Tones: M = mid, HR = high-rising, H = high, HF = high-falling, LF = low-falling
| Isaan | Pronunciation | Tones | Thai | English/Notes | #occ |
|---|---|---|---|---|---|
| ซื่อๆ | sʉ: | H | เฉยๆ | 1. just so 2. so-so |
19/17 |
Link to overview page
Link to dictionary
BCF01 Greetings and leave takings (informal) — Dialogue A
— บ่ได้มาเฮ็ดหญัง มาเหล้นซื่อๆ มาหากินเข้า
— เออๆ กูไปก่อนเด้อ
— เออๆ ไบบ่าย
Vocabulary recordings — Planting rice 04
แล้วกะเฮากะสิถ้าจนเข้าซุมนี้มันเกิด จนมันใหญ่ บ่ต้องเฮ็ดอี่หยังอีกเลยนอกจากใส่ปุย หลือว่าหาแนวบำลุงให้มันซื่อๆ เนาะ แล้วกะถ้าจนมันใหญ่ จนได้เกี่ยวเข้าส่ำนั้น เฮาบ่ต้องเฮ็ดอี่หยัง เป็นวิทีที่ง่ายพอสมควนเนาะ
Basic vocabulary — Page 23 — Series B, pictures 06-08: to work out/exercise, to swim, to lift weights
เขากำลังเฮ็ดหญัง เขากำลังออกกำลังกาย เขากำลังแล่นออกกำลังกาย
เขาแล่นอยู่จักคน เขาแล่นอยู่พุเดียว
แล้วเขาแล่นออกกำลังกายเฮ็ดหญัง เขากะอาดว่า อยากสิมีล้างกายแข็งแลง เขากะเลยสิแล่นออกกำลังกาย
แล้วเขาแล่นออกกำลังกายจั่งใด เขากะแล่นไปเลี้ยยๆ ปะสาแล่นออกกำลังซื่อๆ มันกะได้กำลังมาแล้ว กะสิเฮ็ดให้เฮาสุกขะพาบล้างกายแข็งแลง
7
เขากำลังเฮ็ดหญัง เขากำลังหว้ายน้ำ
เขาหว้ายน้ำเฮ็ดหญัง เขากะอาดสิฮ้อน หลืออาดสิอยากเหล้นน้ำ เขากะเลยมาหว้ายน้ำอยู่หนี้
แล้วเขาหว้ายน้ำอยู่ใส อาดสิหว้ายอยู่ในสะน้ำกะได้ อาดสิหว้ายอยู่ในทะเลกะได้ แล้วแต่เขาสิหว้ายอยู่ใส
8
เขากำลังเฮ็ดหญัง เขากำลังออกกำลังกายคือกัน เขากำลังออกกำลังกาย
เขาออกกำลังกายจั่งใด เขากะญกแนวญก
อันนี้มันเป็นแนวญก มีแนวญกฝั่งซ้าย กับ[แนวญก]ฝั่งขวา เขาใซ้มือสองข้างของเขาญกแนวญกขึ้นมา แล้วกะญกขึ้นญกลง
เพาะว่าเขาสิออกกำลังกาย เคี่ยงญกอันนี้ หลือว่าแนวญกอันนี้ มันเฮ็ดให้เฮามีกำลังมือกำลังแขนได้
Basic vocabulary — Page 23 — Series B, pictures 16-17: spade, to dig
อันนี้คืออี่หยัง อันนี้เป็นพั้ว
พั้วนี้เอาไว้ถ้าเฮ็ดหญัง พั้วนี้กะใซ้ได้หลายอย่าง เอาไว้ไปตักดิน ตักปุย ตักอี่หยังกะได้ที่เฮาสิสามาดเอามันไปตักได้
พั้วเฮ็ดมาจากอี่หยัง กะเฮ็ดมาจากเหล็ก หลือว่าเหล็กเปๆ
พั้วนี้ค้ายๆ กับบักจกคือกัน แต่ว่ามันก่นบ่ได้ แต่ว่าสามาดซ้วนได้หลือว่าตักขึ้นมาได้
มันกะสิต่างจากบักจกหน่อยหนึ่ง ขั้นบักจกกะสามาดขุดได้ ก่นได้ ตักขึ้นมากะได้ แต่อันนี้เอาไว้ถ้าตักขึ้นมา ซ้วนขึ้นมาซื่อๆ ก่นกะก่นได้ ก่นได้หน่อยเดียว บ่สามาดก่นได้ลึก
17
เขากำลังเฮ็ดหญัง กะมีพุซายพุหนึ่ง เขากำลังใซ้พั้วอันหนึ่งนี้หละ กำลังจับพั้ว แล้วกะตักดิน อาดสิซ้วนดินขึ้นมา หลือว่าตักดินขึ้นมาจากในหลุมกะได้
แล้วเขาไปตักดินหลือว่าไปเฮ็ดอี่หยังอยู่หั้น เขากะอาดสิเฮ็ดปูกผัก หลือว่าเฮ็ดสวนนั้นสวนนี้ ปูกอันนั้นปูกอันนี้ เขากะเลยใซ้พั้วอันนี้ไปตักดิน หลือว่าไปพวนดินกะได้
Basic vocabulary — Page 33 — Series B, pictures 07-08: cabbage, to cut in half
นี้คืออี่หยัง อันนี้คือผัก
ผักอี่หยัง อันนี้เป็นผักกะหล้ำ หลือว่าผักกะหล้ำปีเนาะ ผักกะหล้ำปีสีเขียว ผักสีเขียวเนาะ
แล้วผักอันนี้มันคือเป็นหัววงกม เป็นหัวกมๆ จั่งซั้น หลือว่าเป็นอันวงกมจั่งซั้น มันกะเป็นผักกะหล้ำ มันกะเป็นลูบแบบนี้ เป็นลักสะนะแบบนี้ เป็นซงแบบนี้ มาแต่ใดเนาะ เขาเอิ้นว่าผักกะหล้ำเนาะ
แล้วผักกะหล้ำอันนี้มันกินได้บ่ กินได้หละเนาะ กะกินได้คือกันกับผักอันอื่น ผักแนวอื่น กินได้คือกัน
เอาไปเฮ็ดแนวกิน เอาไปเฮ็ดกินเหล้น กินเป็นผักเหล้นๆ สดๆ กะได้
หลือว่าเอาไปปุง ไปผัด ไปเฮ็ดเป็น[...] ไปลวก ไปต้ม กะได้เนาะ
แล้วผักอันนี้มันขมบ่ บ่ ผักอันนี้มันบ่ขม มันออกหวานๆ จักหน่อย แล้วแต่คนมักดอกวากัน บางคนกะว่าหวาน บางคนกะว่าซื่อๆ หลือว่าบ่หวานเนาะ แต่ว่ามันบ่ได้ขม
แล้วผักกะหล้ำหนิ มันเป็นหัว แล้วหัวมันหนิเป็นคือกับบักแตงโมบ่ ต้องผ่าออกบ่ บ่ มันกะสิมีใบ ใบหุ้มหลายๆ ใบ หุ้มกันๆๆ ซ้อนกันๆ แล้วมันกะสิเป็นวงกมแบบจั่งซี้เนาะ มันกะสิมีเป็นใบน้อยๆ เป็นหัวน้อยๆ อยู่ข้างใน แล้วกะมีใบหลายๆ ไปห่อเข้าๆๆ ห่อ ใส่ ห่อกันๆๆ ซ้อนกันๆ มันกะสิเป็นหัวใหญ่ๆ เป็นหัววงกมคือจั่งเฮาเห็นเนาะ
8
เขากำลังเฮ็ดหญัง เขากำลังใซ้มีดผ่าหลือว่าหั่นผักกะหล้ำเนาะ ผ่าเป็นสองซิ้น หลือว่าหั่นเป็นสองซิ้น สองส่วนเนาะ ให้มัน บ่ฮู้ว่าเขาสิเฮ็ดหญัง อาดสิเอาไปแกง ไปต้ม ไปผัด บ่ฮู้คือกันเนาะ แล้วแต่เขาสิเฮ็ดอี่หยัง
Basic vocabulary — Page 26 — Series B, pictures 15-17: tooth, to eat, meat balls, dog, to bite, leg
อันนี้เป็นอี่หยัง อันนี้เป็นแข้ว เขาเอิ้นว่าแข้ว
แข้วของคนนี้หละ เบิ่งซงแล้วอันบักใหญ่หนึ่ง
แข้วคนนี้มีไว้เฮ็ดหญัง มีปะโยดอี่หยัง กะเอาไว้ถ้ากัดนั้นกัดนี้ กินนั้นกินนี้
แข้วนี้มันอยู่ในปากเด๊ มันอยู่ในปาก เป็นอะวัยยะวะอันหนึ่งของคน
แล้วสัดอื่นๆ กะมีแข้วคือกัน ซู่โตกะสิมีแข้วเนาะ กะสิซ้าง ม้า งัว ควย มีเบิดซู่โต ซู่สิ่งซู่อย่างสิมีแข้วเบิดซู่โต แต่ว่าบางสัดกะสิบ่มีแข้วเนาะ กะสิมีปากซื่อๆ บ่มีแข้ว
16
เขากำลังกัดกินอี่หยังอย่างหนึ่งนี้หละ เบิ่งไปคักๆ หนิ คือสิเป็นลูกซิ้นเนาะ หลือว่าเป็นซิ้นเนี้ยเนาะ เป็นย้างเนี้ย เป็นคำๆ อยู่ เขากำลังสิกัดกิน
เบิ่งซงแล้ว อาดสิมีสี่ต่น กินไปแล้วต่นหนึ่ง กำลังสิกินอีกต่นหนึ่ง ตอนนี้มันเหลียสามต่น กินเข้าไปในปากแล้วต่นหนึ่ง เหลียสามต่น
ตอนนี้กำลังสิกัดอีกต่นหนึ่งเนาะ เขาใซ้แข้วของเขาหละ ข้างหลังข้างเทิงกัด ม่ำเข้าไป กำลังสิกัดเข้าไป คือสิแซบคักแซบนัวเนาะ
17
เกิดอี่หยังขึ้น กะมีหมาโตหนึ่งนั้นหละ แล่นไปงับขาเขา เหลียวเบิ่งดูพุ้นหนะ แล่นไปงับขา ไปกัดขาพุซายพุหนึ่ง
คือสิเจ็บคักเจ็บแน่เนาะ เจ้าว่าเป็นตาเจ็บบ่ กะสิเจ็บอยู่แล้ว กะสิเจ็บคักอยู่แล้วเนาะ เบิ่งซงแล้ว หมา แข้วหมามันกะแหลม มันกะคมคักเนาะ กัดเข้าไปกะเจ็บคักเติบพุ้นแหล้ว
ขั้นหมากัดหนิมันอันตะลายบ่ กะอันตะลายเติบพุ้นแหล้ว กะต้องไปหาหมอ ไปให้หมอสีดยาพุ้นแหล้ว ขั้นบ่ไปกะ อาดสิเป็นหมาบ้า หลือว่าเป็นหมาว้อกะได้ เพาะว่าพิดสุนักบ้ามันมีอยู่ในหมาทุกโต ขั้นบ่ไปลักสาหลือว่าไปสีดยากับหมอ ไปเอายากับหมอ กะอาดสิเกิดอันตะลายได้
Basic vocabulary — page 17 — Series B, pictures 13-15: notebook, to charge
นี้คืออี่หยัง นี้คือโน่ดบุ่ก เป็นโน่ดบุ่ก เอาไว้ใซ้งาน ค้ายๆ กับค็อมพิวเต้อ แต่ว่าอันนี้เป็นโน่ดบุ่ก สามาดพกพาได้ สามาดถือไปใสกะได้
สิต่างจากค็อมพิวเต้อ แต่ว่าใซ้งานค้ายๆ กับค็อมพิวเต้อ คือๆ กับค็อมพิวเต้อนั้นหละ แต่อันนี้สามาดถือไปใซ้งานทางอื่นได้ สามาดเคื้อนที้ได้
แต่ว่าค็อมพิวเต้อบ่สามาดเคื้อนที้ได้ ค็อมพิวเต้อเอาไว้แต่ไว้บ้าน หลือเอาไว้หม้องแห่งงานซื่อๆ บ่สามาดถือไปนำได้
ส่วนปะกอบของโน่ดบุ่กนี้ กะสิมีหน้าจอพ้อม มีแป้นพิมพ้อม หลือมีเมาพ้อม แต่ว่าในลูบนี้เฮาแนมบ่เห็นเมาเนาะ
กะสิสามาดใซ้งานได้คือค็อม หลือสามาดใซ้งานค้ายๆ กับค็อมพิวเต้อได้คือกันทุกอย่าง
โน่ดบุ่กอันนี้สามาดใซ้งาน หลือเฮ็ดได้คือกันกับค็อมพิวเต้อ คือกันทุกอย่าง
โน่ดบุ่กอันนี้มีลาคาแพงบ่ กะแพงอยู่ กะแพงคือกัน แพงคัก
แต่ว่า กะแล้วแต่ยี่ห้อ แล้วแต่ลุ้นของมัน ลุ้นแพงกะแพง ลุ้นถืกกะถืก ขั้นลุ้นแพงหลาย กะสามาดใซ้งานได้โดน ขั้นลุ้นถืกหลาย กะสามาดใซ้งานได้แป่บเดียว หลือสามาดใซ้งานได้บ่โดนนั้นหละ
14
เขากำลังเฮ็ดหญัง เขากำลังเหล้นโน่ดบุ่ก เขากำลังใซ้งานโน่ดบุ่กอยู่
เขาเหล้นโน่ดบุ่กเฮ็ดหญัง อันนี้กะบ่ฮู้คือกัน จักว่าเขาเฮ็ดงาน หลือเหล้นเกม หลือเฮ็ดอี่หยังกะบ่ฮู้ แต่ว่า ฮู้แต่ว่าเขาใซ้งานโน่ดบุ่กนี้อยู่ เขากำลังเหล้นโน่ดบุ่กนี้อยู่
15
เกิดอี่หยังกับโน่ดบุ่กอันนี้ กะบ่ได้เกิดอี่หยังขึ้น กะฮู้แต่ว่าเขากำลังซ่าดแบ็ดอยู่ ซ่าดแบ็ดโน่ดบุ่กอันนี้อยู่
เป็นหญังเขาคือซ่าดแบ็ด โน่ดบุ่กอันนี้อาดสิแบ็ดเบิด หลือบ่มีแบ็ดเตอลี้แล้วกะได้ เขากะเลยซ่าดแบ็ด เพื่อที่สิสามาดใซ้งานได้
ขั้นโน่ดบุ่กอันนี้บ่มีแบ็ดเตอลี้ หลือบ่มีแบ็ด กะบ่สามาดเหล้นได้ หลือบ่สามาดใซ้งานได้
เพาะสะนั้นแล้ว ขั้นสิเหล้นโน่ดบุ่กอันนี้ โน่ดบุ่กอันนี้ต้องมีแบ็ด หลือมีแบ็ดเตอลี้
ขั้นโน่ดบุ่กอันนี้บ่มีแบ็ดเตอลี้ เฮากะต้องซ่าดแบ็ด ซ่าดแบ็ดกับไฟฟ้า หลือมีปั่กไฟเซี้ยมจากโน่ดบุ่กกับปั่กไฟของเฮา หลือปั่กไฟอยู่บ้าน
Basic vocabulary — Page 31 — Series B, pictures 11-13: to dream, cat, fish, dog, bone, girl, school
นี้คืออี่หยัง อันนี้เป็นแมว แมวโตหนึ่งนั้นหละ
มันกำลังนอนหลับซ้ำแมะ กำลังนอนหลับแซบๆ อยู่พุ้นหนะ นอนโตเดียวของมันข้อหล้อนั้นหละ
หลับตา งับปากพ้อมพุ้นแหล้ว นอนหลับ อุ้ย นอนหลับแซบคักแซบแน่เนาะ
กำลังฝันพ้อมพุ้นแหล้ว มันกำลังฝันฮอดปาโตหนึ่ง
มันกำลังฝันเห็นปาโตหนึ่ง
คือแบบว่ากำลังสิหิวเข้าพอดีนั้นหละ ว่ากำลังสิคิดพ้ออยากกินเข้า กะเลยฝันเห็นฮอดปาพอดี กำลังอยากได้กินปาพุ้นหละเนาะ
แล้วความฝันเนี้ย ขั้นเฮาฝันพ้อปา เฮาสิได้กินปาอี่หลีบ่ กะบ่ ความฝันมันเป็นสิ่งที่มันจินตะนาขึ้น จินตะนากานขึ้น หลือว่ามันเป็นแค่ความคิดที่มัน ที่เฮานอนหลับ แล้วเฮาคิดขึ้นเอง หลือว่าความคิดมัน เป็นสิ่งที่มันคิดขึ้นเอง เฮาบ่สามาดเห็นโตแท้ของจิงๆ ที่เฮา ของแท้ๆ ที่เฮาฝันฮอดหลือว่าฝันเห็นได้เนาะ
12
อันนี้คืออี่หยัง กะเป็นหมาเนาะ มีหมาโตหนึ่ง หมาโตสีเทาเนาะ กำลังนอนหลับอยู่
คือสินอนหลับแซบหลับนัวคัก เหลียวเบิ่ง ฝันเห็นฮอดกะดูกพ้อม กะดูกอันบักใหญ่พุ้นแหล้ว ฝันเห็นฮอดกะดูก
แล้วหมาโตนี้กำลังฝันเห็นกะดูก มันสิได้กินกะดูกแท้ๆ บ่ กะบ่เนาะ เพาะว่ามันเป็นแค่ความฝัน มันเป็นแค่เลี่ยงที่มันสมมุดขึ้น หลือว่าเลี่ยงที่มันจินตะนาขึ้น จินตะนากานขึ้น ในความฝันของเฮาซื่อๆ เนาะ
13
อันนี้คืออี่หยัง กะมีพุหญิงพุหนึ่งเนาะ กำลังนอนหลับอยู่
นอนหลับอยู่เทิงเตียงนอนพุ้นแหล้ว ห่มผ้าพ้อม หมุนหมอนพ้อม หมอนกะสีเหลียง ผ้าห่มกะสีฟ้า กำลังนอนอยู่เทิงเตียงนอนเนาะ
กำลังฝันพ้อมพุ้นแหล้ว คือสินอนหลับแซบคัก ฝันบ่ฮู้อีโหน้อีเหน้เนาะ ฝันฮอดโลงเลียน
อาดสิว่าเขากำลังอยากไปโลงเลียนพอดี กำลังสิได้ไปโลงเลียน แล้วกะฝันฮอดบางสิ่งบางอย่างนั้น
แต่ว่าความฝันหนิ บางสิ่งเนาะ ขั้นเฮาได้พ้อใน พ้อเลี่ยงใดเลี่ยงหนึ่ง หลือว่าพ้อเลี่ยงนั้นดุๆ หลือว่าคิดฮอดเลี่ยงนั้นดุๆ หลือว่าเว้าฮอดเลี่ยงที่เลี่ยงบางเลี่ยงดุๆ เฮาอาดสิเก็บมาฝันหลือว่าเก็บมาคิดกะได้เนาะ
Basic vocabulary — Page 32 — Series B, pictures 06-07: to greet/pay respect
มีคนสองคนเขากำลังเฮ็ดหญัง สองคนนี้อาดสิเป็นคนที่ฮู้จักกัน หลือว่าหัวกะฮู้จักกันกะได้
เขากำลังไหว้กัน หลือว่าหวัดดีกัน หลือว่าเขาอาดสิหัว[ได้]พ้อกัน หลือว่าหัวแต่สิเห็นกัน หัวแต่สิมาเห็นกัน หลือว่านัดกัน หัวกะพ้อกันเนาะ กะไหว้กัน หลือว่าหวัดดีกัน ทักทายกันตามปะสาคนที่ฮู้จักกัน หลือว่าบ่ฮู้จักกันกะได้เนาะ
เขากำลังไหว้กัน อาดสิมีพุหนึ่งเลิ้มก่อนหลือว่าเลิ้มพ้อมกันกะได้ กานไหว้เนาะ แล้วกะทักทาย สะหวัดดีคับ สะหวัดดีคับ เป็นจั่งซั้นจั่งซี้ กะทักทายกันต่อไปเนาะ
แต่ว่าขั้นสองคนนี้ ขั้นมาพ้อกัน แล้วบางคนอาดว่าสิเป็นน้องหลือว่าอายุน้อยกว่า หลือว่าบางคนสิอายุหลายกว่า ขั้นพุใดที่มีอายุน้อยกว่า หลือว่ามีหน้าที่มีอายุที่น้อยกว่า กะให้เป็นคนหวัดดีก่อน หลือว่าไหว้ก่อนเนาะ เพื่อที่ว่าตามมาละย้าด แล้วกะพุอายุน้อยหลือว่าพุเป็นน้องหนะ กะไหว้ก่อน แล้วกะพุมีอายุหลายกว่า หลือว่าพุอาวุโสกว่า กะสิลับไหว้นั้นต่อไปกับไปเนาะ
7
สองคนนี้เขากำลังเฮ็ดหญัง เขากะกำลังทักทายกันเนาะ เขากะมีพุใหญ่กับเด็กน้อย เขากำลัง หัวอาด อาด แบบว่า อาดสิหัวแต่พ้อกัน หลือว่ามาพ้อกัน หัวกะพ้อกันเนาะ กะหวัดดีกัน หลือว่าทักทายกัน กะอย่างที่ว่าเนาะ เด็กน้อย พุใดที่มีอายุน้อยกว่า หลือว่าอายุน้อยกว่า ให้ไหว้พุที่อายุหลายกว่า
แล้วกะมีพุหนึ่งเป็นเด็กน้อย พุหนึ่งเป็นพุใหญ่เนาะ พุใส่เสี้ยสีซมพูกะเป็นเด็กน้อยกว่า กะเลยต้องไหว้ก่อน กะไหว้พุที่เป็นอาวุโสกว่าหลือว่าอายุหลายกว่า กะไหว้ แล้วกะทักทายไป แล้วกะคนที่อายุหลายกว่าอาดสิไหว้ตอบลับ หลือว่าหวัดดีคับ หลือว่าหวัดดีค้า ตอบแค่เป็นกาน เป็นคำเว้าซื่อๆ กะได้ คำว่า สะหวัดดีคับ สะหวัดดีค้า ซื่อๆ กะได้ บางคนอาดสิญกมือตอบลับไหว้พ้อมกะได้ หลือว่าบ่ใซ้มือไหว้กะได้เนาะ
Basic vocabulary — Page 01 — Series B, pictures 04-10: cat, to sit, to jump, chair, to sleep, to eat, fish, to walk, to look at, bird
นี้คืออี่หยัง อันนี้เป็นแมว แมวโตหนึ่ง ตาฮักๆ
แล้วแมวมันเฮ็ดอี่หยังอยู่ มันกำลังนั่งอยู่ มันนั่งอยู่สะหนามหญ้า มันนั่งอยู่โตเดียวข้อหล้อ
มันมีหางของมันพ้อม หางของมันญาวๆ ญาวบักคักหนึ่ง
5
แมวโตนี้มันกำลังสิเฮ็ดหญัง แมวโตนี้มันกำลังสิกะโดด มันสิกะโดดขึ้นโต่ะ จักว่ามันสิกะโดดไปเฮ็ดหญัง
มันกะโดดจักโต มันกะโดดโตเดียว โตเดียวข้อหล้อของมันนั้นหละ กำลังญกขาหน้า กำลังญกขาหน้าสิกะโดดขึ้นไปเทิงโต่ะ มันอาดสิกะโดดขึ้นไปนอน หลืออาดสิกะโดดขึ้นไปเหล้นกะได้
แล้วโต่ะที่มันสิกะโดดขึ้นนั้นสูงบ่ บ่ บ่สูงปานใดดอก ขั้นมันสูงมันกะสิกะโดดขึ้นบ่ได้ ขั้นมันสูงหลายมันกะบ่สามาดกะโดดขึ้นไปได้
6
แมวมันกำลังเฮ็ดหญังอยู่ แมวมันกำลังนอนหลับอยู่ นอนเป็นตามีแฮงๆ มันนอนอยู่เทิงโต่ะนั้นหละ โต่ะที่มันหัวแต่กะโดดขึ้นไปนั้นหละ
โต่ะอันนี้กะพอดีๆ พอดีกับโตมันเอาโลด มันกะได้นอนพอดี โตมันกะส่ำโตพอดี นอนเป็นตามีแฮงหลาย กำลังกนก้อกๆ อยู่พุ้นหนะ
7
แมวมันกำลังเฮ็ดหญัง มันกำลังกะโดด มันกะโดดลงพื้น
วั่งหั้นมันอยู่เทิงโต่ะ มันกะเลยสิกะโดดลงพื้น หลือว่ากะโดดลงจากโต่ะ
แล้วมันกะโดดเล็วบ่ หลือว่ากะโดดไวบ่ จักคือกัน กะสิไวอยู่นั้นหละ มันอาดสิฟ้าวกะโดดลงกะได้ จักว่ามันสิไปใส มันอาดสิบ่อยากอยู่เทิงโต่ะนี้แล้วกะได้ มันกะเลยสิกะโดดลงไป
8
แมวมันเฮ็ดหญังอยู่ มันกำลังกินปา มันกำลังกัดกินปาอยู่
มือของมันเทิงสองข้างกำลังจับปาอยู่ แล้วปากของมันกะกัดปาขึ้นมากิน เป็นตาแซบหลาย คือสิแซบคัก
ปากะโตบักใหญ่หนึ่ง มันคือสิมีความสุขหลายที่มันได้กินปาโตนี้
9
แมวโตนี้มันสิญ่างไปใส จักคือกัน จักว่ามันสิญ่างไปใส
เห็นแต่มันญ่างไปข้างหน้าอยู่ จักว่ามันสิญ่างไปใส จักสิญ่างไปทางพุ้น หลือญ่างไปทางพี้ เฮากะบ่ฮู้คือกันเนาะ
แมวโตนี้เบิ่งซงแล้วเป็นตามีความสุขบ่ หางมันกะซี้โก่งโด่งอยู่พุ้นหนะ เป็นตามีความสุขหลาย
10
แมวมันกำลังเฮ็ดอี่หยัง มันกำลังแนมขึ้นฟ้าพุ้นหนะ
แล้วมันแนมไปเฮ็ดหญัง มันแนมเบิ่งนก มันอาดสิเห็นนกโตหนึ่งอยู่เทิงฟ้า มันกะเลยแนมขึ้นไปกะได้ มันอาดสิอยากกินนกโตนั้นกะได้ มันกะเลยแนมขึ้นไป
นกโตนั้นกะกำลังบินอยู่เทิงฟ้าพุ้นหนะ แมวโตนี้กะได้แต่แนม แล้วกะแนมเบิ่งซื่อๆ เฮ็ดหญังกะบ่ได้ กะได้แต่แนม
Stories — Dog getting dirty
มื้อนี้เนาะหอั้น มีเลี่ยงหนึ่ง มีเลี่ยงหนึ่งเนาะ สิมาเว้าให้ฟัง เลี่ยงหมาน้อยหนิหละ หมาน้อยของข้อยหนิหละ เป็นหมาน้อยโตหนึ่งเนาะ หมาน้อยหอั้น โตน้อยๆ นี้หละ พุข้าเอามาเลี้ยง เอามาเลี้ยงใหม่หละ หัวกะเอามาเลี้ยงเนาะ เป็นหมาน้อย หมาพัน จักพันอี่หยังบุ โตน้อยๆ ตาฮักๆ ดอก ตาฮักอี่หลี หมาน้อยหนิกะเดย ขนสีน้ำตานพุ้นแหล้ว ขนญาวฟูบักคักพุ้นหละ ขนมันกะเดย งามอี่หลี งามคักงามแน่ สะออนหลาย พาไปหม้องนั้นหม้องนี้ มีแต่คนสะออน เขาสะออนคัก เขาสะออนหลาย ญ้อนว่ามันตาฮักหลาย มันตาฮัก
เทิงขี้มึน หมาอี่หยังมามึนกะด้อกะเดี้ย ขี้มึนหลาย หมาโตหนิกะเดย มีหอั้นเลี่ยงหนึ่งหนิหละ มาเว้าเลี่ยงหมาน้อย สิเว้าเลี่ยงหมาน้อยให้ฟัง มื้อนั้นหอั้น เลิกเลียนมาแล้ว มื้อวานนั้นหละเนาะ บ่แม่นมื้อนั้นดอก มื้อวานนั้น เลิกเลียนมาแล้ว หอั้นกะเลยกับบ้าน มาเอาหมาหอั้นสิพามันไปแล่นเหล้น อยู่สะหนามหญ้า อยู่โลงเลียนพุ้นหละ มื้อวานนั้นกะพามันไปแล่นเหล้น โอ๊ย หมากะมึนคักมึนแน่ พามันไปเหล้น ไปหาหมู่พุ้นหละ หาหมู่หมามันคือกันหละ หมู่ของข้อยกะเลี้ยงหมาคือกัน มีสี่ห้าคนพุ้นหละ พากันเลี้ยง คนละโตสองโต เลี้ยงแล้วกะมาเหล้นอยู่นำกันบัดหนิ เลี้ยงอยู่ในหอั้น เอามาหอั้นเหล้นอยู่สะหนามหญ้านั้นหละ อยู่สะหนามหญ้า [...] อยู่โลงเลียนนั้นหละ แล้วกะเอาหมาเหล้นนำกันบัดหนิ โอ๊ย หมาพ้อกันกะม่วนกุ่บ แล้วบัดนี้มันพ้อกันหนะ หลายโตเนาะ กะมีความสุข แล้วหมาได้แล่นเหล้นนำกัน แล่นยอกกัน ก่องแก่งๆ อยู่ แล่นอยู่นำสะหนามหญ้านั้นหละ โตหนึ่งกะแล่นไปทางซ้าย โตหนึ่งกะแล่นไป[ทาง]ขวา โตหนึ่งกะแล่นยอกกัน แล่นเหล้น มึนคักมึนแน่
บัดนี้หมาของข้อยบัดหนิ โตนั้นหละ โตตาฮักๆ นั้นหละ มึนกว่าหมู่บัดหนิ แล่นไปใสบ่แล่น แล่นลงคองน้ำพุ้นหนะ โอ๊ย คองน้ำน้อยๆ ดอกว่า แต่ว่า มันกะคองใหญ่พอสมควนหนิหละ มันกะแล่นลงไป เกียกขี้ตมล้อมอ้อมขึ้นมาบัดหนิ โอ๊ย มึนคัก มึนแน่ บ่ฮู้จักความหลาย หมาหนิกะเดย เกียกขี้ตมล้อมอ้อมขึ้นมาบัดหนิ โอ๊ย ข้อยกะสูนวะสั้นหละ ใจฮ้ายวะสั้น ด่ามันวะสั้นแหล้ว บ่ให้มันเหล้นอีกซ้ำแหล้ว พามันกับบ้านซ้ำ พามันกับบ้านไปล้างตนล้างโต ล้างขนมันออกนั้นหละ ขี้ตมมันบ่เป็นตาเบิ่งเนาะ ขี้ตม เกียกขี้ตมแล้วกะ โอ๊ย สูนวะสั้น เทิงสูนให้หมา เทิงสูนให้เจ้าของว่าพามันไปเหล้นอยู่นั้น ใก้คองน้ำเนาะ กะเลยพามันมาอาบน้ำ แล้วกะ [...] สะอาดคือเก่าหละ ตาฮักคือเก่าเนาะ แล้วกะมื้อหลังกะพามันไปคือเก่านั้นหละ อันนี้กะมาเว้าให้ฟังซื่อๆ ว่าพามันไปเหล้น มันมึนหลายเนาะ
Basic vocabulary — page 22 — Series B, pictures 01-04: to plough, to plant, to harvest
นี้คือสัดอี่หยัง อันนี้เป็นควย เขาเอิ้นว่าควย
โตของควยมันโตใหญ่ แล้วควยมันมีแฮงหลายพ้อม
ตอนนี้เขาเฮ็ดอี่หยังกับควย เขาใซ้ควยไถนา เขากำลังเอาควยมาไถนาอยู่
สะหมัยแต่กี้ หลือสะหมัยก่อนบ่มีลดไถนา หลือว่าบ่มีลดไถ เขาต้องใซ้ควย เอาควยมาไถนา เพื่อที่สิเอาไว้ถ้าเฮ็ดนาหลือปูกเข้านั้นหละ
แล้วตอนนี้เขาเฮ็ดอยู่ใส เขาอาดสิเฮ็ดอยู่ทุ่งนาของเขา หลือว่าไฮ่นาของเขากะได้ เขากะเลยมาไถนาอยู่หม้องนี้
2
เขากำลังเฮ็ดหญัง เขากำลังดำนา
เขากำลังเฮ็ดนา หลือว่ากำลังปูกเข้านั้นหละ
แล้วเขาเฮ็ดอยู่ใสตอนนี้ กะเฮ็ดอยู่ทุ่งนา หลือว่าไฮ่นาของเขานั้นหละ
เขากำลังปูกเข้า กำลังดำนา เฮ็ดอยู่นาของเขา
แล้วพุซายคนนี้เขาเฮ็ดท่าทางจั่งใด เขากำลังก้มโค้งอยู่ เขากำลังเฮ็ดนา เขากำลังดำนา
เขาใซ้มือข้างหนึ่ง หลือว่าข้างขวาของเขานั้นหละ จับมัดก้าอยู่
มัดก้ากะสิมัดใหญ่ๆ หลือว่ามัดก้านั้นสิมีเข้าหลายต้น
แล้วเขากะใซ้มืออีกข้างหนึ่ง หลือว่ามือข้างซ้ายนั้นหละ แล้วแต่คนถะหนัดสิจับฝั่งใด หลือญกฝั่งใดกะได้
แต่ว่าพุซายคนนี้ เขาใซ้มือข้างซ้ายของเขา ดึงต้นก้าที่อยู่ในมัดก้านั้น แล้วดึงออกมาจักหน่อยหนึ่ง หลือว่าสี่ห้าต้น แล้วกะมาเสียบลงดิน เพื่อที่สิปูกเข้า เพื่อที่สิปูกเข้าลงไปในดิน หลือว่าเสียบต้นเข้าลงไปในดิน เพื่อที่สิให้มันต้นใหญ่ๆ ขึ้นไป
3
เขากำลังเฮ็ดหญัง เขากำลังเกี่ยวเข้า
พุซายคนนี้เขากำลังเกี่ยวเข้าอยู่
เขากำลังเกี่ยวเข้าอยู่ใส เขากะอาดสิเกี่ยวอยู่ในไฮ่นาของเขา หลือว่าไฮ่เข้าของเขา
เข้ามันต้นใหญ่แล้ว หลือว่าเข้ามันแก่แล้ว เขากะเลยมาเกี่ยวเข้าอยู่ในนาเข้าของเขา เพื่อที่สิเอาเข้านี้ไปกิน
แล้วเขาใซ้อี่หยังมาเกี่ยวเข้า เขากะใซ้เกี่ยว เขาเอิ้นว่าเกี่ยว คนอี่สานกะเอิ้นว่าเกี่ยว
เกี่ยวกะสิเป็นค้ายๆ กับมีด มีคมคือกันกับมีด แต่ว่าลักสะนะของเกี่ยวมันสิเป็นงอๆ เป็นงอๆ เข้าเพื่อที่สิได้เกี่ยวเข้ามาได้ หลือว่าดึงเข้ามาได้นั้นหละ
4
เขากำลังเฮ็ดหญัง เขากำลังเก็บผัก เขากำลังเก็บผักอยู่ในสวนอยู่
เขากำลังเก็บผักอี่หยัง เขากำลังเก็บผักกะหล้ำ
อันนี้เขาเอิ้นว่าผักกะหล้ำ หลือว่ากะหล้ำปีนั้นหละ
แต่ว่าคำว่า กะหล้ำปี มันญาวโพด คนอี่สานเขากะเลยมักเอิ้น กะหล้ำ ซื่อๆ ผักกะหล้ำ
เขาเก็บผักแล้ว เขาเอาผักไปไว้ใส หลือเอาไว้หม้องใด เขาเอาผักไว้ในเข้ง หลือว่าเอาไว้ในกะต่า
แล้วพุซายคนนี้ เขาเฮ็ดท่าทางจั่งใด เขากำลังนั่ง เขากำลังนั่งพับเพียบอยู่ กำลังนั่งเก็บผัก
ใซ้มือสองข้างดึงผักขึ้นมา แล้ว[เอา]มาใส่ในเข้ง หลือว่ากะต่า
Basic vocabulary — page 08 — Series B, pictures 01-05: ear, to hear/listen, radio, music, headphones
นี้คืออี่หยัง นี้คือหู
หูมันเป็นอี่หยัง หูมันเป็นอะวัยยะวะในล้างกายของเฮา
หูมันเอาไว้เฮ็ดหญัง หูมันเอาไว้ถ้าฟังเสียง ขั้นบ่มีหู กะสิบ่ได้ญินเสียง
หูมันอันใหญ่บ่ บ่ หูมันอันบ่ใหญ่
หูมันอยู่ส่วนใดในล้างกายของเฮา หูมันอยู่ข้างหัวของเฮาเทิงสองข้าง หูมันมีสองข้าง
หูมันแข็งบ่ บ่ หูมันบ่แข็ง หูมันอ่อนๆ หูมันบ่มีกะดูก
2
นี้คืออี่หยัง นี้คือวิทะยุ
วิทะยุมันเป็นแบบใด วิทะยุมันค้ายๆ กับโทละทัด แต่ว่าวิทะยุมันสิบ่มีพาบ
มันสิเป็นค้ายๆ กับโทละทัด มันสิบ่มีพาบให้เบิ่ง เปิดฟังแต่เสียงได้ซื่อๆ บ่สามาดเบิ่งพาบได้
ในวิทะยุมีอี่หยังแน่ ในวิทะยุกะสิมีลำโพง กะสิมีปุ่มเปิด กะสิมีปุ่มปิด
วิทะยุมีหลักอากาดบ่ มีอยู่ วิทะยุมีหลักอากาดอยู่
หลักอากาดมีไว้เฮ็ดหญัง หลักอากาดมีไว้ถ้าหาสันญาน หาคื้น ฟังเพง
ขั้นคื้นสันญานเพงบ่ดี กะสิฟังเพงบ่ได้
3
เขากำลังเฮ็ดหญัง เขากำลังฟังเพง
เขาฟังเพงอยู่ใส บ่ลู้คือกันว่าเขาฟังเพงอยู่ใส บ่ได้อยู่นำเขา
เขาฟังเพงจากใด เขาฟังเพงจากวิทะยุ เขาเปิดวิทะยุ และเขากะฟังเพงจากวิทะยุ
เขาใซ้อี่หยังฟังเพง เขาใซ้หูของเขาฟังเพง
เขาฟังเพงอี่หยัง บ่ลู้คือกันหละเนาะ จักว่าเขาฟังเพงอี่หยัง บ่ได้ฟังนำเขา
เขาเปิดวิทะยุจักเคี่ยง เขาเปิดวิทะยุเคี่ยงเดียว เขาฟังของเขาพุเดียว เขาเลยเปิดเคี่ยงเดียว
วิทะยุเคี่ยงสีหญัง วิทะยุเคี่ยงสีเทาๆ สีม่นๆ
วิทะยุเคี่ยงใหญ่บ่ บ่ วิทะยุเคี่ยงพอดี เคี่ยงพอเท่าๆ หนิ บ่เคี่ยงใหญ่หลาย
4
นี้คืออี่หยัง นี้คือหูฟัง
หูฟังเอาไว้เฮ็ดหญัง หูฟังเอาไว้ถ้าฟังเพง
หูฟังใส่หูได้จักข้าง หูฟังใส่หูได้สองข้าง
หูฟังสีอี่หยัง หูฟังสีเหลียง
หูฟังมีสายบ่ มีอยู่ หูฟังมีสาย
สายหูฟังเอาไว้เฮ็ดหญัง สายหูฟังเอาไว้ถ้าเสียบ ใส่โทละสับ หลือเสียบใส่ค็อม เพื่อที่เฮาสิสามาดฟังเพงได้
ขั้นบ่มีสาย มันกะบ่สามาดฟังเพงได้ เพาะว่ามันสิบ่สามาดเสียบเข้าไปในโทละสับ หลือบ่สามาดเสียบเข้าไปในค็อมได้
5
เขากำลังเฮ็ดหญัง เขากำลังฟังเพง
เขาฟังเพงจั่งใด เขาเสียบหูฟังใส่หูของเขา แล้วเขากะฟังเพง
เขาฟังเพงอี่หยัง บ่ลู้คือกันหละเนาะ จักเขาฟังเพงอี่หยัง บ่ได้ฟังนำเขา บ่ได้ญินนำเขา จักเขาฟังเพงอี่หยัง
เขาฟังเพงจักคน เขาฟังเพงพุเดียว
เขาเป็นพุหญิงหลือเป็นพุซาย เขาเป็นพุหญิง
เขาพุดีบ่ บ่ลู้คือกันจักพุดีหลือบ่พุดี เบิ่งบ่ออก
เขาญกมือขึ้นบ่ ญกมือขึ้นอยู่
เขาญกมือขึ้นจักข้าง เขาญกมือขึ้นสองข้าง
เขาญกมือขึ้นเฮ็ดหญัง บ่ลู้คือกัน เขาอาดสิฟังเพงม่วนหลาย เขากะเลยญกมือขึ้น เพื่อที่สิใซ้มือญ้อนเข้าไปนำเพง เพาะว่ามันอาดสิม่วนหลาย
Basic vocabulary — page 09 — Series B, pictures 09-14: river, bridge, to cross, to walk, bike, motorbike, car
นี้คืออี่หยัง นี้คือแม่น้ำ แม่น้ำสายบักญาวหนึ่ง
อยู่ข้างแม่น้ำกะมีต้นไม้พ้อม มีต้นไม้ต้นบักใหญ่หนึ่ง มีบักหลายต้น
แล้วกะมีหญ้าพ้อม หญ้ากะเกิดอยู่ข้างต้นไม้ แล้วหญ้ากะเกิดอยู่ข้างแม่น้ำพ้อม
หญ้ามีหลายต้นบ่ มีหลายอยู่ หญ้ามีหลายต้น หลายบักคักหนึ่ง
แม่น้ำสายนี้ข้ามได้บ่ บ่ แม่น้ำสายนี้ข้ามบ่ได้ เพาะว่ามันบ่มีสะพานให้ข้าม มันกะเลยข้ามบ่ได้ เฮากะเลยบ่สามาดข้ามแม่น้ำนี้ได้
แม่น้ำสายนี้ไหลไปใส บ่ลู้คือกันจักว่าแม่น้ำสายนี้ไหลไปใส อาดสิไหลไปทะเล หลือไหลไปนำคองใหญ่ๆ กะได้
10
นี้คืออี่หยัง นี้คือแม่น้ำ แม่น้ำสายบักใหญ่หนึ่ง สายญาวพ้อม
อยู่ข้างแม่น้ำกะมีหนทางพ้อม มีหนทางสายบักญาว มีหนทางบักใหญ่หนึ่ง
แล้วแม่น้ำสายนี้มีสะพานเซี้ยมหนทาง เพื่อที่ใซ้ข้ามแม่น้ำสายนี้
สะพานมันอันใหญ่บ่ ใหญ่อยู่ สะพานมันใหญ่หลาย มันใหญ่บักคักหนึ่ง
สะพานอันนี้มันสามาดข้ามแม่น้ำสายนี้ได้ มันกะเลยอันบักใหญ่หนึ่ง
สะพานอันนี้มีละเบียงพ้อมแม่นบ่ แม่น สะพานอันนี้มีละเบียงพ้อม สะพานอันนี้มีละเบียงอยู่
อยู่ขอบสะพานมีละเบียงพ้อม เพื่อที่สิให้คนญ่างไปญ่างมา เพื่อที่สิได้จับฮั้วหลือละเบียงสะพานนี้
แล้วอยู่เทิงหนทางนี้ บ่มีคนอยู่เลย บ่มีใผอยู่หนี้จักคนเลย
11
เขากำลังเฮ็ดหญัง มีพุหญิงพุหนึ่ง เขากำลังญ่างข้ามสะพาน จักว่าเขาสิญ่างไปใส เขากำลังญ่างข้ามสะพานอันนี้ไป
เขากำลังญ่างไปพุเดียว บ่มีพุใดอยู่กับเขาเลย
เขามาแต่ใส บ่ลู้คือกันจักว่าเขามาแต่ใส แต่ว่าเห็นเขาญ่างมาแต่ทางหลัง แต่บ่ลู้ว่าเขาญ่างมาแต่ใส
แล้วเขาสิญ่างไปใส บ่ลู้คือกันจักว่าเขาสิญ่างไปใส เห็นแต่เขาญ่างข้ามสะพานนี้ซื่อๆ
12
เขากำลังเฮ็ดหญัง มีเด็กน้อยพุหนึ่ง เขากำลังถีบจักกะย๊าน
เขาถีบจักกะย๊านไปทางหน้า เขากำลังถีบจักกะย๊านข้ามสะพาน
จักว่าเขาสิไปใส กะบ่ลู้นำเขา เห็นเขาถีบอยู่พุเดียว
ตอนนี้เขาข้ามสะพานไป่ บ่ เขาบ่ทันได้ข้ามสะพานเลย ตอนนี้เขากำลังถีบจักกะย๊านอยู่เทิงสะพาน
เขาอาดสิเป็นเด็กน้อย เขากะเลยไปค่อยๆ เขาอาดสิบ่ถีบจักกะย๊านเล็วกะได้
จักกะย๊านอันนี้มีสองล้อแม่นบ่ แม่น จักกะย๊านอันนี้มีสองล้อ
13
เขากำลังเฮ็ดหญัง มีพุซายพุหนึ่ง เขากำลังขับมอเตอไซ เขากำลังขับมอเตอไซไปทางหน้า จักว่าเขาสิไปใส ตอนนี้เขากำลังขับมอเตอไซขึ้นสะพาน กำลังข้ามสะพาน จักว่าเขาสิไปใส
ตอนนี้เขาข้ามสะพานไป่ บ่ เขาบ่ทันได้ข้ามสะพาน เขากำลังขับอยู่เทิงสะพาน บ่ทันได้ข้ามสะพานไปทางหน้าอยู่
เขาขับมอเตอไซ มอเตอไซมันมีสองล้อ แล้วเขากะขับไปเลี้ยยๆ
เขาใส่หมวกกันน็อกพ้อม หมวกกันน็อกของเขาใบสีแดง ใบบ่ใหญ่ ใบอันน้อยๆ หนึ่ง
14
เขากำลังเฮ็ดหญัง เขากำลังขับลด ขับลดเก็ง ขับไปทางหน้า
เขาขับอยู่ใส เขาขับอยู่เทิงสะพาน ตอนนี้เขากำลังขับอยู่เทิงสะพาน กำลังสิข้ามสะพาน แต่ว่าบ่ทันได้ข้ามสะพานไป เขากำลังสิขับไปทางหน้า เขากะขับไปเลี้ยยๆ แต่ว่าบ่ทันได้ข้ามสะพานไป
ลดเก็งคันนี้มีจักล้อ ลดเก็งคันนี้มีสี่ล้อ
ลดเก็งคันสีเหลียง คันบ่ใหญ่ คันพอดี
คันบ่ใหญ่ คันบ่ใหญ่หลาย คันบ่น้อยหลาย คันพอดี
Basic vocabulary — Page 01 — Series B, pictures 11-17: bowl, rice, to pour, water, to wash/clean, to stack up, to fall, to break
นี้คืออี่หยัง อันนี้เป็นถ้วย
ถ้วยเป่า บ่มีอี่หยังอยู่ในถ้วยเลย
ถ้วย[อัน]ใบใหญ่บ่ ใหญ่อยู่ ถ้วยใบนี้มันกะใบใหญ่อยู่ แต่บ่ใหญ่หลาย
ถ้วยอันนี้เอาไว้เฮ็ดหญัง ถ้วยอันนี้ใซ้ปะโยดได้หลายอย่าง เอาใส่แนวกินกะได้ ใส่อี่หยังกะได้ที่เฮาสิเอามากิน ใส่เข้ากะได้ ใส่อันนั้นอันนี้ ใส่ได้เบิดซู่สิ่งซู่อย่าง ว่าแต่เฮาอยากเอาอี่หยังลงไปในถ้วยนี้ หลือว่าใส่ลงไปในถ้วยนี้
12
อันนี้คือหญัง อันนี้กะเป็นถ้วยคือเก่านั้นหละ อันนี้กะเป็นถ้วย
แต่ว่าถ้วยใบนี้มีเข้าพ้อม มีเข้าบักหลายเติบหนึ่งอยู่ในถ้วยนี้ กำลังฮ้อนอยู่
มีควนลอยอ่มๆ ขึ้นไปพ้อม เข้าอันนี้คือสิฮ้อนคัก
เข้าอันนี้กะสิเข้าจุ่นพู่นอยู่ เป็นตาแซบๆ เป็นตากินกับแนวกินแซบคัก
13
เขากำลังเฮ็ดหญัง เขากำลังเทน้ำลงไปในถ้วย
แล้วเขาเทน้ำลงไปในถ้วยเฮ็ดหญัง จักคือกัน เขาอาดสิเอาไปกิน หลืออาดสิเอาไปเฮ็ดสิ่งต่างๆ กะได้ เขากะเลยเทน้ำลงไปในถ้วย
เขาเทน้ำใส่ถ้วยหลายบ่ กะหลายอยู่ หลายเติบ เกียบเต็มถ้วยเอาโลด เทโจ้กๆ ลงเอาโลด บ่เบิ่งว่ามันสิเต็มหลือบ่เต็ม
14
เขากำลังเฮ็ดหญัง เขากำลังล้างถ้วย เขากำลังล้างถ้วยอยู่
เขาล้างถ้วยเฮ็ดหญัง มันอาดสิสกกะปก หลือว่าบ่สะอาด เขากะเลยล้างถ้วย เขาอาดสิเอาถ้วยนี้ไปเฮ็ดแนวกิน หลือว่าเอาไปใส่แนวกินกะได้
เขาใซ้มือของเขาสองข้างล้างถ้วย มือหนึ่งกะจับฟองน้ำ แล้วกะถูๆๆ ฮุๆ อยู่ในถ้วยนั้น อีกมือหนึ่งกะจับถ้วย ไว้บ่ให้มันดิ้น หลือว่าบ่ให้มันหลุดมือไปใส แล้วเขากะล้างๆๆ เพื่อที่สิให้ถ้วยนี้มันสะอาด หลือว่าเกี้ยงนั้นหละ
15
เขากำลังเฮ็ดหญัง เขากำลังวางถ้วยซ้อนกัน
จักว่าเขาเอาถ้วยอันนี้มาแต่ใส หลายกะด้อกะเดี้ย บักหลายใบเอาโลด เทิงมีสีแดง สีฟ้า สีเหลียง สีเขียว มีเบิดซู่สีเอาโลด บักหลายใบหนึ่ง ถ้วยนี้กะเดย
เขาเอาถ้วยมาวางซ้อนกันเฮ็ดหญัง จักคือกัน เขาอาดสิเอามาเก็บให้มันเป็นละเบียบ ให้มันสะอาดหูสะอาดตา หลือว่าให้มันเป็นที่เป็นทางกะได้ หลือว่าเขาอาดสิล้างแล้ว เขากะมาวางซ้อนกันไว้ซื่อๆ
16
นี้คืออี่หยัง อันนี้กะคือถ้วย มันกำลังตก
จักว่ามันตกมาแต่ใส มันกำลังลอยตกลงมา กำลังหล่นตกลงมาพุ้นหนะ
มันตกลงมาจักใบ มันตกลงมาใบเดียว ใบเดียวข้อหล้อ กำลังหล่นตกลงมา
ขั้นมันตกแล้วมันสิแตกบ่ จักคือกัน กะอาดสิแตก
ขั้นมันเป็นแก้ว มันตกลงมาแล้ว มันกะสิแตก แต่ว่าขั้นมันเป็นพะสะติก หลือว่าเป็นที่แนวมันแตกบ่ได้ มันกะสิบ่แตก
17
อันนี้มันคืออี่หยัง อันนี้กะคือเสดแก้ว มันอาดสิเป็นถ้วย หลือว่าเป็นแก้วที่มันตกลงมา ตกลงมาจากหม้องสูงๆ หลือว่าตกลงมาจากโต่ะ ตกลงมาพื้นแล้วมันกะสิแตก เพาะว่ามันเป็นแก้ว หลือว่าเป็นกะจก
เหลียวเบิ่งมันแตกแล้ว มันกองเอ่าะเญาะอยู่นำพื้นพุ้นหนะ ขั้นพุใดไปเหยียบ กะสิเฮ็ดให้เป็นบาดหลือเป็นแผ เพาะว่าเสดแก้วนี้มันคมหลาย เสดอันนี้มันคมคักอี่หลี
Basic vocabulary — Page 33 — Series B, pictures 01-06: room, floor, wall, ceiling, door, window
นี้คืออี่หยัง อันนี้เป็นห้อง อาดสิเป็นห้องนอน หลือว่าห้องนั่งเหล้น อันนี้เฮากะบ่ฮู้คือกันเนาะ
ขั้นมีโซฟา หลือว่ามีโทละทัด หลือว่ามีอี่หยัง อาดสิเป็นห้องนั่งเหล้น ขั้นมีที่นอน หลือว่าหม้องนอน กะอาดสิเป็นห้องนอนเนาะ
แต่ในลูบนี้อาดสิเป็นห้องซื่อๆ ห้องที่บ่มีอี่หยัง เป็นห้องสีซมพูเนาะ
ในห้องกะเป็นซงสี่เหลี่ยม มีปะตูพ้อม
มีปะตูสีอี่หยัง ปะตูสีเหลียง
แล้วกะมีพื้น มีเพดาน มีหน้าต่าง เป็นหน้าต่างกะจกเนาะ อันนี้กะเป็นห้องสี่เหลี่ยม
2
นี้คืออี่หยัง อันนี้เป็นพื้นเนาะ พื้นห้อง
ขั้นตงนี้อยู่ในบ้านกะสิเอิ้นว่าพื้นบ้าน ขั้นอยู่ตงดินกะพื้นดิน แต่ว่าอันนี้อยู่ในห้องกะเอิ้นว่าพื้นห้องเนาะ
แล้วพื้นห้องสีอี่หยัง พื้นห้องเป็นสีน้ำตาน
แล้วพื้นห้องหนิมันเลียบบ่ หลือว่าเฮ็ดหยาบกะได้ บ่ พื้น พื้นห้องหนิกะเป็นเลียบๆ เนาะ ตงๆ เลย บ่มีโค้ง บ่มีนูน บ่มีอี่หยังเนาะ ตงๆ เป็นพื้นเลียบ พื้นอยู่ห้องเนาะ เขาเอิ้น
3
นี้คืออี่หยัง อันนี้เป็นฝาผะหนังบ้าน หลือว่าฝาผะหนังเฮียนเนาะ
แต่ว่าลูบนี้มันอยู่ในห้อง กะเอิ้นว่าฝาผะหนังห้องกะได้ ฝาผะหนังในห้องของเฮา เฮากะเอิ้นว่าฝาผะหนังห้อง
แต่ว่าขั้นตอนนี้เฮานั่งอยู่ในบ้าน นั่งอยู่ในเฮียน เฮากะเอิ้นฝาผะหนังบ้าน ฝาผะหนังเฮียนกะได้
ฝาผะหนังห้องนี้เป็นสีซมพูเนาะ เป็นซงสี่เหลี่ยมในห้องนั้นหละ แล้วกะมีอันอื่น มีหน้าต่าง มีกะจก มีปะตูคือกันเนาะ
แล้วฝาผะหนังห้องนี้ เฮาเฮ็ดเป็นสีใดกะได้แม่นบ่ แม่น เฮาสิเฮ็ดสีใดกะได้ สิเฮ็ดสีซมพู สีฟ้า สีเขียวกะได้ แล้วแต่ว่าเฮาอยากสิเฮ็ดเป็นสีใด แล้วแต่ว่าเฮาอยากสิเฮ็ดเป็นแบบใด แล้วแต่ความ เออ แนวมักของเฮา เฮามักอันใด เฮากะเฮ็ดแบบนั้น หลือว่าเฮาสิตกแต่งลวดลายไปจั่งใดกะได้ในฝาผะหนังบ้านฝาผะหนังห้องของเฮา แล้วแต่เฮามัก เฮาเฮ็ดจั่งใด เฮากะเฮ็ดได้เนาะ
4
นี้คืออี่หยัง อันนี้เป็นฝาผะหนัง เออ บ่แม่นฝาผะหนังเนาะ อันนี้เป็นเพดานบ้าน เพดานห้อง เพดานเฮียนเนาะ
ขั้นเฮานั่งอยู่ในเฮียนเนี้ย เฮาสิเอิ้นว่าเพดานบ้านกะได้ เพดานเฮียนกะได้ แต่ว่าเฮาเอิ้นแบบว่า เอิ้นเพดานห้องบ่ได้ เพาะว่าเฮานั่งอยู่ในเฮียน แต่ว่าขั้นเฮานั่งอยู่ในห้อง เฮาสิเอิ้นว่าเพดานห้อง หลือว่าเพดานบ้าน เพดานเฮียนกะได้ เพาะว่าในห้องนั้นมันกะอยู่ในเฮียนอยู่เนาะ
5
นี้คืออี่หยัง อันนี้เป็นปะตู ปะตูห้องเนาะ ปะตูห้องเป็นสี่เหลี่ยม
แล้วปะตูนี้มีไว้เฮ็ดหญัง ปะตูนี้กะมีไว้ปิดไว้เปิด เข้าออก ซื่อๆ นั้นหละ กะเฮ็ดเป็นห้องกั้น แล้วมีฝาผะหนังกั้นแล้ว เฮากะมีปะตูเพื่อว่าสิได้เปิดเข้าเปิดออกได้ง่ายๆ
เป็นหญังคือต้องใส่ปะตู ให้มันสามาดญ่างเข้าญ่างออกได้
ขั้นเฮาบ่ใส่ปะตู ฝาผะหนังหม้องนั้นมันกะสิโล้ง มันกะสิเป็นซ้อง เขาเอิ้นว่ากะสิเป็นป่องโจ่งโป่ง มันกะสิบ่ปิดบ่บังอี่หยังเนาะ กะขั้นมีปะตูแล้วกะสิปอดพัยอีกแบบหนึ่ง คนอื่นหลือว่าคนที่บ่ได้อยู่ในห้องเฮาหนิ กะสิสามาด บ่สามาดเข้าออกๆ ได้จนกว่าเฮาสิเปิดปะตูให้เขาเนาะ
หลือว่าปะตูนี้กะป้องกันโจนกะได้ เฮากะ ขั้นเฮาอยู่ในห้อง แล้วเฮากะล็อกไว้ ขั้นเฮาออกไปข้างนอก เฮากะล็อกไว้ คนอื่นกะสิเข้าห้องเฮาบ่ได้ ขั้นเฮาอยู่ในห้อง เฮากะล็อกไว้ คนอื่นกะเข้ามาบ่ได้คือกันเนาะ
6
นี้คืออี่หยัง อันนี้เป็นหน้าต่าง หน้าต่างห้อง หน้าต่างบ้านเนาะ
แล้วแต่สิเอิ้นว่าหน้าต่างบ้านหลือว่าหน้าต่างเฮียนคือกันกับฝาผะหนังหลือว่าเพดานเนาะ
แล้วหน้าต่างเป็นสีหญัง หน้าต่างมันเป็นสีใสๆ เนาะ เป็นสีขาวๆ ใสๆ มันอาดสิเป็นเฮ็ดมาจากกะจกเนาะ เบิ่งใก้ๆ กะสิเป็นสีฟ้าๆ แต่ว่ามันเป็นสีใสๆ ขาวๆ เนาะ เพาะว่ามันเฮ็ดมาจากกะจก ถืกแสงแดด มันกะสิใสๆ ฟ้าๆ เนาะ
แล้วหน้าต่างหนิมีไว้เฮ็ดหญัง เฮากะมีไว้ถ้าส่องออกไปข้างนอก กะค้ายๆ กับปะตูนั้นหละ กะแต่ว่าหน้าต่างนี้ เฮาสามาดแญง ส่องออกไปข้างนอก หลือว่าแญงออกไปข้างนอกได้ เพื่อที่ว่าสิแนมสิ่งนั้นสิ่งนี้ที่อยู่ข้างนอกบ้าน นอกเฮียนของเฮา หลือว่านอกห้องของเฮาเนาะ
Basic vocabulary — page 19 — Series B, pictures 01-05: tongue, taste, lime, sour, chili, spicy, salt, fish sauce, salty, sugar, sweet
อันนี้เขาเป็นพุหญิงหลือเป็นพุซาย เขาเป็นพุซาย
คือฮู้ว่าเขาเป็นพุซาย กะฮู้ว่าเขาเป็นพุซาย ผมเขาสั้น หน้าตาเขาคือพุซาย กะเลยคิดว่าเป็นพุซาย
หน้าตาเขาบ่คือพุหญิง กะเลยบ่คิดว่าเขาเป็นพุหญิง
ลูกสอนซี้ไปใส่ลิ้นของเขา เป็นหญังลูกสอนคือซี้ไปใส่ลิ้นของเขา อันนี้กะบ่ฮู้คือกัน เขาอาดสิอยากให้เฮาฮู้ว่าเขากำลังเป็นหญัง เขากำลังเฮ็ดหญังอยู่ เขากะเลยซี้ลูกสอนไปใส่ลิ้นของเขา
ลิ้นอันนี้มีหน้าที่เฮ็ดหญัง ลิ้นอันนี้เอาไว้เฮ็ดหญัง ลิ้นอันนี้เอาไว้ถ้าซิม หลือเอาไว้ถ้ากิน หลือเอาไว้ถ้าฮู้ว่าสิ่งของที่เฮากินไปนั้น มีลดซาดเผ็ด หลือหวาน หลือเค็ม หลือจืด
ขั้นเฮาบ่มีลิ้น เฮากะบ่สามาดฮู้ลดซาดของแนวกินได้
ลิ้นอันนี้มีสีอี่หยัง ลิ้นอันนี้กะมีสีแดง บางคนกะมีลิ้นสีซมพู
ตอนนี้เขาเฮ็ดอี่หยังอยู่ ตอนนี้เขากำลังแลบลิ้นอยู่ เขากำลังแลบลิ้นออกมาข้างนอก บ่ฮู้ว่าเขาเป็นหญัง เขาอาดสิเผ็ด หลืออาดสิเค็ม หลืออาดสิส้มอี่หยังบางสิ่งบางอย่างกะได้
2
อันนี้คืออี่หยัง อันนี้คือบักนาว อันนี้เป็นบักนาว
บักนาวเป็นลูกจั่งใด บักนาวเป็นแบบใด บักนาวเป็นน่วยสีเขียว น่วยน้อยๆ น่วยบ่ใหญ่หลาย
บักนาวสิเอาไว้ถ้าเฮ็ดแนวกิน หลือเอาไว้ถ้าเฮ็ดน้ำอี่หยังบางสิ่งบางอย่างกะได้
บักนาวนี้เป็นเคี่ยงปุง เอาไว้ถ้าปุงแนวกิน
ในน่วยของบักนาวหนะสิมีน้ำ น้ำเอาไว้ถ้าเฮ็ดเคี่ยงปุง หลือเอาไว้ถ้าปุงแนวกิน
น้ำบักนาวสิมีลดซาดจั่งใด น้ำบักนาวสิมีลดซาดส้ม ลดซาดเปี้ยว ส้มคัก บางน่วยกะส้มหลาย บางน่วยกะส้มหน้อย แล้วแต่บักนาว
ขั้นบักนาวแก่ หลือบักนาวน่วยแก่ๆ แล้ว กะสิมีลดซาดส้มหลาย ขั้นบักนาวอ่อน หลือบักนาวบ่ทันได้แก่หลาย กะสิมีลดซาดส้มบ่หลาย
คนส่วนหลายสิมักลดซาดส้มนี้บ่ บ่ กะมีส่วนหน้อย บ่ได้มีส่วนหลาย คนส่วนหน้อยที่สิมักกินส้มแบบนี้ คนส่วนหน้อยที่มักกินลดซาดส้มๆ
เพาะว่ากินส้มหลายมันกะบ่ดี เพาะว่าขั้นกินส้มหลายๆ มันสิเฮ็ดให้กะเพาะเฮาบ่ดี หลือลำไส้เฮาบ่ดี หลืออะวัยยะวะต่างๆ ของเฮาในล้างกายของเฮานี้บ่ดี
บักนาวนี้มันเป็นกด เป็นกดบางสิ่งบางอย่าง ขั้นกินคักๆ กินหลายๆ มันกะบ่ดีต่อสุกขะพาบหลือล้างกายของเฮา
3
นี้คืออี่หยัง นี้คือบักพิก อันนี้เป็นบักพิก
บักพิกเป็นอี่หยัง บักพิกเป็นพืด เอาไว้ถ้าเฮ็ดแนวกิน เอาไว้ถ้าปุงแนวกินคือกัน
บักพิกมีลดซาดเผ็ดบ่ กะเผ็ดอยู่ เผ็ดบักหลาย เผ็ดคัก เผ็ดคักอี่หลี
ขั้นพุใดอยากเฮ็ดแนวกิน หลือเฮ็ดกับเข้านั้นหละ ขั้นอยากมีลดซาดเผ็ด ขั้นอยากให้แนวกินมีลดซาดเผ็ด หลือลดซาดเผ็ดคักๆ กะใส่บักพิก ใส่บักพิกนี้ลงไป เอาไว้ถ้าปุงแนวกิน เอาไว้ถ้าปุงกับเข้า แล้วลดซาดนั้นกะสิมีลดซาดเผ็ดขึ้นมาทันที
คนส่วนหลายสิมักกินบักพิกบ่ กะแล้วแต่คน เพาะว่าบักพิกนี้เอากินเหล้นบ่ได้ บักพิกเอาไว้ถ้าปุงแนวกิน เอาไว้ถ้าปุงกับเข้า เอาไว้ถ้าใส่เฮ็ดแนวกินซื่อๆ บ่สามาดกินเหล้นได้ บ่สามาดกินได้คือหมากไม้หลือผนละไม้ได้
4
นี้คืออี่หยัง นี้คือเกีย อันนี้คือเกีย แล้วกะมีน้ำปาพ้อม
อันนี้เป็นน้ำปากับเกีย
เกียเป็นแบบใด แล้วน้ำปาเป็นแบบใด เกียมันกะเป็นผง เป็นผง เป็นก้อนน้อยๆ เป็นก้อนบ่ใหญ่ มันบ่ได้เป็นน้ำ
แต่ว่าน้ำปามันสิเป็นน้ำ มันสิเป็นน้ำคือน้ำนี้หละ แต่ว่าเป็นน้ำดำๆ
แต่ว่าเกียกับน้ำปานี้ สิมีลดซาดเค็มคือกัน มีลดซาดเค็มคือกัน เค็มบักคัก เกียกับน้ำปานี้สิเค็มอี่หลี เค็มคัก เค็มคักกะด้อกะเดี้ย
คนส่วนหลายสิมักกินลดซาดเค็มนี้บ่ บ่ คนส่วนหลายนี้สิบ่มักกินเค็ม กินเค็มหลายกะบ่ดี กินเค็มหลายๆ กะบ่ดีต่อสุกขะพาบ
แต่ว่าคนกะมักกิน แต่ว่าหมอแนะนำบ่ให้กินเค็มหลาย ขั้นกินเค็มหลายกะบ่ดี มันสิเฮ็ดให้เป็นโลกไต หลือเสียสุกขะพาบนั้นหละ
5
นี้คืออี่หยัง นี้คือน้ำตาน อันนี้เป็นน้ำตาน เป็นน้ำตานเอาไว้ถ้าเฮ็ดแนวกิน หลือเอาไว้ถ้าเฮ็ดหวาน หลือเอาไว้ถ้าเฮ็ดน้ำ เฮ็ดอี่หยังกะได้ ที่เกี่ยวกับลดซาดหวานๆ
น้ำตานมีลักสะนะเป็นผง เป็นก้อนน้อยๆ ก้อนน้อยๆ ก้อนบ่ใหญ่หลาย ก้อนส่ำๆ กันกับเกียนั้นหละ แต่ว่าเป็นคนละแบบ
น้ำตานสิมีลดซาดหวาน หวานคัก หวานคักอี่หลี หวานกะด้อกะเดี้ย
คนส่วนหลายสิมักกินน้ำตานนี้ สิมักเอาน้ำตานไปเฮ็ดปุงเป็นอาหาน หลือปุงไปเป็นน้ำปั่น ปุงน้ำเชื้อม ปุงอี่หยังกะได้ ที่เกี่ยวกับน้ำตาน คนส่วนมากสิกินหวาน กินน้ำตาน
แต่ว่ากินหลายๆ กะบ่ดี มันบ่ดีต่อสุกขะพาบ สิเฮ็ดให้เป็นโลกเบาหวานได้