าผะหลิดมาใหม่ เฮ็ดมาใหม่เนาะ กะใหม่เอี่ยม บ่มีฮอดหม้องอี่หยังหม้องพังหม้องหญังเลย
แล้วลดคันที่สองหละ เป็นลดคันบ่ใหม่ดอก ลดคันเก่า อาดสิซื้อมาแต่โดนแล้ว หลือว่าขี่มาแต่โดนแล้ว ผะหลิดมาแต่โดน เฮ็ดมาแต่โดนแล้ว

7
อันนี้คืออี่หยัง อันนี้กะเป็นเสี้ย เสี้ยยื้ดเนาะ เป็นเสี้ยยื้ด ไว้ถ้าใส่หนิหละ เสี้ยแขนสั้น
โตใหญ่บ่ กะจักคือกัน แล้วแต่ บ่ลู้ว่าไซอี่หยัง
เป็นโตสีเหลียง มีสองโต โตหนึ่งกะใหม่ๆ ดอก บ่มีฮอดฮอยอี่หยังเอาโลด บ่มีฮอยใส่ อาดสิเป็นเสี้ยโตใหม่ เสี้ยบ่ทันได้มีคนใส่จักเที่ย
แต่ว่าอีกเสี้ยอีกโตหนึ่งกะคือสิเก่าแล้ว คือสิมีคนใส่ดุแล้ว หลือว่าใซ้งาน ผ่านกานใซ้งาน คนใส่มาดุแล้ว กะเลยเก่า เบิ่งไปแล้วดำปี้ๆ อยู่ บ่มีฮอยใหม่อี่หยังเลย มีแต่ฮอยเก่า มีแต่ฮอยเปี้ยนฮอยหญังเนาะ

8
อันนี้คืออี่หยัง อันนี้กะเป็นบ้านเนาะ เป็นบ้านไม้ สองซั้นพุ้นแหล้ว
มีสองหลัง เปียบเทียบกัน หลังหนึ่งกะใหม่ๆ ดอก อาดสิส้างขึ้นมาใหม่เนาะ บ้านหลังนี้อาดสิส้างขึ้นมาใหม่
อีกหลังหนึ่งกะเก่าๆ อาดว่าส้างมาแต่โดนแล้ว เฮ็ดแต่โดนแล้ว อยู่ในบ้านหลังนี้โดนเติบ หลายปีหลายเอ่ยแล้วเนาะ กะสิเฮ็ดให้บ้านเก่าขั้นใซ้งานโดนเติบ หลือว่าผ่านอี่หยังมาหลาย มันกะสิเก่า มันกะสิเก่าสิฮ้างสิเพไปเลี้ยยๆ เนาะ

Basic vocabulary — Page 01 — Series B, pictures 18-20: flip flop, to put on, to take off

18
นี้คืออี่หยัง อันนี้คือเกิบ เป็นเกิบคีบ หลือว่าเกิบแตะนั้นหละ
เกิบคีบหลือเกิบแตะอันนี้เอาไว้เฮ็ดหญัง กะเอาไว้ถ้าใส่ เอาไว้ถ้าใส่ไปทางนั้นทางนี้ เอาไว้ถ้าใส่ไป เพื่อที่สิบ่ให้มันเหยียบน้ำ หลือเหยียบแก้ว หลือว่าเหยียบสิ่งสกกะปก
พุน้อยพุใหญ่สามาดใส่ได้เบิด หลือว่าสามาดใส่เกิบคู่นี้ไปได้ซู่หม้อง
แล้วเกิบมันเฮ็ดมาจากอี่หยัง มันเฮ็ดได้มาจากหลายอย่าง เฮ็ดมาจากพะสะติกกะได้ เฮ็ดมาจากฟองน้ำกะได้ เฮ็ดมาจากผ้ากะได้ เฮ็ดได้จากหลายสิ่งหลายอย่าง
แล้วส่วนมากทุกคนกะต้องใส่เกิบพ้อม ขั้นบ่ใส่เกิบกะบ่ดี ญ่างไปทางนั้นทางนี้กะสิเหยียบเซี้ยโลกเข้ามาสู่ล้างกายของเฮา

19
เขากำลังเฮ็ดหญัง เขากำลังใส่เกิบ เขากำลังสิใส่เกิบ
เขาใส่ตีนของเขาสองข้างนั้นหละ กำลังใส่เข้าไปในเกิบ เพื่อที่เขาสิญ่างไปทางนั้นทางนี้ หลือว่าเขาสิไปทางนั้นทางนี้ แล้วเขากะต้องใส่เกิบ
เขาใส่เกิบสองข้างแล้ว เทิงฝั่งซ้ายฝั่งขวา เขาใส่เทิงสองข้างเอาโลด
เกิบอันนี้คู่ใหญ่บ่ บ่ กะบ่คู่ใหญ่หลาย เกิบอันนี้กะพอดีกับตีนเขานั้นหละ บ่ใหญ่คัก บ่ใหญ่หน้อย บ่ใหญ่หลาย

20
เขากำลังเฮ็ดหญัง เขากำลังถอดเกิบ
เป็นหญังเขาคือถอดเกิบ เขากะอาดสิเซาใส่เกิบแล้ว เขากะเลยถอดเกิบ เขาอาดสิไปทุละ หลือว่าไปหม้องหนั้นหม้องหนี้มาแล้ว เขาเลยบ่อยากใส่เกิบ
แล้วเกิบนี้ใส่เข้าไปในเฮียนได้บ่ บ่ ใส่ไปบ่ได้ เกิบอันนี้มันสกกะปก ใส่เข้าไปในเฮียนบ่ได้ ขั้นเฮาใส่เกิบอันนี้เข้าไปในเฮียนแล้ว เซี้ยโลกหลือว่าสิ่งสกกะปก[อยู่]ในเกิบเฮานั้น มันกะสิเข้าไปในเฮียนเฮาพ้อม สิเฮ็ดให้เฮียนเฮาสกกะปก หลือว่ามีเซี้ยโลกนั้นหละ

Basic vocabulary — page 20 — Series B, pictures 01-03: to pull, rope, toy car, dog, tug-of-war

1
เขากำลังเฮ็ดหญัง เขากำลังดึงลด เป็นลดของเหล้น
เขาใซ้อี่หยังลาก เขาใซ้เซียก เขาดึงเซียกอยู่ เขาเอาเซียกมัดใส่ลดของเหล้นนั้น แล้วเขากะใซ้มือของเขาจับเซียกอันนั้น แล้วกะลากไป
ของเหล้นนี้กะเป็นลดของเหล้น เป็นลดของเหล้นเด็กน้อย ลดของเหล้นคันน้อยๆ ดอกว่า บ่สามาดขี่ได้ แต่ว่าสามาดเหล้นได้ ญู้เหล้น หลือลากเหล้นกะได้ สำหลับของเด็กน้อยเนาะ สำหลับของเด็กน้อยเหล้น

2
หมามันกำลังเฮ็ดหญัง หมามันกำลังดึงคนไปข้างหน้า
แล้วมันใซ้แฮงหลายบ่ จักคือกัน อันนี้กะบ่ฮู้คือกัน จักว่ามันใซ้แฮงหลายหลือบ่หลาย
แล้วพุใดไปก่อนไปลุน พุใดอยู่ข้างหน้า พุใดอยู่ข้างหลัง กะหมามันออกก่อน หมามันดึงคน แล้วคนอยู่ทางหลัง หมามันดึงคนไปข้างหน้า แล้วคนกะอยู่ข้างหลังหมา
ส่วนปะกอบของหมากะสิมีหลายอย่าง มีขาพ้อม กะมีขาหน้า ขาหลัง มีหู มีตา มีปาก มีดัง มีลิ้น มีสิ่งต่างๆ อีกหลายสิ่งหลายอย่าง

3
เด็กน้อยกำลังเฮ็ดหญัง เขากำลังดึงเซียก กำลังดึงเซียกไปทางหลัง
จักว่าเขาสิดึงเป็นหญัง เห็นแต่เขาใซ้แฮงดึงเซียกอยู่
ที่เขาดึงอยู่นั้นเป็นอี่หยัง เป็นเซียกแม่นบ่ แม่น เป็นเซียก เขากำลังดึงเซียก กำลังดึงเซียกอยู่
แล้วเขาใซ้แฮงหลายบ่ กะสิใซ้แฮงหลายเติบ เบิ่งซงแล้วเป็นตาใซ้แฮงหลายเติบ
แล้วที่เขาเฮ็ดอยู่นั้น ที่เขาเหล้นอยู่หนี้ เป็นกานละเหล้นแบบใด เป็นกานละเหล้นของอี่หยัง
อันนี้กะเป็นกานละเหล้นของเด็กน้อย หลือของพุใหญ่กะได้ เขาเอิ้นว่า เหล้นชักกะเย้อ เป็นเกมชักกะเย้อ เป็นเกมที่เหล้นของคนไทย คนอี่สานกะเหล้นได้ ซู่คนสามาดเหล้นได้
กะสิมีคนสองฝ่าย ฝ่ายหนึ่งอยู่ทางนี้ ฝ่ายหนึ่งอยู่ทางนั้น แล้วกะดึงเซียกกัน พุใดดึงซะนะ พุนั้นกะสิเป็นพุซะนะ
พุซะนะกะคือว่า ฝั่งใดที่ดึงเซียกได้หลายกว่า หลือดึงเซียกแฮงกว่า หลือมีพะละกำลังหลายกว่า ฝั่งนั้นกะสิเป็นพุซะนะ

Basic vocabulary — Page 29 — Series B, pictures 06-07: ring, gold, to put on

6
อันนี้คืออี่หยัง อันนี้เป็นแหวน
เป็นแหวนทอง แหวนสีทองพ้อม เบิ่งลักสะนะแล้วกะอาดสิเป็นแหวนทองเลยเนาะ
แล้วแหวนทองนี้มีลาคาแพงบ่ กะแพงอยู่ กะแพงเติบเนาะ กะบ่แพงปานใด กะแล้วแต่ เขาเอิ้นว่าหญังเกาะ น้ำหนักทอง ลูบแบบทอง ขั้นน้ำหนักหลายกะแพง น้ำหนักหน้อยกะบ่แพง
ตอนนี้เนาะกะอาดสิแบบว่า บาทหนึ่ง เขาเอิ้นว่าบาทหนึ่ง กะสิลาคาอยู่ปะมานสองหมื่นบาทเนาะ
น้อยกว่าบาทหนึ่งกะสิมีสามสะหลึง สองสะหลึง แล้วกะหนึ่งสะหลึง แล้วกะเคิ่งสะหลึงเนาะ กะสิตามลาคาลงไป
เคิ่งบาทหลือว่าสองสะหลึงกะสิอาดปะมานหมื่นหนึ่ง สามสะหลึงกะสิปะมานหมื่นห้า ปะมานนั้นเนาะ ลาคาแล้วแต่ปะลิมาน แล้วแต่จำนวนของทองมันเนาะ
ทองหนิกะสิเป็นลาคาที่บ่แพงส่ำเพ็ด ขั้นเพ็ดกะสิลาคาแพงไปอีกลาคาหนึ่ง ทองกะสิลาคาพอปะมานที่เว้าไปเนาะ

7
เขากำลังเฮ็ดหญัง เบิ่งจากลักสะนะแล้วเขากำลังใส่แหวน ใส่แหวนทอง
กะสิมีมือพุหนึ่ง จับแหวน กำลังสิใส่ หลือว่าอาดสิเป็นมือของเขาเทิงสองข้าง อาดสิเป็นพุเดียวกัน กำลังใส่แหวนไปอีกข้างหนึ่งของเขาเนาะ
อาดสิเป็นฝั่งขวากำลังใส่แหวน แล้วอีกมือข้างซ้ายกำลังสิสุบแหวนไปใส่มือข้างขวา
เขาใส่แหวนเข้าไปในนิ้วใด เขาใส่แหวนเข้าไปในนิ้ว นิ้วนางเนาะ เขาเอิ้นว่านิ้วนาง คนกะสิมีห้านิ้ว มีนิ้วโป้ นิ้วซี้ นิ้วกาง นิ้วนาง นิ้วก้อย เนาะ
กานใส่แหวนกะสิมีกานบ่งบอกถึงสองลักสะนะ หลือว่าสองวิทีนำกันเนาะ ขั้นเขาใส่แหวนอยู่นิ้วนางกะสิหมายถึงว่าเป็นกานหมั้น หมั้นที่สิก่อนแต่งงาน ขั้นสมมุดว่ามีผัวเมีย สองคนเนาะ กำลังสิแต่งงานกัน แต่ว่าบ่ทันได้แต่ง หมั้นกันก่อน เพื่อที่ว่าสิไปแต่งงาน แต่ว่าในตอนนี้คือหมั้นกันก่อน กะสิใส่แหวนอยู่นิ้วนางเนาะ
แต่ว่าขั้นมื้อใดสองคนนี้อยากสิแต่งงานกัน อีกสองสามเดียนไปข้างหน้า ปากดว่าฮอดมื้อสองสามเดียนนั้นแล้ว สิแต่งงานกัน สมมุดว่าฮอดมื้อนี้ปึ่บ สิแต่งงานกันมื้อนี้ กะสิใส่แหวนนิ้วก้อย อันนั้นกะสิหมายถึงว่าขั้นแต่งงานกันกะใส่แหวนนิ้วก้อย ขั้นหมั้นกันให้ใส่แหวนนิ้วนาง

Basic vocabulary — Page 30 — Series B, pictures 18-20: to wash one’s face, to brush one’s teeth, to comb one’s hair

18
เขากำลังเฮ็ดหญัง กะมีพุหญิงเนาะ เป็นพุหญิงดอก มัดผมจุกพ้อมเด่ะ ฝั่งซ้ายกะฝั่งขวา มัดเทิงสองข้างเนาะ เขากำลังล้างหน้าอยู่
อาดสิล้างอยู่ห้องน้ำ อาดสิล้างอยู่ในบ้านเขาหละ อาดสิเป็นห้องน้ำบ้านเขาหละ กำลังล้างหน้าอยู่
กะใซ้มือสองข้างหนะ จับหน้าขึ้นมา แล้วกะ เออ จับน้ำขึ้นมาเนาะ แล้วกะล้างๆๆ หน้าของเขา
เป็นหญังเขาคือล้างหน้า เขาอาดสิหัวกะตื่น หัวกะตื่นนอน แล้วกะล้างหน้า เพื่อสิเฮ็ดให้มันสดซื้น เพื่อที่สิเฮ็ดให้หน้ามันสดซื้นเนาะ แล้วกะบ่ให้มีอี่หยังติดหน้า หลือว่าไขมัน หลือว่าเหงี่ยอี่หยังติดหน้า เฮากะสิล้างเอาความสกกะปกออกไปเนาะ

19
พุหญิงคนนี้กำลังเฮ็ดหญัง กะมีพุหญิงพุหนึ่งเนาะ พุหญิงคนนี้หละกำลังแปงฟัน
กำลังแปงฟันใซ้แปงสีฟัน ใซ้ยาสีฟัน แล้วกะแปงๆๆๆ แปงแข้วของเขาเนาะ
แล้วเขาแปงอยู่ใส กะอาดสิแปงในห้องน้ำบ้านของเขาเนาะ ตอนนี้เขากำลังอยู่หน้า อาดสิเป็นหน้ากะจก หลือว่าอยู่หน้าชักโคก อุ้ย บ่แม่น อยู่หน้าอ่างล้างหน้าเนาะ บ่แม่นหน้าชักโคกเนาะ เขากำลังแปงฟันอยู่
แล้วเขาแปงฟันเฮ็ดหญัง เขากะแปงฟันเพื่อที่ว่าสิให้แข้ว หลือว่าปากของเขาสะอาดเนาะ คนตื่นนอนมาใหม่ๆ กิ่นปากมันกะสิมีอยู่ เพื่อที่ว่าสิทำความสะอาดแข้ว หลือว่าทำความสะอาดปากของเฮา บ่ให้มันมีกิ่นเหม็นอยู่ในแข้ว ซอกแข้วของเฮา เฮากะต้องแปงฟัน แปงแข้ว เพื่อที่สิให้แข้วเฮาสะอาด หลือว่าบ่มีกิ่นเหม็นหลายปานใดเนาะ

20
เขากำลังเฮ็ดหญัง กะมีพุหญิงพุหนึ่งเนาะ กำลังหวีผม
กำลังหวีผมอยู่ กะใซ้มือข้างหนึ่งจับหวี แล้วกะมือข้างหนึ่งจับผม แล้วกะหวีๆๆๆ หวีลงไป
แล้วเป็นหญังเขาคือหวีผม กะบ่ฮู้คือกัน ผมเขาอาดสิหญุ้ง หลือว่าผมเขาอาดสิหญอง มันข้องกันจั่งซี้เนาะ เขากะต้องใซ้หวี หวีผมลงไป ให้มันเป็นเส้นของใผของมัน บ่ให้มันไปหญุ้งกัน หลือว่าไปข้องกันเนาะ
แล้วผมของเขาญาวบ่ กะญาวเด่ะ เบิ่งลักสะนะแล้วญาวเติบ ญาวคักอยู่ ญาว บักญาวหนึ่ง เลยบ่าไปอีก ฮอดนมฮอดเอิกพุ้นหนะ ผมของเขากะเลยญาวคักญาวแน่ ไว้จั่งใดญาวแท้ ผมนั้นกะเดย

Basic vocabulary — page 18 — Series B, pictures 04-07: coconut, to cut, drinking straw, to drink

4
นี้คืออี่หยัง นี้คือบักพ้าว อันนี้เป็นบักพ้าว
บักพ้าวสองน่วย วางเฮียงกันอยู่ข้างๆ กันนั้นหละ มีสองน่วยข้อหล้อ
บักพ้าวสองน่วยนี้เป็นบักพ้าวอี่หยัง เป็นบักพ้าวคือกันบ่ บ่ เป็นบักพ้าวคนละอย่าง
อันหนึ่งเป็นบักพ้าวอ่อน วางอยู่ฝั่งซ้ายมือหนะเป็นบักพ้าวอ่อน
วางอยู่ฝั่งขวามือหนะเป็นบักพ้าวแก่ เป็นน่วยสีน้ำตาน อาดสิแก่กะได้ มันเถ้าแล้วนั้นหละความหมาย
บักพ้าวแต่ละอย่างกะแตกต่างกันไป บักพ้าวอ่อน เนี้ยมันกะอ่อน บักพ้าวแก่ เนี้ยมันกะแข็ง นวนมันนั้นหละ นวนมันกะแข็ง บักพ้าวอ่อนนวนมันกะอ่อน
บักพ้าวอ่อนกะเอาไว้ถ้าเฮ็ดขะหนม หลือเอาไว้ถ้ากินเหล้น บักพ้าวแก่หลือบักพ้าวเถ้านั้นหละ กะเอาไว้ถ้าแนวกิน เอาไว้ถ้าเฮ็ดของหวาน หลือเอาไว้เฮ็ดอี่หยังอย่างอื่นกะได้
แต่ละอย่างกะมีปะโยดหลายอย่าง แต่ละปะโยดกะแตกต่างกันออกไป

5
เขากำลังเฮ็ดหญัง เขากำลังผ่าบักพ้าว
มีคนกำลังผ่าบักพ้าวอยู่
เขาผ่าบักพ้าวจั่งใด เขาเอาอี่หยังผ่าบักพ้าว เขาใซ้อี่หยังผ่าบักพ้าว เขาใซ้มีดผ่าบักพ้าว เขากำลังปอก กำลังผ่าบักพ้าวอยู่
เขาใซ้มือของเขาจับบักพ้าวข้างหนึ่ง อีกข้างหนึ่งเขาจับมีด แล้วกะผ่าบักพ้าว หลือปอกเปียกบักพ้าวนั้นหละ
เบิ่งซงแล้วเป็นตาญากบ่ เบิ่งซงแล้วเป็นตาผ่าญากและปอกญากบ่ กะญากอยู่ ขั้นคนบ่เคยเฮ็ดกะเฮ็ดบ่เป็น ขั้นคนเคยเฮ็ดกะเฮ็ดเป็น มันกะญากพอสมควนอยู่ แต่กะบ่ญากหลาย ขั้นคนอยากเฮ็ดกะเฮ็ดได้ ขั้นคนบ่อยากเฮ็ดกะเฮ็ดบ่ได้

6
นี้คืออี่หยัง นี้คือหลอด หลอดไว้ถ้าดูดน้ำ หลือดูดอี่หยังกะได้ที่มันเป็นน้ำ
หลอดอันนี้เฮ็ดจากอี่หยัง หลอดนี้เฮ็ดจากพะสะติก
เฮ็ดจากพะสะติก มันเฮ็ดจากเหล็กเฮ็ดจากไม้บ่ได้
หลอดอันนี้กะมีปะโยดอย่างเดียวนั้นหละ เอาไว้ถ้าดูดน้ำ ดูดน้ำโค่ก ดูดน้ำส้ม ดูดกาแฟ หลือดูดน้ำเป่านี้หละ
ส่วนมากพุใดสิใซ้หลอดนี้ กะมีหลายคน เพาะว่ามันสิสะอาดกว่ากัน ขั้นไปกินล้านอาหาน เขากะสิใซ้หลอดดูด เพาะว่าปากเฮาจั่งบ่ได้ติดกับแก้ว เฮากะใซ้แค่หลอดนี้ ดูดกินน้ำในแก้วนั้นกะพอ แล้วมันกะสิสะอาดกว่ากัน

7
เขากำลังเฮ็ดหญัง เขากำลังกินบักพ้าว
เขากำลังดูดน้ำบักพ้าวอยู่
มีพุหญิงพุหนึ่งนั้นหละ เขากำลังยืนจับบักพ้าว กำลังดูดกินน้ำบักพ้าวอยู่
เขาใซ้อี่หยังดูดน้ำบักพ้าว เขาใซ้หลอดดูดน้ำบักพ้าว เอาหลอดเสียบเข้าไปในบักพ้าว แล้วกะดูดกินน้ำมัน
น้ำบักพ้าวมันแซบบ่ กะแซบอยู่ แซบหลาย แซบบักคักหนึ่ง เพาะว่าคนมักกินน้ำบักพ้าว แต่ว่าขั้นน้ำบักพ้าวอ่อน มันกะสิแซบ แต่ว่าขั้นน้ำบักพ้าวแก่ หลือบักพ้าวเถ้า มันกะสิบ่แซบ

Basic vocabulary — Page 27 — Series B, pictures 16-18: car, to overtake, motorbike, boat

16
ตอนนี้กำลังเกิดอี่หยังขึ้น กะมีลดสองคัน คันหนึ่งสีเหลียง กับอีกคันหนึ่งสีแดง กำลังขับอยู่เทิงถะหนนหลือว่าอยู่เทิงหนทางเนาะ
กะมีคันหนึ่ง คันสีเหลียง ขับอยู่เลนซ้าย อยู่ฝั่งซ้าย ขับซ้าๆ หนึ่งดอก
กะมีอีกคันหนึ่ง คันสีแดง ขับบักเล็วหนึ่ง ขับเพื่อที่สิแซงลดคันสีเหลียงที่ขับอยู่ฝั่งซ้ายเนาะ
ลดคันสีแดงนี้กะขับออกขวา ออกขวามาเพื่อที่สิแซงลดคันสีเหลียงอยู่ฝั่งซ้าย
ลดคันสีแดงนี้ขับเล็วบ่ กะขับเล็วเติบ เพาะว่าขั้นขับซ้ากะแซงคันข้างหน้าบ่ได้ ขั้นขับเล็วจั่งสิแซงข้างหน้าได้

17
ตอนนี้เกิดอี่หยังขึ้น กะมีลดอยู่สองคัน ขับอยู่เทิงหนทาง
กะมีลดคันหนึ่งสีเหลียง เป็นลดเก็งเนาะ แล้วกะอีกลดคันหนึ่ง คันสีแดง เป็นลดมอเตอไซ กำลังขับแซงกัน
กะมีลดคันหนึ่งดอก เป็นลดเก็ง ขับซ้าๆ ดอก ขับบ่ฟ้าว ขับซ้าๆ หนิหละ
แล้วกะมีลดอีกคันหนึ่ง เป็นลดมอเตอไซเนาะ มีคนขับคนเดียว กำลังแซงลด ลดเก็ง ขับแซงขวาพุ้นแหล้ว แซงออกขวาพุ้นหละ แซงท่วนๆๆๆ ไป
เขาขับเล็วบ่ มอเตอไซเนี้ย กะเล็วเติบ เบิ่งซงแล้วเป็นตาขับเล็วเติบ
ขั้นมอเตอไซขับเล็วหนิ มันอันตะลายบ่ มันตาย้านบ่ กะอันตะลายเติบ ตาย้านคัก ตาย้านคักอี่หลี เพาะว่ามอเตอไซมันบ่ป้องกันเนาะ ขั้นขับ มีอุบะติเหดกะสามาดตาย หลือว่าเสียซีวิดได้ เพาะสะนั้นแล้วกะต้องขับซ้าๆ แต่ว่าคนนี้อาดสิฟ้าว
แล้วตอนนี้เขาใส่หมวกกันน็อกบ่ เบิ่งซงแล้วอาดสิใส่หมวกกันน็อกพ้อม ใส่หมวกกันน็อกอยู่เทิงหัวของเขา

18
คนสองคนนี้เขากำลังเฮ็ดหญัง คนสองคนนี้เขากำลังขับเลีย หลือว่าพายเลียอยู่
กะมีคนหนึ่งกับอีกคนหนึ่ง คนหนึ่งขับเลีย พายเลียสีแดง อีกคนหนึ่งพายเลียสีเขียว กำลังแข่งกันพุ้นแหล้ว เบิ่งซงเบิ่งลักสะนะท่าทางแล้ว กำลังแข่งกัน
คนหนึ่งขับสีแดงกะขับซ้าๆ ขับไปซ้าๆ ขับบ่เล็วหลาย อาดสิขับบ่เก่งเนาะ
กะมีอีกคนหนึ่ง ขับคันสีเขียว คือสิขับเก่ง คือสิขับถะหนัด หลือว่าฮู้จักวิทีกานขับ หลือว่ากานพายเนาะ กะพายไปบักเล็วหนึ่ง ท่วนๆๆๆ ไปแซงหน้าคันสีแดงไป แซงออกซ้าย เออ แซงออกขวาพุ้นหละเนาะ
แล้วพายเลียหนิพายอยู่ใส หลือว่าขับเลีย หลือว่าพายเลียหนิพายอยู่ใส อยู่ในน้ำเนาะ เลียมันกะต้องขี่อยู่ในน้ำ หลือว่าพายอยู่ในน้ำ
แล้วเลียหนิมันขี่อยู่เทิงดินได้บ่ บ่ มันพายอยู่เทิงดินบ่ได้ จักสิมันไปจั่งใดเนาะ ญู้เอาติ ญู้เอาคือลดติ

Basic vocabulary — page 22 — Series B, pictures 01-04: to plough, to plant, to harvest

1
นี้คือสัดอี่หยัง อันนี้เป็นควย เขาเอิ้นว่าควย
โตของควยมันโตใหญ่ แล้วควยมันมีแฮงหลายพ้อม
ตอนนี้เขาเฮ็ดอี่หยังกับควย เขาใซ้ควยไถนา เขากำลังเอาควยมาไถนาอยู่
สะหมัยแต่กี้ หลือสะหมัยก่อนบ่มีลดไถนา หลือว่าบ่มีลดไถ เขาต้องใซ้ควย เอาควยมาไถนา เพื่อที่สิเอาไว้ถ้าเฮ็ดนาหลือปูกเข้านั้นหละ
แล้วตอนนี้เขาเฮ็ดอยู่ใส เขาอาดสิเฮ็ดอยู่ทุ่งนาของเขา หลือว่าไฮ่นาของเขากะได้ เขากะเลยมาไถนาอยู่หม้องนี้

2
เขากำลังเฮ็ดหญัง เขากำลังดำนา
เขากำลังเฮ็ดนา หลือว่ากำลังปูกเข้านั้นหละ
แล้วเขาเฮ็ดอยู่ใสตอนนี้ กะเฮ็ดอยู่ทุ่งนา หลือว่าไฮ่นาของเขานั้นหละ
เขากำลังปูกเข้า กำลังดำนา เฮ็ดอยู่นาของเขา
แล้วพุซายคนนี้เขาเฮ็ดท่าทางจั่งใด เขากำลังก้มโค้งอยู่ เขากำลังเฮ็ดนา เขากำลังดำนา
เขาใซ้มือข้างหนึ่ง หลือว่าข้างขวาของเขานั้นหละ จับมัดก้าอยู่
มัดก้ากะสิมัดใหญ่ๆ หลือว่ามัดก้านั้นสิมีเข้าหลายต้น
แล้วเขากะใซ้มืออีกข้างหนึ่ง หลือว่ามือข้างซ้ายนั้นหละ แล้วแต่คนถะหนัดสิจับฝั่งใด หลือญกฝั่งใดกะได้
แต่ว่าพุซายคนนี้ เขาใซ้มือข้างซ้ายของเขา ดึงต้นก้าที่อยู่ในมัดก้านั้น แล้วดึงออกมาจักหน่อยหนึ่ง หลือว่าสี่ห้าต้น แล้วกะมาเสียบลงดิน เพื่อที่สิปูกเข้า เพื่อที่สิปูกเข้าลงไปในดิน หลือว่าเสียบต้นเข้าลงไปในดิน เพื่อที่สิให้มันต้นใหญ่ๆ ขึ้นไป

3
เขากำลังเฮ็ดหญัง เขากำลังเกี่ยวเข้า
พุซายคนนี้เขากำลังเกี่ยวเข้าอยู่
เขากำลังเกี่ยวเข้าอยู่ใส เขากะอาดสิเกี่ยวอยู่ในไฮ่นาของเขา หลือว่าไฮ่เข้าของเขา
เข้ามันต้นใหญ่แล้ว หลือว่าเข้ามันแก่แล้ว เขากะเลยมาเกี่ยวเข้าอยู่ในนาเข้าของเขา เพื่อที่สิเอาเข้านี้ไปกิน
แล้วเขาใซ้อี่หยังมาเกี่ยวเข้า เขากะใซ้เกี่ยว เขาเอิ้นว่าเกี่ยว คนอี่สานกะเอิ้นว่าเกี่ยว
เกี่ยวกะสิเป็นค้ายๆ กับมีด มีคมคือกันกับมีด แต่ว่าลักสะนะของเกี่ยวมันสิเป็นงอๆ เป็นงอๆ เข้าเพื่อที่สิได้เกี่ยวเข้ามาได้ หลือว่าดึงเข้ามาได้นั้นหละ

4
เขากำลังเฮ็ดหญัง เขากำลังเก็บผัก เขากำลังเก็บผักอยู่ในสวนอยู่
เขากำลังเก็บผักอี่หยัง เขากำลังเก็บผักกะหล้ำ
อันนี้เขาเอิ้นว่าผักกะหล้ำ หลือว่ากะหล้ำปีนั้นหละ
แต่ว่าคำว่า กะหล้ำปี มันญาวโพด คนอี่สานเขากะเลยมักเอิ้น กะหล้ำ ซื่อๆ ผักกะหล้ำ
เขาเก็บผักแล้ว เขาเอาผักไปไว้ใส หลือเอาไว้หม้องใด เขาเอาผักไว้ในเข้ง หลือว่าเอาไว้ในกะต่า
แล้วพุซายคนนี้ เขาเฮ็ดท่าทางจั่งใด เขากำลังนั่ง เขากำลังนั่งพับเพียบอยู่ กำลังนั่งเก็บผัก
ใซ้มือสองข้างดึงผักขึ้นมา แล้ว[เอา]มาใส่ในเข้ง หลือว่ากะต่า

Basic vocabulary — page 18 — Series B, pictures 14-17: motorbike, petrol gauge, petrol station

14
นี้คืออี่หยัง นี้คือมอเตอไซ
มอเตอไซอันนี้เอาไว้ถ้าเฮ็ดหญัง เอาไว้ถ้าขี่ เอาไว้ถ้าขับนั้นหนะ เอาไว้ถ้าเดินทาง เอาไว้ถ้าขี่ไปข้างหน้า
มอเตอไซคันนี้นั่งได้จักคน กะนั่งได้หลายคนอยู่ นั่งได้สองคน สามคน สี่คนกะได้ แล้วแต่สิอัดกันไป แล้วแต่สินั่ง แล้วแต่สิขี่
มอเตอไซคันนี้มีสีอี่หยัง มอเตอไซคันนี้มีสีซมพู
ลดมอเตอไซต้องคือกันเบิดบ่ บ่ ลดมอเตอไซบ่คือกัน แล้วแต่ลุ้น แล้วแต่ยี่ห้อ
บางลุ้นกะสีส้ม บางลุ้นกะสีดำ บางลุ้นกะสีขาว บางลุ้นกะสีแดง แล้วแต่ยี่ห้อ แล้วแต่ลุ้นมัน
มอเตอไซแต่ละคันมีส่วนปะกอบบ่ กะมีอยู่ มอเตอไซกะมีส่วนปะกอบหลายอย่าง
แต่ละอย่างกะแตกต่างกันออกไป มอเตอไซกะมีล้อพ้อม ล้อเอาไว้ถ้าหมุน เอาไว้ถ้าแล่นไปข้างหน้า
เบกมอเตอไซกะเอาไว้ถ้าเบก ญามขี่เล็วๆ หลือมีเหดอี่หยังกะต้องเบก
มอเตอไซกะมีกะจกพ้อม มีไฟพ้อม กะจกเอาไว้ถ้าแญง เอาไว้ถ้าแญงส่องไปทางหลัง ไฟกะเอาไว้ถ้าส่องไฟ หลือแญงไฟไปข้างหน้า
ส่วนปะกอบของมอเตอไซกะมีอีกหลายสิ่งหลายอย่าง เฮากะบ่สามาดเอ่ยถึงได้ไปอีกเนาะ

15
นี้คืออี่หยัง นี้คือเกน้ำมัน เป็นเกบอกน้ำมัน หลือเป็นแนวบอกน้ำมันนั้นหละ ว่าน้ำมันเฮามีบ่ ว่าน้ำมันเฮามีบ่ หลือหลายปานใด หลือน้อยปานใด เฮากะสามาดเบิ่งอยู่หม้องนี้ได้
ตอนนี้ลดคันนี้มีน้ำมันบ่ บ่ ตอนนี้ลดคันนี้บ่มีน้ำมันเลย
ขั้นลดมีน้ำมัน เข็มอันนี้กะต้องหมุนไปทางขวา หลืออยู่ฝั่งขวามือ
เพาะสะนั้นแล้ว ลดคันนี้บ่มีน้ำมัน มันจั่งหมุนมาทางซ้าย
ขั้นลดคันนี้บ่มีน้ำมัน เขาต้องเฮ็ดจั่งใด เขากะต้องไปเติมน้ำมัน ไปเติมน้ำมันอยู่ปั้มน้ำมัน หลืออยู่หม้องที่มันมีขายน้ำมัน

16
นี้คืออี่หยัง นี้คือปั้มน้ำมัน หลือถังน้ำมัน เป็นปั้มน้ำมันนั้นหละ
ปั้มน้ำมันอันนี้เอาไว้เฮ็ดหญัง เอาไว้ถ้าเติมน้ำมัน พุใดอยากเติมน้ำมัน กะสามาดมาเติมอยู่หม้องนี้ได้
ลดคันใดๆ อยากเติมน้ำมัน กะต้องมาเติมอยู่หนี้
ลดใหญ่ หลือลดน้อย กะซ่าง ต้องมาเติมอยู่หนี้
ปั้มน้ำมันกะมีหลายที่หลายหม้อง อยู่หม้องนั้นกะมี อยู่หม้องนี้กะมี แล้วแต่ ขั้นอยู่หม้องนั้นมีถะหนนใหญ่ๆ หลือลดผ่านหลายๆ เขากะสิเฮ็ดปั้มน้ำมันไว้หั้น

17
เขากำลังเฮ็ดหญัง เขากำลังเติมน้ำมัน
อันนี้เป็นพะนักงาน เขากำลังเติมน้ำมันให้ลดมอเตอไซคันนี้อยู่
เป็นหญังเขาคือเติมน้ำมัน กะเพาะว่าลดคันนี้บ่มีน้ำมัน เขากะเลยเติมน้ำมัน เพื่อที่สิให้ลดคันนี้แล่นได้ หลือขี่ไปทางหน้าได้
ขั้นลดคันนี้บ่มีน้ำมัน ลดคันนี้กะแล่นไปข้างหน้า หลือขี่ไปข้างหน้า หลือใซ้งานบ่ได้เลย
แล้วเขาเติมน้ำมันใส่ใส กะเติมน้ำมันใส่ถังน้ำมัน ลดคันนี้มีถังน้ำมันพ้อม เพื่อที่สิเก็บน้ำมันไว้ในถังนั้น เพื่อที่สิใซ้งานได้ ให้ลดคันนี้ใซ้งานได้ หลือขี่ไปข้างหน้าได้

Basic vocabulary — Page 03 — Series B, pictures 12-17: book, book shelf, to take, to open, to read, to close, to put away

12
นี้คืออี่หยัง อันนี้เป็นหนังสือ หนังสือเหล้มบักใหญ่หนึ่ง เหล้มสีเขียว หนาตึ่บเอาโลด
หนังสือมีไว้เฮ็ดหญัง หนังสือกะมีไว้ถ้าอ่าน เอาไว้ถ้าให้ความลู้ ขั้นเฮาเปิดเบิ่งหนังสืออันนั้น หลือว่าเปิดอ่านหนังสืออันนั้น เฮากะสิมีความลู้เกี่ยวกับความลู้ที่มันมีอยู่ในหนังสืออันนั้น
แล้วหนังสือกะมีแนวขั้นหนังสือพ้อม สีแดงๆ นั้นหละ เอาไว้ถ้าขั้นหนังสือ สมมุดว่าเฮาอ่านฮอดหน้านั้นๆ แล้ว เฮากะเอาแนวขั้นหนังสือขั้นไว้ ญามแบบว่าเฮาเซาอ่านแล้ว หลือว่าอ่านฮอดหน้านั้น แล้วเฮาสิพักเบก หลือว่าบ่อยากอ่านอีกแล้ว สิกับมาอ่านมื้อใหม่ เฮากะเอาแนวขั้นหนังสือนั้นมาขั้นไว้ แล้วพอมื้อหลังเฮามาอ่าน เฮากะสิฮู้แล้วว่า เฮาฮอดหม้องนั้นแล้ว เฮาต้องอ่านต่อหม้องนั้น แล้วเฮากะเปิดหม้องที่เฮาขั้นไว้นั้นหละ เอาแนวขั้นสีแดงๆ นั้นหละขั้นไว้ อันนี้กะคือขั้นแนวขั้นหนังสือ

13
เขากำลังเฮ็ดหญัง เขากำลังสิเอาหนังสือ
เอาหนังสืออยู่ใส กะเอาหนังสืออยู่ในซั้นวางหนังสือ
เขาสิเอาหนังสือไปหญัง เขากะอาดสิเอาหนังสือนั้นไปอ่าน เขากะเลยสิเอาหนังสือนั้นไป
หนังสืออยู่เทิงซั้นนั้นมีจักเหล้ม กะมีหลายเหล้มอยู่ มีห้าหกเหล้มพุ้นหนะ เทิงสีซมพู สีเขียว สีแดง สีเหลียง สีฟ้า หลายเหล้มอี่หลีวางเฮียงกันอยู่

14
เขากำลังเฮ็ดหญัง เขากำลังเปิดหนังสือ
เขาเปิดหนังสือเฮ็ดหญัง เขากะอาดสิอ่านหนังสือ เขากะเลยเปิดหนังสือ
เขาเปิดหนังสือจักเหล้ม เปิดเหล้มเดียว เปิดเหล้มเดียวข้อหล้อ เหล้มสีเขียว มือข้างหนึ่งกะเปิดไปอีกฝั่งหนึ่ง มือข้างหนึ่งกะเปิดไปอีกฝั่งหนึ่ง
แล้วอี่หยังอยู่ตงกางหนังสือนั้นสีแดงๆ อันนั้นกะเป็นแนวขั้นหนังสือ เป็นแนวขั้นหนังสือเพื่อที่ว่าสิเอาไว้ถ้าขั้นหนังสือ ขั้นหน้านั้น ขั้นหน้านี้

15
เขากำลังเฮ็ดหญัง เขากำลังอ่านหนังสือ
เขาอ่านหนังสืออยู่กับใผ เขาอ่านหนังสืออยู่พุเดียวของเขานั้นหละ เขาอ่านอยู่พุเดียว
แล้วเขาอ่านหนังสืออยู่ใส เขาอาดสิอ่านอยู่โลงเลียน อาดสิอ่านอยู่บ้าน หลือว่าอาดสิอ่านอยู่ห้องสะหมุดกะได้
เขาอ่านหนังสือจักเหล้ม เขากะอาดสิอ่านหนังสือเหล้มเดียว เพาะว่าเฮาเห็นเขาจับหนังสืออยู่เหล้มเดียว บ่ได้มีหลายเหล้ม

16
เขากำลังเฮ็ดหญัง เขากำลังปิดหนังสือ เขาพุนี้กำลังปิดหนังสือ
เขาปิดหนังสือเฮ็ดหญัง เขากะอาดสิบ่อ่านแล้ว หลือว่าอาดสิเซาอ่านแล้ว เขากะเลยปิดหนังสือไว้ เพื่อที่ว่าอาดสิเอาไปเก็บ หลือว่าเอาไปเมี้ยนหม้องที่เขาเอามา

17
เขากำลังเฮ็ดหญัง เขากำลังเอาหนังสือไปเก็บไว้ซั้นวางหนังสือ
เป็นหญังเขาคือเอาหนังสือไปเก็บไว้ซั้นวางหนังสือ กะเพื่อว่าสิให้มันเป็นเลียบล้อย เป็นละเบียบเลียบล้อย เขากะเลยสิเอาไปเก็บไว้ซั้นวางหนังสือ เพื่อที่ว่าสิให้มันเบิ่งงาม หลือว่าเป็นละเบียบคือเก่า
ขั้นเขาเอาหนังสือออกมาแล้ว บ่ไปเก็บไว้หม้องเก่า คนอื่นที่เขาสิมาเบิ่ง หลือว่าอาดสิเอามาอ่าน เขากะหาเหล้มนั้นบ่พ้อ หาเหล้มนี้บ่พ้อ เพาะว่าคนที่เอาไปอ่านนั้น บ่มาเก็บไว้หม้องเก่า เอาไปอ่านแล้วกะเอาไปถิ้มไว้หม้องอื่น เอาไปวางไว้หม้องอื่น คนอื่นกะบ่สามาดหาเหล้มหนังสือนี้ได้

Basic vocabulary — page 17 — Series B, pictures 01-05: laundry, to wash, to dry, to fold

1
เขากำลังเฮ็ดหญัง เขากำลังซักผ้า เขาซักผ้าโตสีแดง เขาซักผ้าโตหนึ่ง
ซักผ้าอยู่ในกะละมัง กะละมังเป็นวงกม กะละมังใบบักใหญ่หนึ่งดอก กะละมังใบสีเขียว กะละมังอันบักใหญ่
เสี้ยโตนี้มันอาดสิสกกะปก หลือบ่สะอาด หลือบ่เป็นตาใส่ หลือเหม็นนั้นหละ เขากะเลยสิซักให้มันสะอาดกะได้
เขาซักผ้าอยู่ใส จักคือกัน ฮู้แต่ว่าเขาซักผ้าอยู่ในกะละมัง กะละมังใบวงกม กะละมังใบบักใหญ่หนึ่ง ใบสีเขียว
เขาใซ้มือของเขาสองข้างนั้นหละ ซักเสี้ยโตนี้ ใซ้มือสองข้างของเขาซักเสี้ยโตนี้ให้มันสะอาด หลือให้มันดูดีขึ้น หลือให้มันเป็นตาเบิ่งนั้นหละ

2
เขากำลังเฮ็ดหญัง เขากำลังซิดผ้า หลือสะหลิดผ้านั้นหละ เพื่อที่สิให้มันหมาดๆ เพื่อที่สิให้เสี้ยโตนี้มันหมาด หลือบ่ให้มีน้ำติดอยู่ในเสี้ยโตนี้
เสี้ยโตนี้มันเปียกแม่นบ่ แม่น เสี้ยโตนี้มันเปียก เพาะว่าหัวกะซักมา เพาะว่าหัวกะซักมาจากน้ำ มันกะเลยเปียก เสี้ยโตนี้มันเปียกอยู่
คือฮู้ว่าเสี้ยโตนี้มันเปียก กะฮู้ เพาะว่าน้ำมันไหลออกมาจากเสี้ยโตนี้ ในเสี้ยโตนี้มันเปียกอยู่ มันมีน้ำพ้อม กะเลยฮู้ว่ามันเปียกอยู่
ตอนนี้เขาถือเสี้ยอยู่แม่นบ่ แม่น เขาถือเสี้ยอยู่ เขาจับเสี้ยอยู่ เขาใซ้มือของเขาสองข้างจับเสี้ยอยู่ คือสิสะหลิดเสี้ยอยู่ เพื่อที่สิให้น้ำมันออกจากเสี้ยโตนี้หละ
ต่อจากนี้แล้วเขาสิเฮ็ดอี่หยังต่อ เขากะอาดสิเอาไปตาก หลือเอาไปตากอยู่ฮาวตากผ้ากะได้

3
เขากำลังเฮ็ดหญัง เขากำลังสิตากผ้า เขากำลังสิเอาเสี้ยโตนี้หละไปตากอยู่ในฮาว หลือตากใส่แดด เพื่อที่สิให้เสี้ยโตนี้มันแห้ง
เขาตากเสี้ยโตนี้จั่งใด เขาตากอยู่ฮาว อยู่ฮาวตากผ้านั้นหละ เป็นฮาวเซียก หลือฮาวอี่หยังบุ อาดสิเป็นฮาวเหล็กกะได้
เขาใซ้มีแนวหนีบสองอัน ใซ้แนวหนีบสองอันนั้นหละ หนีบเสี้ยโตนี้ หนีบฝั่งซ้ายกับฝั่งขวา เพื่อที่สิให้มันอยู่ เพื่อที่สิให้มันติดกับฮาวอันนี้ แล้วกะตากแดดต่อไป
เป็นหญังเขาคือตากอยู่ฮาว เพาะว่าสิให้เสี้ยโตนี้มันถืกแดด แล้วให้มันแห้งเล็วขึ้น เพื่อที่สิสามาดใซ้ได้ หลือให้มันแห้งแล้วกะเอาไปใส่

4
ตอนนี้เป็นอี่หยังอยู่ เสี้ยโตนี้กำลังตากอยู่ ตากอยู่ฮาวเก่านั้นหละ ตากอยู่ในฮาว
เสี้ยโตนี้เสี้ยแขนสั้น เสี้ยสีแดง ตากอยู่โตเดียว ตากอยู่ฮาวกางเดิ่นกางลานอี่หยังกะบ่ฮู้
แล้วเสี้ยโตนี้มันกะถืกแดดพ้อม แดดกะส่องมาใส่เสี้ยโตนี้ แล้วกะเฮ็ดให้เสี้ยโตนี้แห้ง แล้วกะบ่ให้เสี้ยโตนี้เปียกคือเก่า แล้วน้ำมันกะสิละเหยขึ้น เพาะว่ามันมีแดด แดดมันส่อง แล้วเฮ็ดให้เสี้ยโตนี้มันแห้ง
เสี้ยโตนี้ใซ้เวลาโดนบ่มันจั่งสิแห้ง กะใซ้เวลาโดนอยู่ ขั้นแดดมันฮ้อนคัก มันกะสิใซ้เวลาบ่โดน
ขั้นมันบ่มีแดด หลือแดดมันบ่ค่อยฮ้อน มันกะใซ้งานโดน หลือใซ้เวลาโดน กว่าเสี้ยโตนี้มันสิแห้ง

5
เขากำลังเฮ็ดหญัง เขากำลังพับผ้า เอาผ้าที่ตากนั้นหละเอามาพับ เพื่อที่สิเก็บให้มันเลียบล้อย เพื่อที่สิให้มันเป็นละเบียบเลียบล้อย
เป็นหญังเขาคือพับผ้า กะจักคือกัน เขาอาดสิให้มันดูดีขึ้น หลือเป็นละเบียบเลียบล้อยนั้นหละ เขากะเลยพับผ้า
เอาผ้าที่ตากนั้นหละ เอามาพับ เพื่อที่สิให้มันเป็นละเบียบขึ้นกว่าเก่า หลือให้มันเป็นตาเบิ่งกว่าเก่า
พอพับผ้าแล้วสิเอาไปเก็บอยู่ใส สิเอาเสี้ยโตนี้ไปเก็บใส กะเอาเสี้ยโตนี้ไปเก็บในตู้ ขั้นพับแล้วกะเอาไปเก็บไว้ในตู้ หลือซั้นเก็บเสี้ยผ้า เพื่อที่สิให้มันเป็นละเบียบ
ขั้นมีเสี้ยหลายๆ โต แล้วไปพับวางกัน วางถ้อนกัน วางซ้อนกันอยู่ในตู้ แล้วมันสิเป็นตาเบิ่งบ่ กะเป็นตาเบิ่งอยู่ ขั้นมีเสี้ยหลายๆ โตพับ แล้วกะวางซ้อนกันหลายๆ โต มันกะสิเป็นตาเบิ่ง เป็นละเบียบเลียบล้อย