KhmerPronunciationEnglish/Notes#occ
ទាំងនោះ teaŋ nuh all of those 24/19

Link to overview page
Link to dictionary

Expressing fear — Cultural note


នៅខ្មែរ មានអបិយជំនឿជាច្រើន ហើយប្រជាជនមួយចំនួនធំជឿថាមានខ្មោច ព្រាយ បីសាច អារក្សអ្នកតា វត្ថុស័ក្ដិសិទ្ធិ។ ពួកគេខ្លាចបារមីអរូបីទាំងនោះ ក្រែងពួកគេធ្វើលើសលស់ដោយមិនដឹងខ្លួន។ ពួកគេខ្លាចត្រូវអំពើ ខ្លាចបាប ខ្លាចត្រូវគេដាក់បណ្ដាសា ខ្លាចឆុង ។ល។

Going To The ATM (Sakanan) — 14


ចូលដល់ក្នុងរូបភាពទី ១៤ នៅក្នុងរូបភាពទី ១៤ យើងឃើញថា បន្ទាប់ពីម៉ាស៊ីនអេធីអឹមនោះ បានបញ្ចេញសាច់ប្រាក់តាមរន្ធសាច់ប្រាក់ចេញមកក្រៅហើយ នារីម្នាក់នោះ គាត់បានយកដៃស្ដាំរបស់គាត់ចាប់ទាញសាច់ប្រាក់ចេញមក អញ្ចឹងម៉ាស៊ីនអេធីអឹម គាត់បានបញ្ចេញតែពាក់កណ្ដាលនៃទំហំសាច់ប្រាក់នោះទេ ដូច្នេះហើយ យើងត្រូវចាប់ទាញចេញមកក្រៅ ដើម្បីយកលុយទាំងនោះ ព្រោះថាប្រសិនបើម៉ាស៊ីនបញ្ចេញលុយទាំងមូល លុយនឹងអាចធ្លាក់ បាទ លុយនឹងអាចធ្លាក់ចុះ ហើយរាយប៉ាយ ដូច្នេះហើយ ដើម្បីរក្សាសណ្ដាប់ធ្នាប់នោះ ម៉ាស៊ីនគឺបញ្ចេញលុយតែពាក់កណ្ដាលខ្លួន ឬក៏ពាក់កណ្ដាលនៃសាច់ប្រាក់នោះតែប៉ុណ្ណោះ ដើម្បីឲ្យម្ចាស់សាច់ប្រាក់ ឬក៏ឲ្យនារីនោះ ចាប់ទាញចេញមក ដូច្នេះលុយទាំងនោះ គឺមិនធ្លាក់រាយប៉ាយគ្មានសណ្ដាប់ធ្នាប់នោះទេ គឺលុយនឹងរក្សាបានសណ្ដាប់ធ្នាប់របស់វាល្អតែម្ដង។

Breaking A Bowl (Sakanan) — 15


បន្ទាប់មកទៀតរូបភាពទី ១៥ នៅក្នុងរូបភាពទី ១៥ យើងឃើញថា បន្ទាប់ពីគាត់យកចានថ្មីមកហើយ អញ្ចឹងបុរសម្នាក់នោះ គាត់ក៏បានយកចានថ្មីមកប្រើប្រាស់ ដោយចានថ្មីរបស់គាត់គឺមានពណ៌បៃតង អញ្ចឹងពេលមុនគាត់ប្រើប្រាស់ចានពណ៌ផ្កាឈូក ដែលគាត់ធ្វើឲ្យបែក អញ្ចឹងនៅពេលដែលគាត់បោសសម្អាតផ្ទះបាយរបស់គាត់ បោសសម្អាតអំបែងចានរួចរាល់ហើយ គាត់បានបោសសម្អាតអំបែងចានរួចរាល់ហើយ អញ្ចឹងគាត់ក៏បានយកចានថ្មីមកប្រើប្រាស់ម្ដងទៀត ដោយចាននេះគឺគាត់ប្រើប្រាស់ចាន គាត់ប្រើប្រាស់ចានគោមពណ៌បៃតង អញ្ចឹងម្ដងនេះគឺគាត់ប្រុងប្រយ័ត្នជាងមុន ដោយគាត់យកចានគោមរបស់គាត់ ដោយគាត់កាន់ដៃទាំងពីររបស់គាត់ កាន់ចានគោមដោយដៃទាំងពីរ ហើយយកមកដាក់នៅលើតុនៅក្នុងផ្ទះបាយ ក្បែរបន្លែរបស់គាត់វិញ អញ្ចឹងគាត់បានយកចានថ្មីមកដាក់ងាយស្រួលក្នុងការនៅពេលដែលគាត់ចិតបន្លែហើយ គាត់អាចយកបន្លែទាំងនោះដាក់ទៅក្នុងចានគោម។

Grilled Fish (Sakanan) — 07


បន្ទាប់មកទៀតរូបភាពទី ៧ នៅក្នុងរូបភាពទី ៧ យើងឃើញថា បន្ទាប់ពីគាត់បានកុម្ម៉ង់ទិញបាយ និងត្រី ជាមួយនឹងបន្លែ និងទឹកជ្រលក់រួចរាល់ហើយ គាត់បានខ្ចប់ចំណីអាហារទាំងនោះ ចូលទៅក្នុងថង់ធំមួយរួចហើយ អញ្ចឹងគាត់ក៏បានប្រគល់លុយទៅឲ្យអ្នកលក់ អញ្ចឹងជាទូទៅគឺអ្នកលក់ត្រូវឲ្យលុយ ត្រូវឲ្យរបស់ទៅដល់អ្នកទិញ ចំណែកឯអ្នកទិញត្រូវប្រគល់លុយទៅឲ្យអ្នកលក់ថ្លៃរបស់។ ដែលជាក់ស្ដែងគឺបុរសដែលពាក់អាវលឿង គាត់បានទិញត្រី ទិញបាយ ជាមួយនឹងទឹកជ្រលក់ ជាមួយនឹងបន្លែផ្សេងៗ ពីបុរសដែលជាអ្នកលក់ ដែលពាក់អាវពណ៌ស្វាយ អញ្ចឹងបុរសដែលពាក់អាវលឿងគឺជាអ្នកទិញ ឬក៏ជាអតិថិជន ដូច្នេះគាត់ត្រូវប្រគល់លុយទៅឲ្យបុរសដែលជាអ្នកលក់ អញ្ចឹងយើងឃើញនៅក្នុងរូបភាពនេះគឺ បុរសដែលពាក់អាវលឿងកំពុងតែប្រគល់លុយ ឬក៏សាច់ប្រាក់ទៅឲ្យបុរសដែលពាក់អាវពណ៌ស្វាយ ហើយបុរសដែលពាក់អាវពណ៌ស្វាយដែលជាអ្នកលក់ ក៏បានលូកដៃទទួលយកប្រាក់ថ្លៃត្រីរបស់គាត់ផងដែរ ដូច្នេះពួកគាត់គឺទូទាត់គ្នាដោយប្រើសាច់ប្រាក់។

Getting Up (Sakanan) — 05


ចូលដល់រូបភាពទី ៥ នៅក្នុងរូបភាពទី ៥ នារីដដែលនោះ គាត់បានដើរចូលក្នុងបន្ទប់ទឹករបស់គាត់ បាទ គាត់ភ្ញាក់ពីគេង ហើយគាត់ដើរចូលក្នុងបន្ទប់ទឹករបស់គាត់ ដោយបន្ទប់ទឹករបស់គាត់ គាត់ យើងឃើញថា មានដូចជាឡាបូលាងដៃ បាទ ឡាបូលាងដៃមួយ មានក្បាលរ៉ូប៊ីនេ ឬក៏ក្បាលម៉ាស៊ីនទឹកមួយ ដែលមានពណ៌ខៀវ នៅលើឡាបូលាងដៃនោះ ហើយនៅពីលើក្បាលម៉ាស៊ីនទឹកនោះ គឺយើងឃើញមានកូនទូតូចមួយ បាទ កូនទូតូចនោះ គឺជាទូសម្រាប់ដាក់សម្ភារៈបន្ទប់ទឹក ដូចជាច្រាសដុសធ្មេញ សាប៊ូដុសខ្លួន សាប៊ូកក់សក់ជាដើម។ អញ្ចឹងយើងប្រើប្រាស់កូនទូតូចមួយ ដើម្បីដាក់សម្ភារៈទាំងនោះប្រើប្រាស់នៅក្នុងបន្ទប់ទឹក។ បន្ទប់ទឹករបស់គាត់គឺមានកញ្ចក់មួយ ប៉ុន្តែកញ្ចក់ កញ្ចក់បង្អួចនោះ គឺនៅខ្ពស់ បានន័យថាខ្ពស់ផុតក្បាលរបស់គាត់ អញ្ចឹង យើង បើយើងដាក់កញ្ចក់ទាបពេក គឺគេអាចមើលឃើញយើងនៅពេលដែលយើងងូតទឹក ដូច្នេះយើងត្រូវដាក់ឲ្យខ្ពស់ពីខ្លួន ដើម្បីការពារកុំឲ្យគេមើលឃើញ។ នៅក្នុងរូបភាពនេះ គឺនារីម្នាក់នោះ គាត់បានដើរចូលក្នុងបន្ទប់ទឹករបស់គាត់ ដោយដើរសំដៅទៅរកឡាបូលាងដៃ។

Fruits (Sakanan) — 06


បន្ទាប់មកទៀតរូបភាពទី ៦ នៅក្នុងរូបភាពទី ៦ បន្ទាប់ពីគាត់កាត់ល្ហុងនោះជាកង់ៗតូចៗរួចរាល់ហើយ គាត់ក៏បានយកជ្រញ់ អញ្ចឹងនៅពេលដែលយើងហាន់បន្លែ ហាន់ផ្លែឈើ ឬក៏ហាន់សាច់ គឺយើងតែងតែប្រើប្រាស់ជ្រញ់ដើម្បីទ្រាប់ ព្រោះថាប្រសិនបើយើងហាន់ផ្ទាល់ទៅនឹងតុ ទៅនឹងឥដ្ឋជាដើម វាអត់ស្អាត ហើយវាអាចធ្វើឲ្យតុរបស់យើងខូចខាតបានដោយសារតែមុខកាំបិត ដូច្នេះយើងត្រូវប្រើជ្រញ់ដើម្បីទ្រាប់ក្នុងការហាន់ ដើម្បីងាយស្រួលហាន់ អញ្ចឹងជាក់ស្ដែងបុរសដែលជាអ្នកលក់នោះ គាត់បានយកជ្រញ់ គាត់បានយកល្ហុងទៅហាន់លើជ្រញ់ជាមួយនឹងកាំបិតរបស់គាត់ អញ្ចឹងបន្ទាប់ពីគាត់ហាន់ហើយ ដុំល្ហុងតូចៗ ឬក៏កង់ល្ហុងនោះ គឺនៅលើជ្រញ់ទាំងអស់ ដូច្នេះគាត់ងាយស្រួលក្នុងការប្រមូលដាក់ចូលក្នុងថង់ អញ្ចឹងបន្ទាប់ពីគាត់កាត់កង់ៗហើយ គាត់គ្រាន់តែលើកជ្រញ់របស់គាត់ចាក់ល្ហុងទាំងនោះចូលទៅក្នុងថង់គឺជាការស្រេច។ អញ្ចឹងនៅក្នុងរូបភាពទី ៦ យើងឃើញដៃម្ខាងរបស់អ្នកលក់នោះ គាត់ចាប់មាត់ថង់បើកឡើង ហើយគាត់យកដៃម្ខាងទៀតលើកជ្រញ់ឡើងលើ ហើយចាក់កង់ល្ហុងដែលតូចៗនោះ ចូលទៅក្នុងថង់ទាំងអស់ ដើម្បីលក់ឲ្យអតិថិជនរបស់គាត់ អញ្ចឹងនៅក្នុងរូបភាពនេះ គឺគាត់ចិតល្ហុងជាដុំកង់ៗតូចៗរួចរាល់ហើយ ដូច្នេះគាត់ចាក់ចូលទៅក្នុងថង់ ដើម្បីឲ្យអតិថិជនរបស់គាត់។

Breaking A Bowl (Sakanan) — 09


បន្ទាប់មកទៀតរូបភាពទី ៩ នៅក្នុងរូបភាពទី ៩ យើងឃើញថា បន្ទាប់ពីគាត់បោសសម្អាតនូវកម្ទេចកម្ទីនិងអំបែងចានរួចរាល់ហើយ គាត់កើបកម្ទេចកម្ទីចានរបស់គាត់ដាក់ចូលទៅក្នុងប្រដាប់កើបសំរាមរួចរាល់ហើយ អញ្ចឹងគាត់ក៏បានយកកម្ទេចកម្ទី ឬក៏អំបែងចាននោះ យកមកចាក់ចូលទៅក្នុងធុងសំរាម អញ្ចឹងអំបែងចាន ឬក៏អំបែងកែវ ឬក៏កម្ទេចកម្ទីដែលបានបែក គឺយើងអត់ត្រូវបោះចោលផ្ដេសផ្ដាសនោះទេ ព្រោះប្រសិនបើយើងបោះចោលផ្ដេសផ្ដាសពាសវាលពាសកាល អញ្ចឹងអាចធ្វើឲ្យអំបែងនោះ នៅលើផ្លូវ ឬក៏នៅលើទីធ្លាផ្សេងៗ អញ្ចឹងប្រសិនបើមាននរណាម្នាក់មិនបានប្រុងប្រយ័ត្ន ប្រសិនបើគាត់អត់បានប្រុងប្រយ័ត្ន គាត់ដើរជាន់អំបែង អញ្ចឹងប្រសិនបើគាត់ដើរជាន់អំបែង អាចធ្វើឲ្យគាត់មុតជើង ឬក៏នៅពេលដែល[យើង]គាត់មិនប្រយ័ត្ន ប៉ះចំអំបែង អាចធ្វើឲ្យគាត់មុតដៃបាន អញ្ចឹងអាចធ្វើឲ្យនរណាម្នាក់មានគ្រោះថ្នាក់បាន នៅពេលដែលគេប៉ះពាល់ទៅអំបែងនោះ។ អញ្ចឹងនៅពេលដែលមានការបែកចាន ឬក៏បែកកែវ យើងអត់ត្រូវយកអំបែងចានឬក៏អំបែងកែវនោះទៅបោះចោលផ្ដេសផ្ដាសនោះទេ គឺយើងត្រូវដាក់ក្នុងធុងសំរាមឲ្យបានត្រឹមត្រូវ គឺយើងត្រូវដាក់ក្នុងថង់ និងចងឲ្យបានត្រឹមត្រូវនៅក្នុងធុងសំរាម ដែលជាក់ស្ដែងនៅក្នុងរូបភាពទី ៩ នេះ បន្ទាប់ពីគាត់បោសប្រមូលកម្ទេចកម្ទីអំបែងចានរួចរាល់ហើយ គាត់ក៏បានយកអំបែងចានទាំងនោះ មកចាក់ចូលទៅក្នុងធុងសំរាម ដើម្បីឲ្យមានសណ្ដាប់ធ្នាប់ គឺគាត់អត់យកចាក់ចោលពាសវាលពាសកាលនៅកន្លែងផ្សេងៗនោះទេ វាអាចធ្វើឲ្យមានគ្រោះថ្នាក់បាន។

Laundry (Sakanan) — 11


អញ្ចឹងគាត់បានប្រមូលដាក់ទៅក្នុងកន្ត្រកមួយ បន្ទាប់មកទៀតនៅក្នុងរូបភាពទី ១១ នៅក្នុងរូបភាពទី ១១ យើងឃើញថា បន្ទាប់ពីបុរសម្នាក់នោះ គាត់បានប្រមូលខោអាវ ស្រោមជើង ជាមួយនឹងខោអាវពណ៌ផ្សេងៗ ដូចជាអាវយឺត អាវនៅផ្ទះនិងអាវគេងយប់របស់គាត់នោះ ដាក់ចូលក្នុងកន្ត្រកហើយ បុរសម្នាក់នោះក៏បានលើកកន្ត្រកទាំងនោះ លើកកន្ត្រកខោអាវទាំងនោះ មកដាក់នៅខាងក្រៅដើម្បីហាល អញ្ចឹងយើង នៅក្នុងរូបភាពនេះ យើងឃើញថាគាត់កំពុងតែលើកកន្ត្រក ហើយដើរមកកាន់ស្នួហាលខោអាវមួយ អញ្ចឹងប្រដាប់ ឬក៏ឧបករណ៍សម្រាប់ហាលខោអាវ យើងហៅថាស្នួ អញ្ចឹងស្នួហាលខោអាវ គឺធ្វើឡើងសម្រាប់ឲ្យយើងហាលខោអាវបន្ទាប់ពីយើងបោករួច ហើយយើងហាលខោអាវ គឺត្រូវហាលនៅក្រោមពន្លឺព្រះអាទិត្យ ដើម្បីឲ្យវាឆាប់ស្ងួត ជាក់ស្ដែងនៅក្នុងរូបភាពនេះ បុរសម្នាក់នោះគាត់បានយួរខោអាវរបស់គាត់ដើម្បីចេញក្រៅផ្ទះ អញ្ចឹងជាធម្មតាយើងហាលខោអាវ គឺយើងហាលនៅខាងក្រៅផ្ទះ នៅខាងមុខផ្ទះ ឬក៏នៅក្នុងដីដែលនៅខាងក្រៅផ្ទះរបស់យើង ព្រោះថានៅខាងក្រៅទើបមានពន្លឺព្រះអាទិត្យគ្រប់គ្រាន់ ដើម្បីធ្វើឲ្យខោអាវឆាប់ស្ងួត និងមានខ្យល់អាកាស ព្រោះថាខោអាវនឹងស្ងួតនៅពេលដែលវាត្រូវខ្យល់និងត្រូវពន្លឺព្រះអាទិត្យ អញ្ចឹងនៅក្នុងរូបភាពនេះ គាត់កំពុងតែយកខោអាវមកដើម្បីហាល ព្រោះថាខោអាវដែលបោកចេញពីម៉ាស៊ីនហើយ គឺវានៅសើមនៅឡើយ គឺមាន គឺនៅមានទទឹក គឺបានន័យថាខោអាវនៅទទឹក ឬក៏នៅសើម ដូច្នេះគាត់ត្រូវហាលខោអាវសិន មុននឹងគាត់អាចប្រើប្រាស់ខោអាវនោះបាន។

Alms Round (Sakanan) — 15


បន្ទាប់មកទៀតរូបភាពទី ១៥ រូបភាពទី ១៥ គឺយើងឃើញថា បន្ទាប់ពីព្រះសង្ឃបានសូត្រធម៌ឲ្យពរដល់ស្ត្រីចំណាស់និងចៅស្រីរបស់គាត់ហើយ អញ្ចឹងយើងឃើញព្រះសង្ឃក៏បានបែរមករកកូនសិស្សរបស់គាត់ ឬក៏កូនសិស្សលោកដែលឈរនៅខាងក្រោយ អញ្ចឹងកូនសិស្សលោកគាត់ឈរនៅខាងក្រោយព្រះសង្ឃជានិច្ច។ អញ្ចឹងបន្ទាប់ពីព្រះសង្ឃបានសូត្រធម៌រួចរាល់ហើយ គាត់ក៏បានបែរមករកកូនសិស្សរបស់គាត់វិញ អញ្ចឹងគាត់ គាត់បានបែរមករកកូនសិស្សលោក ហើយបើកគម្របបាត្រឡើង ដើម្បីឲ្យកូនសិស្សលោកដកចង្ហាន់ចេញពីបាត្រយកមកដាក់ក្នុងថង់យាម។ អញ្ចឹងដោយសារតែបាត្រនោះតូច បាត្រតូច ដូច្នេះអត់អាចដាក់ចង្ហាន់បានច្រើននោះទេ អញ្ចឹងរាល់ពេលដែលព្រះសង្ឃបានទទួលចង្ហាន់ពី[…] ពីស្ត្រីចំណាស់ម្នាក់នោះ ឬក៏ពីប្រជាជនរួចរាល់ហើយ ព្រះសង្ឃតែងតែយកចង្ហាន់នោះមកឲ្យកូនសិស្ស ដើម្បីយកចេញពីបាត្រដាក់ទៅក្នុងថង់យាមវិញ ដោយសារតែបាត្រតូចអត់អាចដាក់ចង្ហាន់បានច្រើនទេ ព្រោះវាពេញ ហើយអាចហៀរ និងធ្លាក់ចុះបាន ដូច្នេះគេត្រូវផ្ទេរចង្ហាន់ដាក់ចូលទៅក្នុងថង់យាម ដែលថង់យាមគឺជាកាបូបមួយរបស់ព្រះសង្ឃ គឺជាកាបូបធំមួយ បានន័យថាកាបូបធ្វើអំពីក្រណាត់ ហើយវាធំមួយដែលមានដៃយួរសម្រាប់ស្ពាយ អញ្ចឹងកាបូបនោះគឺធំ ដូច្នេះអាចដាក់ចង្ហាន់បានច្រើន។ អញ្ចឹងបន្ទាប់ពីព្រះសង្ឃគាត់ទទួលបានចង្ហាន់ពីប្រជាជន គាត់តែងតែយកចង្ហាន់ទាំងនោះមកឲ្យកូនសិស្ស ដើម្បីដាក់ទៅក្នុងថង់យាម។ អញ្ចឹងកូនសិស្សគាត់ស្ពាយថង់យាមដើរតាមពីក្រោយព្រះសង្ឃជានិច្ច ដែលនៅក្នុងថង់យាមនោះ គឺជាចង្ហាន់របស់ព្រះសង្ឃ។

Laundry (Sakanan) — 16


បន្ទាប់មកទៀតនៅក្នុងរូបភាពចុងក្រោយ រូបភាពទី ១៦ រូបភាពទី ១៦ យើងឃើញថា បន្ទាប់ពីគាត់បត់ខោអាវរួចរាល់ហើយ បាទ ខោអាវយឺតរបស់គាត់ អាវយឺតខោខោវប៊យ យើងត្រូវបត់ បន្ទាប់ពីគាត់បត់អាវយឺតរួចរាល់ហើយ អាវផ្សេងទៀត ដូចជាអាវឯកសណ្ឋានទៅរៀន ឯកសណ្ឋានទៅសាលា ឬក៏ឯកសណ្ឋានដែលគាត់ពាក់ទៅធ្វើការជាដើម អញ្ចឹងខោអាវទាំងនោះ យើងមិនអាចបត់បានទេ ព្រោះថានៅពេលដែលយើងបត់ វាអាចឲ្យខ្ទេចសាច់ក្រណាត់ អញ្ចឹងយើងពិបាកនៅក្នុងការពាក់ដើម្បីទៅធ្វើការ ដូច្នេះហើយខោអាវឯកសណ្ឋានសាលា ឬក៏ឯកសណ្ឋានដើម្បីទៅធ្វើការ យើងត្រូវព្យួរវាឲ្យមានសណ្ដាប់ធ្នាប់ គឺយើងមិនបត់នោះទេ អញ្ចឹងយើងត្រូវព្យួរ ដូច្នេះនៅក្នុងរូបភាពនេះ យើងឃើញបុរសនោះ គាត់បានយកខោអាវមួយចំនួន ដែលជាអាវធ្វើការរបស់គាត់ ទៅព្យួរនៅក្នុងទូវិញ ដោយយើងឃើញគាត់បើកទ្វារទូម្ដងទៀត ហើយយកស្មាអាវរបស់គាត់ ស្មាអាវដែលនៅក្នុងទូនោះ មកព្យួរជាមួយនឹងអាវ ដូច្នេះគាត់យកអាវរបស់គាត់ទៅព្យួរនឹងស្មាអាវ រួចហើយយកខោអាវដែលព្យួររួចនោះ ទៅដាក់នៅក្នុងទូ អញ្ចឹងជាក់ស្ដែងនៅក្នុងរូបភាពនេះ យើងឃើញថា មានអាវចំនួនពីរនៅក្នុងទូរបស់គាត់ ដែលគាត់បានព្យួររួចហើយ ដូចជាអាវនោះ ពណ៌ ដូចជាស្វាយ ហើយនិងអាវពណ៌ខៀវ អញ្ចឹងនៅក្នុងដៃរបស់គាត់ គឺមានអាវពណ៌លឿងមួយទៀត ដែលជាអាវដៃវែង អញ្ចឹងគាត់កំពុងតែយកអាវដៃវែងពណ៌លឿងនោះ ទៅព្យួរនៅក្នុងទូមួយទៀត ដើម្បីទុកឲ្យវាមានសណ្ដាប់ធ្នាប់ និងចៀសផុតពីការប្រឡាក់ ហើយគាត់ត្រៀមសម្រាប់ការស្លៀកពាក់ទៅធ្វើការនៅថ្ងៃស្អែកទៀត។

Grilled Fish (Sakanan) — 04


បន្ទាប់មកទៀតរូបភាពទី ៤ នៅក្នុងរូបភាពទី ៤ យើងឃើញថា បន្ទាប់ពីគាត់បានទិញត្រីចំនួនមួយក្បាលហើយ បន្ទាប់មកបុរសម្នាក់នោះ គាត់ក៏បានប្រាប់ទៅអ្នកលក់ គាត់បានលើកដៃជាសញ្ញាឡើងពីរ បានន័យថាគាត់លើកដៃម្រាមពីរឡើង ដៃស្ដាំរបស់គាត់គឺលើកម្រាមពីរ ដើម្បីប្រាប់ទៅអ្នកលក់ថា គាត់ត្រូវការបាយពីរកញ្ចប់ អញ្ចឹងដោយសារតែនៅផ្ទះគាត់មានគ្នាចំនួនពីរនាក់ ប្រហែលជាគាត់មានគ្នាចំនួនពីរនាក់ ដូច្នេះគាត់ទិញបាយដំណើបចំនួនពីរកញ្ចប់ ប៉ុន្តែនៅក្នុងប្រទេសកម្ពុជាជាទូទៅយើងញ៉ាំបាយធម្មតា គឺយើងអត់ញ៉ាំបាយដំណើបទេ ដោយសារតែបាយដំណើបគឺវារៀងស្អិត អញ្ចឹងវាពិបាកញ៉ាំ ដូច្នេះគឺយើងញ៉ាំបាយអង្ករខ្សាយ គេហៅថាអង្ករខ្សាយ អញ្ចឹងជាបាយមួយដែលមានពណ៌ស ហើយអត់សូវស្អិតនោះទេ ដូច្នេះនៅកម្ពុជាគឺយើងញ៉ាំបាយអង្ករខ្សាយ គឺយើងអត់ញ៉ាំបាយដំណើបទេ។ អញ្ចឹងបុរសម្នាក់នោះ គាត់បានប្រាប់ទៅអ្នកលក់ដើម្បីទិញបាយចំនួនពីរកញ្ចប់បន្ថែមទៀត បន្ទាប់ពីគាត់ទិញត្រីហើយ ដូច្នេះគាត់បានលើកដៃចំនួនពីរឡើង ដើម្បីប្រាប់ទៅអ្នកលក់ឲ្យអ្នកលក់ខ្ចប់បាយចំនួនពីរកញ្ចប់យកមកឲ្យគាត់ ដែលរូបភាពទី ៤ នេះ យើងឃើញអ្នកលក់ គាត់បានកាន់បាយចំនួនពីរកញ្ចប់យកមកឲ្យបុរសម្នាក់នោះ ដែលគាត់លើកបាយចំនួនពីរកញ្ចប់ឡើង ហើយគាត់បានចង្អុលទៅកាន់កញ្ចប់បាយទាំងនោះ ដើម្បីប្រាប់ទៅដល់បុរសម្នាក់នោះទៅតាមតម្រូវការរបស់គាត់ អញ្ចឹងគាត់កាន់បាយពីរកញ្ចប់ ដែលបាយទាំងពីរកញ្ចប់គឺដាក់នៅក្នុងកញ្ចប់មួយៗ គឺ មួយកញ្ចប់មួយ មួយកញ្ចប់មួយ សម្រាប់មនុស្សពីរនាក់ អញ្ចឹងបាយពីរកញ្ចប់សម្រាប់មនុស្សពីរនាក់។

Boats (Sakanan) — 11


បន្ទាប់មកទៀតរូបភាពទី ១១ រូបភាពទី ១១ គឺទូកបានមកដល់កំពង់ផែមួយទៀតហើយ អញ្ចឹងនៅពេលដែលមកដល់កំពង់ផែ អ្នកដែលត្រូវធ្វើដំណើរមកកំពង់ផែមួយនេះ គឺត្រូវចុះពីលើទូកទាំងអស់ អញ្ចឹងជាក់ស្ដែងបុរសម្នាក់នេះ គាត់ចង់ចុះនៅក្នុងកំពង់ផែមួយនេះ ដូច្នេះនៅពេលដែលទូកឈប់ គាត់ក៏បានចេញពីទូក អញ្ចឹងយើងឃើញ យើងឃើញនៅក្នុងរូបភាពនេះ គឺយើងឃើញថា នៅពេលដែលទូកចត គឺអត់មានលំនឹងទេ អញ្ចឹងទូកអាចអណ្ដែតទៅកន្លែងផ្សេងទៀតបាន ដូច្នេះដើម្បីទប់ឲ្យវាលំនឹង ដើម្បីឲ្យទប់ឲ្យវានឹងមានមួយកន្លែង គឺយើងត្រូវប្រើខ្សែពួរ ដើម្បីថ្ពក់ជាប់ទៅនឹងកំពង់ផែ ដែលយើងឃើញនៅក្នុងរូបភាពនេះ កន្ទុយទូក គឺមានខ្សែមួយចងនឹងទូក ដែលខ្សែពួរធំ ជាទូទៅយើងប្រើខ្សែពួរ ដើម្បីចងនឹងទូក ហើយកន្ទុយខ្សែម្ខាងទៀត គឺថ្ពក់ជាប់ទៅនឹងបង្គោលដែកនៅកំពង់ផែ ការធ្វើដូច្នេះគឺធ្វើឲ្យទូកមិនរលក ឬក៏មិនអណ្ដែតទៅកន្លែងណាផ្សេងក្រៅពីកំពង់ផែ ក៏ប៉ុន្តែទូកដែលចតនៅកំពង់ផែ ជាទូទៅតែងតែមានចន្លោះធំ បានន័យថាគម្លាតពីកំពង់ផែទៅទូកគឺធំ ដែលយើងមើលឃើញថា គម្លាតទាំងនោះគឺធំ ដូច្នេះអ្នកដំណើរទាំងអស់ ដែលត្រូវឡើងលើទូក ឬក៏ត្រូវចុះពីទូក ត្រូវបោះជំហានឲ្យបានវែងៗ ដើម្បីឈានពីទូកមកដល់កំពង់ផែ ប្រសិនបើយើងឈានជំហានខ្លីពេក គឺអាចធ្វើឲ្យយើងធ្លាក់ចូលក្នុងទឹក និងមានគ្រោះថ្នាក់បាន ឬក៏ដួល ឬក៏ទាក់ជើងដួល អាចធ្វើឲ្យយើងមានគ្រោះថ្នាក់គ្រលុកដៃគ្រលុកជើង ឬក៏បែកក្បាលជាដើម អញ្ចឹងយើងត្រូវបោះជំហានឲ្យវែងៗដើម្បីចេញពីទូក ដែលជាក់ស្ដែងនៅក្នុងរូបភាពនេះ គឺបុរសម្នាក់នេះ គឺគាត់បានបោះជំហានយ៉ាងវែង បោះចេញពីទូក ឡើងមកលើកំពង់ផែ។

Noodle Soup (Sakanan) — 16


បន្ទាប់មកទៀតរូបភាពទី ១៦ នៅក្នុងរូបភាពទី ១៦ បន្ទាប់ពីក្មេងប្រុសទាំងពីរនាក់បានលាយគ្រឿងមីរបស់គេរួចរាល់ហើយ អញ្ចឹងគេលាយគ្រឿងមីរបស់គេរួចរាល់ អញ្ចឹងបានន័យថា ត្រូវនឹងរសជាតិអ្វីដែលគេចង់បានហើយ ពួកគេក៏ចាប់ផ្ដើមញ៉ាំមីទាំងនោះ ដោយក្មេងប្រុសទី ១ គាត់ញ៉ាំមីមានទឹកស៊ុប ចំណែកក្មេងប្រុសទី ២ គាត់ញ៉ាំមីអត់ទឹកស៊ុប ឬក៏មីគោក ហើយយើងឃើញពួកគេទាំងពីរនាក់ គឺប្រើចង្កឹះម្នាក់មួយគូ ដើម្បីចាប់សរសៃមីឡើងញ៉ាំ។ អញ្ចឹងដោយសារតែសរសៃមីវែង ដោយសារតែសរសៃមីវែង ដូច្នេះយើងឃើញគេប្រើចង្កឹះ ហើយមី សរសៃមីនៅក្នុងមាត់ ហើយចុងម្ខាងនៃសរសៃមីគឺនៅក្នុងចាន។ អញ្ចឹងគឺវាពេលខ្លះ ប្រសិនបើយើងអត់ចេះញ៉ាំ គឺពិបាកញ៉ាំណាស់ ដោយសារតែវាវែងពេក អញ្ចឹងពេលខ្លះគេត្រូវប្រើចង្កឹះ ដើម្បីកាត់ផ្ដាច់សរសៃមីឲ្យខ្លី ហើយពេលខ្លះទៀតយើងប្រើធ្មេញ ដើម្បីខាំផ្ដាច់សរសៃមី។ អញ្ចឹងនៅពេលដែលយើងដាក់សរសៃមីចូលក្នុងមាត់បានខ្លះហើយ យើងប្រើធ្មេញរបស់យើង ដើម្បីខាំសរសៃមីទម្លាក់ចូលក្នុងចានវិញ។ អញ្ចឹងសរសៃមីណាដែលនៅក្រៅមាត់ គឺវាធ្លាក់ចូលទៅក្នុងចាន ចំណែកឯសរសៃមីដែលនៅក្នុងមាត់ គឺយើងទំពាញ៉ាំតែម្ដង។ ដែលជាក់ស្ដែងនៅក្នុងរូបភាពនេះ ក្មេងប្រុសទាំងពីរនាក់ គាត់បានបៀមសរសៃមីនៅក្នុងមាត់របស់គាត់ ហើយប្រើចង្កឹះដើម្បីកាត់សរសៃមីនោះឲ្យខ្លី ដើម្បីងាយស្រួលញ៉ាំ ព្រោះប្រសិនបើយើងអត់កាត់ឲ្យខ្លីទេ យើងអាចស្លាក់បាន អញ្ចឹងនៅពេលដែលមីវែងពេក នៅពេលដែលយើងលេបទៅវាអត់ផុតមាត់ ឬក៏អត់ផុតបំពង់ក ដូច្នេះវាអាចធ្វើឲ្យយើងស្លាក់បាន អញ្ចឹងយើងត្រូវកាត់វាឲ្យខ្លីៗសិន ដើម្បីងាយស្រួលញ៉ាំ។

Breaking A Bowl (Sakanan) — 12


បន្ទាប់មកទៀតរូបភាពទី ១២ នៅក្នុងរូបភាពទី ១២ បន្ទាប់ពីគាត់យកម៉ាស៊ីនបូមធូលីរបស់គាត់ចេញមកខាងក្រៅហើយ គាត់ក៏បានដើរសំដៅ ឬក៏អូសម៉ាស៊ីននោះ សំដៅទៅកាន់ផ្ទះបាយ ទៅកន្លែងដែលមានចានបែកអម្បាញ់មិញ អញ្ចឹងប្រហែលជាគាត់បោសអត់ស្អាត ឬក៏គាត់គិតថាបោសអត់ស្អាត ដោយសារតែ ពេលខ្លះអំបែងចានគឺតូចៗ អញ្ចឹងយើងអត់អាចមើលឃើញនោះទេ ដោយពេលខ្លះអំបោសគឺបោសប្រមូលបានតែអំបែងណាធំៗ អំបែងធំៗ អញ្ចឹងគាត់បោសប្រមូលតែអំបែងធំៗតែប៉ុណ្ណោះ ចំណែកឯអំបែងតូចៗ ឬក៏កម្ទេចកម្ទីតូចៗ ដែលយើងអត់អាចមើលឃើញ គឺយើងអត់អាចបោសប្រមូលបាននោះទេ ដូច្នេះកម្ទេចកម្ទីតូចៗក៏អាចធ្វើឲ្យយើងមានគ្រោះថ្នាក់ដែរ ប្រសិនបើយើងជាន់ទៅលើវា អញ្ចឹងដើម្បីការពារ ឬក៏ដើម្បីបង្ការកុំឲ្យមានគ្រោះថ្នាក់ នៅពេលដែលយើងប៉ះពាល់ទៅដល់អំបែងតូចៗទាំងនោះ គាត់ក៏បានយកម៉ាស៊ីនបូមធូលីទៅបូមកម្ទេចកម្ទីតូចៗ ដែលជាក់ស្ដែងនៅក្នុងរូបភាពទី ១២ យើងឃើញគាត់កំពុងតែប្រើប្រាស់ម៉ាស៊ីនបូមធូលីអម្បាញ់មិញ ហើយយកមកបូមកម្ទេចកម្ទីអំបែងចានដែលនៅលើកម្រាលឥដ្ឋបន្ថែមទៀត ដែលយើងឃើញកម្ទេចកម្ទីអំបែងចាននៅលើកម្រាលឥដ្ឋ កំពុងតែស្រូបចូលទៅក្នុងម៉ាស៊ីនបូមធូលី តាមរយៈបំពង់ម៉ាស៊ីន អញ្ចឹងបំពង់ម៉ាស៊ីនបូមធូលីគឺប្រើប្រាស់ខ្យល់បឺតចូល ដោយសារតែវាប្រើប្រាស់អគ្គិសនី អញ្ចឹងវាមានម៉ាស៊ីននោះ និងដំណើរការបឺតខ្យល់ចូលទៅខាងក្នុងម៉ាស៊ីន អញ្ចឹងនៅពេលដែលយើងដាក់ជិតកម្ទេចកម្ទី ឬក៏ដាក់នៅជិតសំរាមផ្សេងៗ សំរាម ឬក៏ធូលី ឬក៏កម្ទេចកម្ទីនោះ នឹងបឺតចូលទៅក្នុងម៉ាស៊ីនខ្លួនឯងតាមខ្យល់ អញ្ចឹងដោយសារតែម៉ាស៊ីនគឺមានខ្យល់ខ្លាំងបឺតចូលក្នុង ដូច្នេះវាអាចបឺតចូលនូវកម្ទេចកម្ទី ក៏ដូចជាធូលីនិងអំបែងតូចៗដែលយើងមើលអត់ឃើញ ដែលយើងបោសអត់ស្អាត ចូលទៅក្នុងម៉ាស៊ីនបានយ៉ាងស្អាត អញ្ចឹងយើង នៅពេលដែលយើងប្រើប្រាស់ម៉ាស៊ីនបូមធូលី គឺយើងអត់ចាំបាច់ភ័យព្រួយថាយើងនៅសល់កម្ទេចកម្ទី ឬក៏អំបែងចានទៀតនោះទេ ដោយសារតែម៉ាស៊ីនបូមធូលីមានខ្យល់ខ្លាំង ដូច្នេះវាអាចបូមកម្ទេចកម្ទីខ្យល់ ឬក៏បូមកម្ទេចកម្ទីអំបែងចានចូលទៅក្នុងម៉ាស៊ីនបាន ដោយយើងមិនចាំបាច់បារម្ភអំពីការមុតជើង ឬក៏មុតដៃទៀតនោះទេ ព្រោះវាអាចសម្អាតបានស្អាតជាងការបោសសម្អាតដោយប្រើអំបោស។

Breaking A Bowl (Sakanan) — 06


បន្ទាប់មកទៀតរូបភាពទី ៦ នៅក្នុងរូបភាពទី ៦ យើងឃើញថា បន្ទាប់ពីគាត់ឃើញចានគោមរបស់គាត់បែកហើយ បុរសម្នាក់នោះ គាត់ក៏បានរត់មកក្នុងបន្ទប់ដាក់សម្ភារៈរបស់គាត់ អញ្ចឹងគាត់ក៏បានចេញពីផ្ទះបាយរបស់គាត់ ដែលគាត់ចេញពីផ្ទះបាយរត់មករកបន្ទប់ដាក់សម្ភារៈ ដោយសារតែគាត់ត្រូវការយកអំបោស ឬក៏យកប្រដាប់កើបសំរាម ដើម្បីទៅប្រមូលអំបែងចេញពីលើកម្រាលឥដ្ឋ ដែលយើងឃើញនៅក្នុងបន្ទប់ដាក់សម្ភារៈរបស់គាត់ គឺមានសម្ភារៈជាច្រើន ដូចជា យើងឃើញនៅខាងក្រោម យើងឃើញនៅខាងក្រោមជាប់នៅជញ្ជាំង យើងឃើញមានម៉ាស៊ីនបូមធូលីចំនួន ១ ដែលម៉ាស៊ីនបូមធូលីនោះ គឺជាឧបករណ៍សម្រាប់បូមកម្ទេចធូលី ឬក៏បូមសំរាមផ្សេងៗ ដែលប្រើប្រាស់ខ្យល់ អញ្ចឹងវាប្រើខ្យល់បឺតសំរាម ឬក៏ធូលីផ្សេងៗចេញពីកម្រាលឥដ្ឋ ឬក៏ចេញពីកន្លែងណាមួយដែលយើងចង់សម្អាត អញ្ចឹងគឺជាម៉ាស៊ីនបូមធូលី ហើយនៅក្បែរម៉ាស៊ីនបូមធូលីគឺមានឈើអំបោសវែង អញ្ចឹងគាត់មានអំបោសវែងមួយ សម្រាប់បោសផ្ទះ ឬក៏សម្រាប់បោសទីធ្លាផ្ទះរបស់គាត់ ដែលនៅក្បែរឈើអំបោសវែង គឺយើងឃើញមានដងសម្រាប់ជូតកញ្ចក់ អញ្ចឹងបានន័យថាផ្លិតទឹក ជាវាជាផ្លិតទឹកសម្រាប់ជូតកញ្ចក់ អញ្ចឹងនៅពេលដែលយើងចង់ជូតសម្អាតកញ្ចក់របស់យើង យើងប្រើប្រាស់ផ្លិតទឹកដើម្បីជូតសម្អាត ហើយយើងឃើញនៅលើជញ្ជាំងគឺមានបែងចែកចេញជាថ្នាក់ផ្សេងៗផងដែរ ដែលមាន ៣ ថ្នាក់ ដែលយើងឃើញថ្នាក់នៅខាងក្រោម ឬក៏ថ្នាក់ទី ១ យើងឃើញមានធុងចំនួន ២ ដែលជាធុងសម្រាប់ដាក់ទឹក ឬក៏ជាធុងសម្រាប់ដាក់វត្ថុផ្សេងៗផងដែរ អញ្ចឹងមានធុងចំនួន ២ ហើយមានដបថ្នាំ អាចជាថ្នាំលាបផ្ទះ ឬក៏អាចជាប្រេងម៉ាស៊ីន ឬក៏អាចជាប្រេងផ្សេងៗ ដែលគាត់ទុកប្រើប្រាស់នៅក្នុងផ្ទះរបស់គាត់ អញ្ចឹងនៅក្នុងថ្នាក់ទី ១ នៃបន្ទប់ដាក់សម្ភារៈ យើងឃើញមានធុងនិងមានដបថ្នាំ។ ចំណែកឯថ្នាក់ទី ២ យើងឃើញមានអំបោសខ្លី ១ សម្រាប់បោសផ្ទះ និងមានប្រដាប់កើបសំរាម ១ ផងដែរពណ៌ខៀវ ហើយយើងឃើញនៅក្បែរប្រដាប់កើបសំរាមគឺមានដបថ្នាំ ឬក៏បំពង់ផ្សេងៗសម្រាប់ប្រើប្រាស់ផងដែរ ចំណែកឯថ្នាក់ទី ៣ នៅក្នុងថ្នាក់ទី ៣ យើងឃើញមានដបថ្នាំ និងកូនចានតូចៗជាច្រើន សម្រាប់ប្រើប្រាស់ អញ្ចឹងនេះគឺជាបន្ទប់ដាក់សម្ភារៈរបស់គាត់ ដូច្នេះនៅពេលដែលគាត់ត្រូវការប្រើប្រាស់សម្ភារៈផ្សេងៗ ដែលគាត់ប្រើប្រាស់នៅក្នុងផ្ទះ គាត់អាចមកបន្ទប់ដាក់សម្ភារៈ ដើម្បីយកសម្ភារៈទាំងនោះទៅប្រើប្រាស់បាន។

Motorcycle Taxi (Sakanan) — 16


បន្ទាប់មកទៀតរូបភាពទី ១៦ នៅក្នុងរូបភាពទី ១៦ យើងឃើញថា បន្ទាប់ពីគាត់ចុះពីលើម៉ូតូហើយ គាត់ក៏បានដើរសំដៅមករកហាងកាហ្វេមួយ ដោយនៅក្នុងនោះយើងឃើញមិត្តភក្តិរបស់គាត់ម្នាក់ កំពុងតែអង្គុយនៅក្នុងហាងកាហ្វេនោះ។ អញ្ចឹងនារីម្នាក់នោះ គាត់ក៏បានដើរចូលមកតាមខ្លោងទ្វារ ឬក៏តាមមាត់ទ្វារហាង ដោយយើងឃើញនៅក្បែរមាត់ទ្វារនោះ គឺមានរូបថតព្យួរជាច្រើន ដែលរូបថតទាំងនោះ អាចជារូបគំនូរ ឬជារូបថត ដែលគេដាក់តាំងលម្អនៅក្នុងហាងកាហ្វេរបស់គេ។ អញ្ចឹងនារីម្នាក់នោះ គាត់បានដើរចូលតាមទ្វារ ហើយគាត់ដើរមកដល់ គាត់លើកដៃម្ខាងឡើង ដើម្បីហៅមិត្តភក្តិរបស់គាត់ អញ្ចឹងគាត់លើកដៃឆ្វេងរបស់គាត់ឡើង រីឯដៃស្ដាំគឺគាត់នៅតែទប់កាបូបដែលស្ពាយនៅនឹងស្មា។ ចំណែកឯយើងឃើញមានបុរសម្នាក់ដែលកំពុងអង្គុយនៅលើកៅអី [នៅលើនឹង]តុ នៅក្នុងហាងកាហ្វេនោះផងដែរ ដោយបុរសម្នាក់នោះ គាត់ពាក់អាវដៃខ្លីពណ៌លឿង ស្លៀកខោជើងវែងពណ៌ស ហើយនៅលើតុរបស់គាត់គឺមានកែវកាហ្វេចំនួនមួយ អញ្ចឹងបានន័យថាគាត់ណាត់ជាមួយនឹងនារីម្នាក់នោះ ដើម្បីមកញ៉ាំកាហ្វេនៅក្នុងហាងកាហ្វេ ដើម្បីនិយាយគ្នាអំពីការងារ ឬក៏អំពីការសិក្សាផ្សេងៗ អញ្ចឹងនារីម្នាក់នោះគាត់ក៏បានមកដល់ ហើយពួកគេទាំងពីរនាក់ ក៏បានលើកដៃឡើង ដើម្បីជាសញ្ញាហៅគ្នាទៅវិញទៅមក។ ដោយយើងឃើញបុរសដែលជាអ្នកអង្គុយនៅក្នុងហាងកាហ្វេនោះ គឺគាត់លើកដៃទាំងពីរឡើង ហើយគាត់ញញឹម បានន័យថាគាត់សប្បាយរីករាយ ដោយសារតែគាត់ឃើញនារីម្នាក់នោះ ដែលជាមិត្តភក្តិរបស់គាត់ មកទាន់ការណាត់។ ហើយនៅក្បែរតុរបស់បុរសម្នាក់នោះ យើងឃើញមានតុកាហ្វេចំនួនមួយទៀត អញ្ចឹងបានន័យថា ហាងកាហ្វេនោះគឺមានតុច្រើន ដែលដាក់នៅក្បែរៗគ្នា ដោយយើងឃើញមានតុចំនួនមួយទៀតដែលនៅក្បែរនោះ ហើយមានកែវកាហ្វេនៅលើតុនោះផងដែរ។ អញ្ចឹងពួកគេទាំងពីរអ្នកមកហាងកាហ្វេ ដើម្បីញ៉ាំកាហ្វេ ជជែកគ្នាអំពីរឿងការសិក្សា អំពីការងារផងដែរ ដោយយើងឃើញពួកគេគឺមកទាន់ម៉ោង បានន័យថា ពួកគេអត់មកយឺតជាងម៉ោងណាត់នោះទេ។ អញ្ចឹងពួកគេណាត់គ្នាម៉ោងប៉ុន្មាន ពួកគេមកម៉ោងប៉ុននោះ អញ្ចឹងអត់មាននរណាម្នាក់យឺតនោះទេទោះបីជាស្ទះផ្លូវក៏ដោយ អញ្ចឹងនារីម្នាក់នោះ ដោយសារតែស្ទះផ្លូវខ្លាំងពេក ហើយគាត់ខ្លាចមកខកការណាត់ ឬក៏ខ្លាចមកយឺត ដូច្នេះគាត់ក៏សម្រេចចិត្តរត់ និងជិះម៉ូតូឌុប ដើម្បីមកហាងកាហ្វេ ជួបនឹងមិត្តភក្តិរបស់គាត់ ដើម្បីកុំឲ្យយឺតម៉ោង។

Khmer New Year (Sakanan) — 02


ចូលដល់រូបភាពទី ២ នៅក្នុងរូបភាពទី ២ យើងឃើញមានមនុស្សបីនាក់ បាទ មនុស្សបីនាក់ ដែលជាគ្រួសារតែមួយ បាទ មនុស្សបីនាក់ ដែលជាគ្រួសារតែមួយ ដែលនៅខាងមុខគេ គឺជាបុរសម្នាក់ ដែលគាត់មានអាយុប្រហែលជា ៤០ ឆ្នាំ បាទ គាត់មានអាយុប្រហែលជា ៤០ ឆ្នាំ គាត់ពាក់អាវក្រណាត់ សាច់ក្រណាត់ ដៃខ្លី អាវគាត់ពណ៌ស្វាយ គាត់ស្លៀកខោជើងវែង ប៉ុន្តែមិនមានពាក់ស្បែកជើងនោះទេ បាទ ហើយគាត់ស្លៀកខោជើងវែងពណ៌ស នៅនឹងដៃរបស់គាត់ គឺកាន់ស្លាដក់មួយ នៅនឹងដៃកាន់ស្លាដក់ ស្លាដក់គឺជាថាសមួយដែលគេដាក់នូវចង្ហាន់ ក៏ដូចជាវត្ថុផ្សេងៗសម្រាប់ប្រគេនព្រះសង្ឃ ដែលនៅក្នុងនោះមានដូចជាស្ករស មានដូចជាតែ មានដូចជាធូប និងមានដូចជាទៀនជាដើម។ អញ្ចឹងគេរៀបចំវត្ថុទាំងអស់នោះដាក់នៅលើថាស បន្ទាប់មកគេខ្ចប់ដោយថង់មួយ គេខ្ចប់ដោយថង់មួយ ដែលយើងហៅថាស្លាដក់។ នៅខាងក្រោយបុរសម្នាក់នោះគឺមាននារីម្នាក់ បាទ គាត់អាយុប្រហែលជាខ្ទង់ ៤០ ឆ្នាំដូចគ្នា គាត់ប្រហែលជាប្រពន្ធរបស់បុរសម្នាក់នោះ បាទ នារីម្នាក់នោះ គាត់ពាក់អាវប៉ាក់ គាត់ពាក់អាវប៉ាក់ពណ៌ស និងស្លៀកសំពត់ហូលឬក៏ផាមួងពណ៌ប្រផេះ ដើរដោយមិនមានពាក់ស្បែកជើងនោះទេ។ អញ្ចឹងជាទូទៅនៅក្នុងប្រទេសកម្ពុជា នៅពេលដែលចូលឆ្នាំខ្មែរ គេតែងតែទៅវត្ត ហើយទៅវត្ត នារីដែល នៅក្នុងប្រជាជនកម្ពុជាដែលជានារី គឺគាត់តែងតែស្លៀកពាក់ខោអាវប្រពៃណី ឬក៏សម្លៀកបំពាក់ប្រពៃណី ដែលសម្លៀកបំពាក់ទាំងនោះមានដូចជាអាវប៉ាក់ ហូល ផាមួងជាដើម អញ្ចឹងនារីម្នាក់នេះ គាត់ពាក់អាវប៉ាក់និងហូលឬក៏ផាមួង ដើរនៅក្រោយប្តីរបស់គាត់។ ចំណែកនៅខាងក្រោយនារីម្នាក់នោះគឺមានក្មេងប្រុសម្នាក់ បាទ ក្មេងប្រុសម្នាក់នោះ គឺជាកូនរបស់អ្នកទាំងពីរដែលនៅខាងមុខ។ អញ្ចឹងក្មេងប្រុសម្នាក់នោះ ដើរតាមខាងក្រោយនារីម្នាក់នោះ គឺក្មេងប្រុសម្នាក់នោះ គាត់ពាក់អាវដៃខ្លីពណ៌ស និងស្លៀកខោជើងខ្លីពណ៌សដែរ។ អញ្ចឹងគាត់ដើរមកវត្តជាមួយនឹងគ្រួសាររបស់គាត់ គាត់ដើរមកវត្តជាមួយនឹងឪពុកម្ដាយរបស់គាត់ បាទ ជាទូទៅ នៅពេលដែលយើងដើរចូលវត្ត យើងមិនត្រូវពាក់មួកនោះទេ យើងត្រូវដោះមួកចេញ ព្រោះជាសុជីវធម៌ អញ្ចឹងដើម្បីរក្សាសុជីវធម៌ ព្រោះនៅប្រទេសកម្ពុជាយើងប្រកាន់នូវសុជីវធម៌ជាធំ ដូច្នេះនៅពេលដែលយើងចូលវត្ត យើងមិនត្រូវពាក់មួកនោះទេ។ ហើយមួយវិញទៀត នៅពេលដែលយើងចូលព្រះវិហារ យើងត្រូវដោះស្បែកជើង បាទ ព្រោះព្រះវិហារគឺជាកន្លែងដាក់ព្រះពុទ្ធបដិមា អញ្ចឹងយើងមិនអាចពាក់ស្បែកជើងចូលនោះទេ យើងត្រូវតែគោរព។ ជាក់ស្ដែងដូចជានៅក្នុងរូបភាពទី ២ នេះ គឺមនុស្សទាំងបីនាក់ គាត់កំពុងតែដើរទៅកាន់ព្រះវិហារ ដូច្នេះយើងមិនមានឃើញគាត់ពាក់មួក ឬក៏ពាក់ស្បែកជើងនោះទេ ព្រោះគាត់ត្រូវរក្សាសុជីវធម៌ និងគោរពទៅដល់ព្រះពុទ្ធបដិមា ដែលនៅក្នុងព្រះវិហារ។

Rice (Sakanan) — 11


បន្ទាប់មកទៀតរូបភាពទី ១១ នៅក្នុងរូបភាពទី ១១ យើងឃើញមានត្បាល់មួយ អញ្ចឹងត្បាល់សម្រាប់បុកស្រូវ ដោយត្បាល់នោះគឺយើងឃើញជាត្បាល់ជាន់ ដោយយើងធ្វើអំពីឈើ ដោយត្បាល់នោះគឺមានសសរពីរដើម សសរពីរដើមនោះចោះដោយដែកមួយ ហើយមានសសរមួយទៀតនៅកណ្ដាល ដែលមានរាងវែងបន្តិចផ្ដេកទៅមុខ អញ្ចឹងសសរទាំងពីរ ទាំងបីនោះ ភ្ជាប់គ្នាដោយដែកមូលមួយនៅកណ្ដាល ហើយនៅពេលដែលយើងឃើញសសរផ្ដេកនោះ គឺមានចុងម្ខាង គឺមានបណ្ដូល ដូច្នេះគឺ បណ្ដូលនោះ គឺជា យើងហៅថាអង្រែសម្រាប់បុកស្រូវ អញ្ចឹងត្បាល់នេះគឺជាប្រភេទត្បាល់ជាន់ ហើយយើងជាន់នៅចុងម្ខាង ដើម្បីឲ្យចុងម្ខាងទៀតបះ ហើយនៅក្រោមត្បាល់ផ្ដេក ឬក៏ឈើផ្ដេកនោះ គឺយើងឃើញមានត្បាល់មួយ ដែលមានរាងប្រហោងកណ្ដាល ដូច្នេះយើងដាក់ស្រូវចូលទៅក្នុងប្រហោងកណ្ដាលនោះ ហើយយើងជាន់អង្រែ ដើម្បីបុកស្រូវឲ្យចេញជាអង្ករ នេះគឺជាវិធីបុរាណសម្រាប់ធ្វើការបកគ្រាប់ស្រូវ ដើម្បីយកអង្ករ គឺយើងហៅថាបុកស្រូវដើម្បីយកអង្ករ អញ្ចឹងវិធីបុរាណនេះគឺវាពិបាកនៅក្នុងការប្រើប្រាស់បន្តិច ដោយសារតែយើងត្រូវប្រើប្រាស់កម្លាំងច្រើន ដើម្បីបកគ្រាប់ស្រូវ ដើម្បីយកអង្ករពណ៌ស អញ្ចឹងដើម្បីមុននឹងបានអង្ករ គឺយើងត្រូវបុកស្រូវជាមុនសិន ដើម្បីឲ្យគ្រាប់ស្រូវទាំងនោះបែក ហើយចេញជាអង្ករមក ប៉ុន្តែបច្ចុប្បន្ននេះគឺគេប្រើម៉ាស៊ីន ដូចជាយើងឃើញនៅក្នុងរូបភាពទី ១១ ដដែល ដែលនៅខាងស្ដាំដៃ គឺជាម៉ាស៊ីនកិនស្រូវ អញ្ចឹងនៅសម័យបច្ចុប្បន្ន គេលែងប្រើត្បាល់ជាន់ ឬក៏ត្បាល់បុកស្រូវទៀតហើយ ដោយសារតែវាយូរនិងពិបាក ហើយប្រើប្រាស់កម្លាំងច្រើន ដូច្នេះគេប្រើម៉ាស៊ីនដើម្បីកិនស្រូវតែម្ដង អញ្ចឹងយើងគ្រាន់តែចាក់គ្រាប់ស្រូវរបស់យើង ដែលហាលរួច ដែលហាលស្ងួតរួច ចូលទៅក្នុងម៉ាស៊ីន នោះម៉ាស៊ីននឹងចាប់ផ្ដើមកិន ហើយបំបែកគ្រាប់ស្រូវដោយបកគ្រាប់ស្រូវចេញជាអង្ករភ្លាមៗ អញ្ចឹងអង្ករគឺព័ទ្ធដោយគ្រាប់ស្រូវសំបកស្រូវ អញ្ចឹងនៅពេលដែលយើងបកសំបកស្រូវនោះចេញ នឹងមានអង្ករពណ៌សនៅក្នុងនោះ អញ្ចឹងនៅពេលដែលយើងចាក់គ្រាប់ស្រូវដែលស្ងួត ចូលទៅក្នុងម៉ាស៊ីន ម៉ាស៊ីននឹងធ្វើការបកគ្រាប់ស្រូវនោះឲ្យចេញជាអង្ករពណ៌សតែម្ដង គឺវាចំណេញពេល និងមិនសូវពិបាកដល់កម្លាំងមនុស្សផងដែរ ហើយសំបកស្រូវ ដែលបកចេញជាអង្ករហើយ វានឹងក្លាយទៅជាកន្ទក់ ដូច្នេះកន្ទក់គឺយើងអាចយកទៅចិញ្ចឹមសត្វផងដែរ ដូចជាសត្វជ្រូកគឺវាស៊ីកន្ទក់ ដែលជាសំបកស្រូវនោះឯង ហើយអង្ករគឺមនុស្សយកមកបរិភោគ ដូច្នេះនៅក្នុងរូបភាពទី ១១ គឺបង្ហាញអំពីការបកគ្រាប់ស្រូវពីវិធីបុរាណនិងវិធីសម័យ ដោយវិធីបុរាណ គេបកគ្រាប់ស្រូវ ដោយប្រើប្រាស់ត្បាល់បុកស្រូវ ឬក៏ត្បាល់ជាន់ រីឯសម័យ ឬក៏ពេលបច្ចុប្បន្ន គឺយើងប្រើប្រាស់ម៉ាស៊ីនកិនស្រូវ ដូច្នេះការបកគ្រាប់ស្រូវគឺមានវិធីពីរ គឺប្រើប្រាស់វិធីបុរាណ និងប្រើប្រាស់វិធីសម័យ ឬក៏បច្ចុប្បន្ន ដោយប្រើប្រាស់ម៉ាស៊ីនកិនស្រូវ។

Rice (Sakanan) — 09


បន្ទាប់មកទៀតរូបភាពទី ៩ នៅក្នុងរូបភាពទី ៩ បន្ទាប់ពីគាត់ច្រូតស្រូវរួចរាល់ហើយ អញ្ចឹងបន្ទាប់ពីកសិករ គាត់ច្រូតស្រូវរួចរាល់ហើយ យើងឃើញកសិករ គាត់កំពុងតែយកដើមស្រូវ ដែលមានស្រូវទុំ ឬមានផ្លែស្រូវទុំនៅជាប់ដើមនោះ មកបោកទៅនឹងក្ដារ ឬក៏ទៅនឹងថ្មមួយ អញ្ចឹងការធ្វើបែបនេះ យើងហៅថាការបោកស្រូវ ឬក៏ការបែនស្រូវ អញ្ចឹងដើម្បីប្រឡេះយកគ្រាប់ស្រូវចេញពីដើម គឺយើងអត់ប្រើដៃយើងប្រឡេះគ្រាប់ស្រូវម្ដងមួយគ្រាប់ៗនោះទេ គឺវាប្រើពេលយូរ ដោយសារតែដើមស្រូវនីមួយៗគឺមានផ្លែច្រើន ហើយក្នុងស្រែនីមួយៗគឺមានដើមស្រូវច្រើនផងដែរ ដូច្នេះ ដើម្បីឲ្យចំណេញពេលវេលា គឺយើងយកដើមស្រូវទាំងនោះទៅបោកទៅនឹងថ្ម ឬក៏បោកទៅនឹងក្ដារមួយបន្ទះ ដើម្បីឲ្យគ្រាប់ស្រូវជ្រុះមកក្រោម អញ្ចឹងដើម្បីប្រមូលផលស្រូវឲ្យបានល្អ គឺគេអត់បោកទៅផ្ទាល់នឹងដីនោះទេ គឺគេមានក្រាលកន្ទេលមួយ ដែលប្រជាជនកម្ពុជាតែងតែប្រើកន្ទេលដែលធ្វើអំពីស្លឹកត្នោត អញ្ចឹងគឺយើងបោកស្រូវនៅលើកន្ទេលស្លឹកត្នោត ហើយនៅពេលដែលគ្រាប់ស្រូវជ្រុះមក គឺជ្រុះនៅលើកន្ទេល ដូច្នេះកសិករងាយស្រួលប្រមូល ដោយមិនឲ្យគ្រាប់ស្រូវទាំងនោះប្រឡាក់ជាមួយនឹងដី អញ្ចឹងនៅក្នុងរូបភាពនេះ យើងឃើញកសិករ គាត់ពាក់អាវដៃវែង ខោជើងវែងដដែល ព្រោះថាដើមស្រូវគឺធ្វើឲ្យយើង អាចធ្វើឲ្យយើងរមាស់បាន ប្រសិនបើយើងអត់ពាក់អាវដៃវែង ឬក៏អត់ពាក់ខោជើងវែងទេ នៅពេលដែលយើងប៉ះពាល់ជាមួយដើមស្រូវ គឺដើមស្រូវអាចធ្វើឲ្យយើងរមាស់ខ្លួនបាន ដូច្នេះដើម្បីកុំឲ្យរមាស់គឺយើងត្រូវការពារខ្លួនយើងដោយពាក់អាវដៃវែង ឬក៏ខោជើងវែងជាដើម អញ្ចឹងនៅក្នុងរូបភាពនេះគឺគាត់កំពុងតែកាន់ដើមស្រូវមួយគុម្ព ហើយបោកទៅនឹងថ្មមួយ អញ្ចឹងនៅពេលដែលបោក គឺយើងឃើញគាត់បោកម្ដងមួយគុម្ពៗ ហើយយើងឃើញគ្រាប់ស្រូវកំពុងតែជ្រុះចេញពីដើមស្រូវទាំងនោះ អញ្ចឹងយើងឃើញនៅខាងមុខថ្ម គឺមានគ្រាប់ស្រូវពណ៌លឿងជាច្រើន ដែលជ្រុះនៅខាងមុខថ្ម អញ្ចឹងយើងឃើញថា គាត់បោកស្រូវដើម្បីយកស្រូវចេញពីដើមស្រូវ ដោយនៅខាងក្រោយគាត់ យើងឃើញ មានដើមស្រូវជាច្រើនទៀត ដែលមិនទាន់បោករួចរាល់ ដូច្នេះកសិករគាត់ត្រូវតែបោកស្រូវ ដើម្បីប្រមូលផលស្រូវចេញពីដើមស្រូវ អញ្ចឹងនៅពេលដែលយើងប្រមូលផលស្រូវចេញពីដើមស្រូវរួចរាល់ហើយ ដើមស្រូវដែលអត់មានគ្រាប់ស្រូវ យើងហៅថាចំបើង អញ្ចឹងដើមស្រូវគឺមានប្រយោជន៍ផងដែរ នៅពេលដែលយើងប្រមូលផល ឬក៏ប្រមូលស្រូវ បោកស្រូវចេញពីដើមអស់ហើយ គឺយើងអាចយកដើមស្រូវទាំងនោះ យកទៅឲ្យសត្វគោ ឬក៏សត្វក្របីស៊ី អញ្ចឹងសត្វគោ ឬសត្វក្របី វាស៊ីដើមស្រូវ ឬក៏ចំបើង ជាអាហារ ដូច្នេះកសិករគាត់អត់យកចំបើង ឬក៏ដើមស្រូវដែលអស់គ្រាប់នោះ យកទៅបោះចោលនោះទេ គឺគាត់អាចយកទៅឲ្យគោ ឬក្របីរបស់គាត់ស៊ីជាអាហារផងដែរ ដូច្នេះនៅក្នុងរូបភាពទី ៩ គឺកសិករ គាត់កំពុងតែបោកស្រូវរបស់គាត់ទៅនឹងថ្ម ឬក៏បោកស្រូវរបស់គាត់ទៅនឹងក្ដារមួយបន្ទះ ដើម្បីប្រមូលគ្រាប់ស្រូវចេញពីដើមស្រូវ ហើយយកគ្រាប់ស្រូវនោះទៅប្រើប្រាស់។